EZAYI 21 - Bible en langue Bulu

Babilôn a zu ku

¹ Mbañete ô ne ntilane na: Nkôte si ya mañ; avalʼane beôlendé ba tyiʼilane Négéb nalé ate nye nsiñ a so nkôte si ya si é ne ékowoñ:

² angônda jam a litibaneya be ma. Njoñôlô a joñôlô, ntyame ki a tyam: Betek, a Elam! Bômaʼan a bita a Beméde! Ma mane mebune mé mese, nalé Nti a jô.

³ Ajô te ma wôʼôtane mbia mintaé angeteñe dam. Mintaé mi lateya ma, avalʼane minga, éyoñ a kôʼôlô mie: ésôbôk ja bo me na me bo te wôk, a mfôʼôban wo bo me na me bo te yen.

⁴ Nleme wom ô jañeya fé, a woñ ô biya ma; évôvoé ya mamengôʼé me nga kômbô é kôñelaneya angôndô mfaʼa wom.

⁵ Ba kôme tawôlô, bemombô ba mombô, ba di ba nyu, tebaʼane betetele, mia bivet! Wokaʼane bibene bienane mbon.

⁶ Amu avale di nde Nti a kôbôya ma na; kelek a telé mmombô na a kat e jam a ye yen.

⁷ Nge a yene vagoñ a tii e bikabela bibaé, mbete ékabela a bete éjakase yôp, mbete ékabela a bete e kamel yôp, a ntoo ve tuʼa tabe ntyel, a a tabeʼe ntyele biyoñe bibaé!

⁸ Nde nyô a fombô a nga yôtane na: a monti, me tele e vôme ma mombô ngume môs , a me tele e vôme ma baʼale ngum alu.

⁹ E jame da zu nde di: Môt a bete vagoñ a ne ntiñetane bikabela bibaé. Nde a nga kobô a jô na: A kuya Babilôn a kuya, a biveʼelaʼa ya bezambe bé be kuya si bifuse bifus.

¹⁰ A bôte yʼayoñe dam, mbe be nga tyaʼaban ane fôn afube dam été, e jam me nga wôk e be Nti ya minsamba mewosan, Zambe yʼIsraél, nde le me kateya mia.

Nkulane mejô wo wosane Duma a Arabi

¹¹ Ayaa da tôñe Duma Ba yôtane ma e Séyir na: a mmombô, alu e nʼaya? A mmombô, alu e nʼaya?

¹² Mmombô nye na: tyé ja zu, alu fe da zu. Nge mia kômbô sili jam, silaʼan: kôñelaʼan mi zu.

¹³ Ayaa da tôñe Arabi. Mia ye bômbô e mefane yʼArabi a mia minsamba be beʼe mimbaé ya Dedañ!

¹⁴ Zaʼa veane bôte ba wôʼô évé mendim; e bôte be too Téma ba ke ôsu ya bôte ba tup be bili belet.

¹⁵ Amu ba tub ôsu ya minkpwaté mekôn, ôsu ya nsoé nkpwaté mekôn, ôsu ya élaé é kolô. Osu minjuʼu ya bita.

¹⁶ Amu avale di nde Nti a kobôya ma na: a liʼiya mbu wua, éfunan ane mimbu ya besaé moné, wôna duma ese ya Kédar da ye man.

¹⁷ Mebukaʼa ya biwôlô bewua bilaé, mbe be ne bone be Kédar, ma ye bo ve tyôtyoé, amu Nti, Zambe yʼIsraél, a kobôya.