EZAYI 15 - Bible en langue Bulu

Nti a wosane Môab

¹ Nkulane mejô ô too Môabe ngame yat alu be nga sa tison Ar-Môab nde tison éte é nga man. A alu be nga sa tisone Kir-Môab nde je fe é nga man.

² Bôte ya Dibôn be beteya e vôm anʼétyi na be yôn. E Nébô a e Médeba, Môab a yi. Minlô mise mi ntoo mintui, zel ése ki ntyiʼan.

³ Be beʼe minkuta e minjoñ; e mendile yôp a e mevôm mevôm, môt ase a yôn a kuli miliʼi mis.

⁴ Hesboñ a Eléalé ba yôn, metyiñe mab ma wôʼé a kui Yahat, ajô te bôte mewosane ya Môab ba bete tyiñe ñyôn, woñ ô ne be e minlem été.

⁵ Nleme wom wo yôn ajô Môab, bekee mimbile ba tup a kui Sôar, a a kui Eglat Selisiya; bôt ba bete nkôle Lukit be yônôk, ba yône du ya njuk ô kuiya, e zene ja ke Ôrônayim;

⁶ amu mendime ya Nimrim me veleya, amu bilok bi maneya kôt, ôbut ô maneya diʼiban, a bilok bi ntoo momo.

⁷ Ajô te ba toʼé jôm é liʼiya be a beʼe bikaʼé biap ôtôñe bone bilé yat.

⁸ Amu du da bômane minné ya Môab; miñyône mié mia wôʼé a kui Eglayim, miñyône mié mia wôʼé a kui Bir Elim.

⁹ Mendime ya tisone Dimon me ne njalan a metyi, a ma ye lôme mimfefé bidim mi mam e Dimon: ngbwengbwem ja ye wosane befam awu ya Môab, a wosane fe mebukaʼa ya si jé.