EZAYI 13 - Bible en langue Bulu

Minkulane mejô asu meyoñe bikuu Nti a yaa Babilôn

¹ Nkulane mejô Ezayi, e mon Amôs, a nga yen ajô Babilôn.

² Telaʼane nlinga e nsoé beta nkôle yôp, betaʼane tyiñe yôp e be be. Febane wo, nde ba ye tulane mimbé benya bôtô

³ me maneya ve ba be nʼémbam mebendé, me maneya fe loone mimbene miam, asu ya tôé ayaa dam, e ba ba vaʼa e nda ndañane wom:

⁴ éduñe jama bôt e beta minkôle yôp, éfunan ane bizuʼu bi bôt; éduñe jama bijôé ya meyoñ me bôt me maneya sulan; Nti ya minsamba mewosan a ke a fombô nkane bita ô ne nkômesane ya wosan.

⁵ Ba so e si é nʼôyap, e vôme yôb da suʼu: Nti a bikpwelé yʼayaa dé; ba ye soo mintaé e be si nyôna ése.

⁶ Yônan amu môse Nti ô ntoo bebé; wo zu ane ébitane Nyô a ne ngulʼése.

⁷ Ajô te nde mo mese ma bili atek, a ateʼe nlem da bi môt ase.

⁸ Be bibaneya a woñ; minkumetan a mintaé bi biya be; ba ke ba nyimekan ane vôme minga a kôʼôlô mie. Ba fombane mis a woñ ôse. Mesu map me ntoo ane nkabaʼa nduan.

⁹ Môse Nti le wo zu: môse njet, ôlun a mbia ayaa, e môse wo ye wua si nyô e beta ôlun été, a jiane bebo abé yʼété.

¹⁰ Amu ateté ya yôb a minsamba miap bia ye bo te beta faé éfufube jap. Jôb da ye bo dibi éyoñ da tôô, nalé fe ngon ja ye bo te beta faé éfufube jé.

¹¹ Ma ye ve si nyô fonos amu abé dé, a bebo abé amu bikobe biap; ma ye man ésase ya bôt be ne mebun, a ma ye sili nkobô ébiasé betibili bôt e si.

¹² Ma ye bo bôt njemban a dañe or a dañ abeñ; ma ye bo na môta binam a jemban a dañe akoʼo é nʼédima ba loon ôfir.

¹³ Ajô te ma ye bulekane yôp, a si ja ye suʼuban e vôm é beme, amu ayaa Nti ya minsamba mewosan, a môse ya beta ayaa wé.

¹⁴ Eyoñe te ñhe môt ase a ye kôñelan mfaʼa bôte bé be né, a môt ase a ye tup a ke e si jé; avalʼane nkoʼo wo mate, avalʼane mone mbam biyem a ne teke môt a kôane nye.

¹⁵ Ba ye jii ba bese ba tôbane be mekoñ a ba bese ba ye bili nkpwaté mekôn wo ye wôé be.

¹⁶ Benyañebéé bap ba ye wuabane si e mise map me lôô. Ba ye sa menda map a jap e binga bap.

¹⁷ Me nyô, ma tindi beméde be wosane be, mbe be ne te simesan ajô argent, nalé fe or te jô be jam

¹⁸ bilaé biap bia ye wua bisoé bi bôte si, nalé fe te éngôngol e be bone ba bialé; dise dap da ye bo njet mfaʼa bon .

¹⁹ Nalé Babilôn, étôtoʼo jôme bijôé ya meyoñ , abeñe jôme mebune bekaldééñ, a ye bo ane Sodom a Gômor, mbe Zambe a nga tyam.

²⁰ A ye bo bilik bôt te fe tabe été nnôm éto. Mone Arabe a ye bo te lame nda éndelé jé été, nalé fe bebaʼale mintômba ba ye bo te beta tebe été. étabaʼa mimbam biyem.

²¹ Ve bôte ya nkôte si ba ye jeñ étabaʼa jab été; mekuñ ma ye jaé e menda mé, a bʼéngutu ba jaé été, nalé fe na bikela ya fé bia ye ke bia tyelé si yʼété.

²² Mekamenyañ ma ye bi étabaʼa e beta menda ya tison, a bemvak e abeñe menda bejô bôt été. Eyoñe Babilôn é mbeme kui alu da te ke bebe nye yôp.