EZAYI 16 - Bible en langue Bulu

Môab a kobô Yérusalém

¹ Lômane njô bôte ya si éte mone ntômba, ataté Séla éyoñ wo lôte nkôte si, a ke mfaʼa nkôle ngone ya Sioñ.

² E minsaé yʼôsôé Arnon, bengone ya Môab ba ye bo ane anone da tup, be titaʼane de e mumbaʼa map.

³ Ba jô na: Boʼone ékôan, nyoñane ngume ntyiʼan: boʼo nsisiñe wôé na ô bo ane alu, soléʼé e ba be nga titan, te ba kulan e ba be nga tup!

⁴ Kañeseʼe na bôte ya Môab ba jeñe vôme ya sobô be tabe be wo! Boʼo mfaʼa wop asoé asu nyô a sa be. Eyoñ ékpweʼele ja ye man a étibelaʼa ja ye kui asuʼu, éyoñe môta nsa a ye bo momo

⁵ éyoñe te ñhe, amu ô ne mbamba môt, éto njôan é ne ngu a ja tabe ja ye boban asu mvoñe bôte David. A ye tabe éto njôan ane ntyiʼi mejô a bôô évevé ajô nya ntyiʼane mejô a zôsôô .

⁶ Bi nga wôʼôtane mebune me Môab, mebun ma dañe nné, ñyenan émien anen wé a mebune mé.

⁷ Ajô te Môab a yône Môab, môt ase a yôn; mia kobô menyiñ ajô Kir Arés a ntoo si si, mi ntoo nteʼan ne bôlôt.

⁸ Amu mefane ya Hesboñ me nga mane bobelan, bivete ya meyoñ bi maneya baʼé minkuʼu mindiʼi ya Sibma, mmie mi mbe mi kelek a kui Yazer, mmie mi mbe mi faʼa e li a li nkôte si; mintyaé mié mi mbe mi yaék a lôte mañ.

⁹ Ajô te ma ye yône afube mindiʼi ya Sibma avale Yazer a Eléalé, ma ye nyuu wo e miliʼi mam, amu ñyône bita ô jimbiya bidi biôé a nkôane bidi wôé.

¹⁰ Mevak a mefôn bi jañeya e afube bilé bia wume bibuma; bia momo e mefube mindik, mevak maa bo ki fe! Nkolé bibuma bi ndiʼi woon a nji fe miate woon e minkaʼa été; me boya na ayenga mevak e man.

¹¹ Ajô te miñya mia tyibelan mʼabum été ane nsañe mvet ajô Môab, avale te fe nleme wom ajô Kir Arés.

¹² Môabe le a zu, atek é biya nye éto yʼékôndôʼô yôp. a kuiya vôme wé anʼétyi asu ya yeʼelan vʼa se nguleya bi éyalan.

¹³ Nkobô Nti a kobôya aso ayap ajô Môab ñwô le.

¹⁴ Eyoñe ji Nti a jô mejô mana na: dene mimbu mila (ane mimbu môt ba yaʼane nye), duma ya Môab da ye bo jame yʼébiasé, akôsa bo a bili abui bôt, mebukaʼa ma ye dañe bo tyôtyoé, abim e ne teke mfi.