EZAYI 18 - Bible en langue Bulu

Nti a wosan Etiôpi

¹ Ngoʼo si, e vôme mefabe ma duñ e asôé ya Etiôpi yat!

² Wo wo lôme minlôman e mañe yôp, a lôme fe besitima bikôbe bilé e mendime yôp. A mia minlôman mi nʼavô, kelan, e bʼayoñe bôt e ne meyap a nyôl ékôkon, e be bôt be nʼangôndô ane be téban, ayoñe bôt e nʼéwôlô a da koʼo jôm ése, ayoñe bôte si jap é bili beta bʼasôé,

³ Mia, e bôte bese be too e si nyô, mia mi too e si nyô, mia ye fombô e nyungu a tele minkôle yôp, mia ye vôʼôlô éyoñe toñ ja ye jô.

⁴ Amu avale di nde Nti a kobôya ma na: me nji fôʼôsan, ve me lôô éyoñe me too vôme wom, aval ane ayôñe vian éyoñe jôp da faé aval ane ndutuu yʼélok, éyoñ ayôñe ya nkôane bidi e né.

⁵ Eyoñ éyoñe ya nkôane bidi é kpwaneya, éyoñ afube ndik e maneya kpwaé sam, éyoñe sam é ntoo bisanté bibuma, a bibuma bi maneya tôlôbô, éyoñe te ñhe ba, tyiʼi bifaʼalé, akaé a mintyaé mi ne teke volô jôm.

⁶ Ba liʼi biôme bite bise asu anone ya beta minkô da bi biôm, a asu betite ya fé; Anon da bi biôm da ye tabe e mimbime miabe yôp a ésep, a betite bese ya fé ki a ôyôn.

⁷ melu mete mimvean mia ye veban e be Nti ya minsamba mewosan mi soʼo e mo mʼayoñe bôt e nʼayap a nyôl ékôkon e mo me bôt be nʼangôndô nté be téban, e mo mʼayoñe bôt e nʼéwôlô a da koʼo jôm ése, di si jap é bili beta bʼasôé. Ba ye zuu mimveane mite e vôme jôé Nti ya minsamba mewosan e too, e nkôle Siône yôp.