EZAYI 14 - Bible en langue Bulu

Israél a beta tebe

¹ Nti a ye ko Yakob éngôngo, a ye beta tob Israél nalé a ye beta tooé be e si jap; mintabe mia ye zu koone be, nde ba ye fulan e nda bôte Yakob.

² Meyoñ me bôt ma ye nyoñ Israél a kee nye e si jé, e si Nti été, Israél a ye nyoñe be; ane bebo bisaé, befam a binga, a ye bi ba be nga bili nye nkôm minkôm, a a ye jôô ba be nga tibili nye.

Nkuane njô bôte ya Babilôn

³ E môse Nti a ye ve wo awoʼon, e mvuse minjuk a bindeʼelaʼa, e mvus éto ôlo é nga bete wo bitu,

⁴ éyoñe te wo ye tobe mejô ma wosane njô bôte ya Babilôn mana na: jia! Ntibili bôt a nji fe bo nga? A étibelaʼa fe é kômeya mane nga?

⁵ Nti a buʼuya keʼe mbia be bôt, nkasa bekpweʼele bôte bevok.

⁶ Nyô a mbe a bôme bôt ayoʼo dé été; a minkasa te kʼawoʼon, nyô a mbe a jôô meyoñ me bôt ayaa dé été; ba tôñesane nye éyoñe ji éngôngole momo.

⁷ Si ése é bili awoʼon a évôvoé; bôt ba yia bia ya mefôn.

⁸ Jaʼane besipré, a besédre ya Libañ fe ba vak, amu ajô dôé na: nté ane ô nga ku, bebaʼé bilé be nji beta bete bia nyô.

⁹ Vôme ya miñwuan a ngamelan asu ya batane nsoone wôé; a vele miñwuan ôyo amu wo, nalé fe biwôlô bi bôt; a bo na bejô bôte ya meyoñ mese be kôlô bito minjôane biabe yôp.

¹⁰ Bese ba kobô a jô wo na: wo fe ô nji bi ngu ane bia! Wo fe ô ntoo ane bia!

¹¹ Mebune môé me wuabaneya e vôme ya miñwuan, memvete môé me kobôʼô. wo bômbô e minsoñe yôp, a minsoñ mi ne mfinga wôé.

¹² Jia! O kômeya ku ô soʼo yôp, a ôteté wo faé, a mone ya melendé me tyé! O bibaneya e si, wo ndañe meyoñ !

¹³ O mbe ô jôʼôk e nleme wôé été na: ma ye bet e yôp, ma ye telé éto njôane jam ateté Zambe yôp. Ma ye tabe e nkô, e vôme bezambe be wôʼô sulan, mfaʼa akuʼu yʼakôé.

¹⁴ Ma ye bet abôbône minkut, ma ye bo ane Nyô a Dañ Ôyabe Yôp.

¹⁵ Ve ô wuabaneya e vôme ya miñwuan, e vôm a dañ édok ébé si.

¹⁶ Ba ba yene wo ba toé wo mise mabe nyô, ba tuʼa fombô wo be jôʼô na: ye môt a nga tiʼitane si a kpwé bijôé ye nye nyô?

¹⁷ Nyô a nga bo si nyô bilik, bitison ve si si, a bo mimbôʼô na mi bo te bulan e menda map?

¹⁸ Ya! Bejô bôte bese ya meyoñ , be bôô ôyo a duma ese, môt ase e soñe jé.

¹⁹ Ve wo, ô wuabaneya soñe jôé ôyap, avalʼane ntyaé élé ô nʼangôndô, avalʼane mimbim mi bôt be nga wôé, a nkpwaté mekôn be nga wua e mekoʼo yʼébé yôp, avalʼane mbim ba tibi a mebo.

²⁰ Mia be be mia ye bo te fulan afube mesoñe da amu ô nga jiane si jôé, amu ô nga wôé bôte bôé. Mvoñe bebo abé ja ye bo te beta totebane jôé nnôm éto.

²¹ Kômesaʼane wôé bon amu abé ya beésa bap! Be boʼo te beta kôlô si asu ya nyoñe si a jalé je a mewosan.

²² Ma ye ke be ngame yat nalé Nti ya minsamba mewosan a jô; ma ye vaa jôé a mebukaʼa ya Babilôn, bôte ba bialé be nye a mvoñe bôte jé, nalé Nti a jô.

²³ Ma ye bo Babilôn élobé a vôme bemvep ba tabe, a ma ye vose nye a évoʼo ya ntyaman, nalé Nti ya minsamba mewosan a jô.

Nti a ne Asiri ngame yat

²⁴ Nti ya minsamba mewosan a kaneya ngana a jôʼô na: jame me bili nkômbane ya bo da ye boban, jame me tyiʼiya da ye tôéban.

²⁵ Ma ye buʼu mon Asirieñ e si jam ébien été ma ye tibi nye a mebo e minkôle miame yôp; ébôñeté jé ja ye kôlô be be, a e mvabe jé ja ye kôlô bitule biabe yôp.

²⁶ Ntyiʼane wom asu si ése ñwô le. Nsamane wo wom e meyoñ mese ñwô le.

²⁷ Nti ya nsamba mewosan a nyoñeya ntyiʼane wu, za a ye tyame wô? Wo wé ô ne nsaman: za a ye bulane wô mvus?

Nti a ne Befilisteñ e ngame yat

²⁸ Mbu njô bôt Akaz a nga wu, ayaa dina e nga koban:

²⁹ te vak a si Befilisteñ ése na ntum ô mbe ô bômô wo ô buʼiya! Amu akpwe da ye so e mvoñe nyo, a éfaʼalé jé ja ye bo dragoñ a yele.

³⁰ Eyoñe te mintôle mi bone minzôzoé mia ye bo ngule ya di, nalé fe bingôngole bi bôt bia ye yene vôme ya tabe mvoʼé; ve ma ye bo mvoñe bôte jôé na é wu a zaé, a mebukaʼa ya bôte bôé ma ye wôéban.

³¹ Yiik, a mbé ! Yônôk, a tison! Boʼo atek, a si Befilisteñ ése. Amu ôtita wo so akôé, teke môt éziñ a kôlô minsamba ya nsiñe wôé.

³² Ba ye yalane minlômane yʼayoñe te aya? Na Nti a nga telé Sioñ, a na bingôngole ya bôte bé bia yene vôme ya sobô été.