EZAYI 23 - Bible en langue Bulu

Ajô Tir a Sidoñ

¹ Ayaa ajô Tir. Yônan a besitima ya Tarsis! Amu tison éte é tyambaneya; teke fe menda! Vôme ya nyiine fe momo! Jame te e nga litibane be be ataté si ya Kitim.

² Woñ ô toʼé mia mvuk, mia mi too ékôte mañ, mia bekuan abome ya Sidoñ, minlômane mienan mia dañ édoʼo mañ!

³ Memvoñ be mbe be béék éwome Nil, Sidoñ nye a mbe a kôʼane me; nye a mbe a nyoñe minsenge ya meyoñ .

⁴ Ôson a wo, a Sidoñ, tison ôleme ya mañ! Amu avale di mañ ma jô na: Me nji wôʼô mintaé, me nji kôʼôlô mie, me nji ke yale bisoé bendôman, nge yale bengo be binga.

⁵ Eyoñe foé ja ye kui Ejipte, bôt ba ye fôʼôban avale Tir a nga bo éyoñ a nga wôʼô je.

⁶ Kelane mfaʼa ya Tarsis, Yônan mia bôte be too ékôte mañ

⁷ ye tisone jenane foʼo le, e vôme bôte ba nyeʼe mevak? Atataʼa dé da so e kôa, ve mebo mé ma kee je é ke tabe ôyap.

⁸ Za a nga nyoñe ntyiʼan wo tebe Tir e ngame yate wu? Nyô a ne nkabe bikat, nyô bekuan abome bé be mbe mintômba, nyô bebo makite bé be nga bili ésemen e si ése?

⁹ Nti ya minsamba mewosan nye a nga nyoñe ntyiʼane te, asu ya balé mebune ya jôm ése ja faé aveñ, asu ya sili e ba bese be beʼe duma e si nyô si.

¹⁰ Tame dañe si jôé ane Nil a ngone ya Tarsis, teke fe vôme besitima ba tebe!

¹¹ Nti a sameya wo wé e mañe yôp; a bo bijôé na bi fôʼôban; a bendéya Kanaan na a tyam aleme dé.

¹² A jôya na: Wo ye bo te kʼôsu a bo mevak, wo, éndune ngone ya Sidoñ é nga tibane yôp! Kôlôʼô si a ke e si ya Kitim! Ve jaʼana e wé, wo ye bo te bi awoʼon!

¹³ Sii Bekaldééñ nje nyô, Bekaldééñ mbe be nji tame bo ngum ayoñe bôt; bôte yʼAsiri be nga ve si éte asu bôte be too e nkôte si; ba lôñe minkume ya mombô, be maneya tyame biwôlô menda ya Tir, be boya me ne sangaññ.

¹⁴ Yônan a besitima ya Tarsis! Amu tison ôleme jenan é tyambaneya!

¹⁵ Môs ôte ba ye vuane Tir tañe mimbu mewôme zamgbwa, abime melu me njô bôt ma tabe. Mvuse mimbu mewôme zamgbwa, Tir a ye bo ane minga ébamba e jia ji ja jô na:

¹⁶ nyoñe mvet, bômaʼane tison, a minga ébamba be vuaneya! Tukaʼa bôm, yiʼa abui bia, ndemben ba ye simesane wo!

¹⁷ Eyoñe mimbu mewôme zamgbwa mi lôteya, Nti a ye jome Tir, éyoñe te fe Tir a ye beta taté na a bi moné ya mboon ébamba ba be bijôé bise ya si nyô.

¹⁸ Ve minseñge mié a maʼane mé bia ye teléban étyi asu Nti. Ba ye bo te kôane bie nge baʼale bie ve bia ye volô asu ndian, njalan abume ya ba be too Nti ôsu a asu ngômesane jap ja libi.