EZAYI 22 - Bible en langue Bulu

Nkulane mejô wo wosane Yérusalém

¹ Ayaa e mbiʼili ya ñyenane mam. Jé é boya Yérusalém? Amu jé bôte bôé bese be maneya bet e mendile yôp?

² A wo ô ne zôʼé abui, tisone bindundumba, tisone ya mevaʼa nga? Bebalé meveñe bôé be nji balebane meveñ a nkpwaté mekôn, a ba ye bo te wu bita

³ Bejôô bôé bese be nga tube nsamba wua. Bewua bilaé be biya be mimbôk. Bôte bese be too be wo be biya be mimbôk, nsamba wua, be kusa ke ba tub ôyap.

⁴ Ajô te ma jô na: Vaʼane me mise nyô, jôkaʼane ma me yôn mbia ñyônan; te veane ngule ya volô ma nlem , amu bidim bi ngone ya bôte bam.

⁵ Amu den a ne môse ya feʼe njañan, môse mbiban a feʼe ne vema, ñwô Nti, Zambe ya minsamba mewosan a lômeya; e mbiʼili ya ñyenane mam été, beta mfin a kuya, a miñyôn mia bet e mfaʼa ya beta minkô.

⁶ Elam a beʼe ékpwaé mekoñe mʼélaé e bevagoñ be tii a be ne mbetan, Kir ki a kuli ében atan.

⁷ Minyanebe miôé mia dañ abeñ, mi ne njalan a bevagoñ, bewulu bikabela be yabeya e mimbé,

⁸ Biôme bia kamane Yuda bi vasebaneya. Môs ôte, mi nga fombô mfaʼa biôme mewosan Ya nda é ne Afan été.

⁹ Mi lôô abui mefôla be nga yooé e tisone David, a mia kôane mendim ébata ya nké.

¹⁰ Mia lañe menda ya Yérusalém, a mia tyame menda asu ya yemete akak.

¹¹ Mia faʼa ébé ya baʼale mendim e zañe mimfin, asu mendime ya nnôm ébatak. Ve mi ne te kee mise menan e be nyô a bo jame te, mi ne teke yene nyô a kômesane jame te ayab éyoñe mvus.

¹² Nti, Zambe ya minsamba mewosan, a maneya loone mia e môse wu na, mi yôn, mi sôtebane mintui a tiñeti minkuta mengeteñ,

¹³ éyoñe ji yenane mefôn a mevak! Ba wôé beta biyem a tyiʼi bone biyeme tyiñ , bi di bia diban a woon a nyuban: njaʼan a nyu amu akiti bia ye wu!

¹⁴ Nti ya minsamba mewosan a litiya me jame te; momo, ékobe te ja ye bo te vaaban asu denan, akekui awu denan, nalé Nti ya minsamba mewosan a jô.

Asu biwôlô bebo bisaé bibaé

¹⁵ Avale di nde Nti ya minsamba mewosan a jô na: kele yene mbaʼale akum ate, Sebna, njôô ya nda njô bôt a sili nye na:

¹⁶ Ô bili jé va? Beza be ne wo bebiaé va, asu ya faʼa wo soñe va, asu ya faʼa soñe jôé yôp, a ba wo étabaʼa akôm été?

¹⁷ Ajô te Nti a ye sôʼôsane wo, a mba môt, a ye dutu wo mbom,

¹⁸ a wua wo ô ke wo biʼiti ane ébuma mfaʼa si é bili beta mefôla: nne wo ye wu wé, e wé a bevagoñ ba ve wo duma, ve be too jôm ôsame ya nda masa wôé.

¹⁹ Ma ye titane wo ô kôlô ésaé jôé, a vaa wo été jôé.

²⁰ Môs ôte, ma ye loone mbo ésaé wom, Eliakim, e mone Ilkiya.

²¹ Ma ye jalé nye alôʼô dôé a ve nye ngu a asese dôé, ma ye kalane ngule jôé e mo mé. A ye bo ésaa asu bôte be too Yérusalém, a asu nda bôte Yuda.

²² Ma ye beté édibaʼa ya nda David étule jé yôp, a ye yooé, a teke môt a ye bo nguleya dip. A ye dip, ve teke môt a ye bo nguleya yooé.

²³ Ma ye nyiñeli nye vôm a yeme ane sen a a ye bo éto njôane ya duma asu nda bôt ésaa wé.

²⁴ Etôtoʼo ése ya nda ésaa ja ye tyebe be nye, mintyaé a minkpwangbwa biôm mebelan ya nda bi ne tyôtyoé, ataté mekop a kui minkaʼa mevale mese.

²⁵ Môs ôte, nalé Nti a ne ngul ése a jô, éyoñe te e sen é ne ñyemetan e vôm a ne afip, ja ye téé, é buʼi a ku, a mbeʼe é nga beʼe wo ye tyamban, amu Nti a kobôya.