EZAYI 11 - Bible en langue Bulu

Mfefé David

¹ Ntyaé wo ye faa e nnôm ékume Izayi. A éfaʼalé ya mindi mié ja ye wume bibuma.

² Nsisime Zambe wo ye tabe be nye: nsisime fek a mbamba mfasane mam, wu wo ve ngu a mbôndane fek, nsisim wo ve ñyeman a nkoone Zambe woñ.

³ A ye yene mvaé ya ko Zambe woñ. A ye bo te tyiʼi mejô vʼa ñyenane ya mis, nge tyiʼi mam vʼa ñwôʼane ya melo.

⁴ Vʼa ye tyiʼi minzôzoé mejô zôsôô , a tyiʼi bingôngole bi bôte ya si nyô mejô ne tiññ. Mejô yʼanyu dé ma ye bibi si nyô aval ane mbeñ, a mvebe ya biyaé bié wo ye jiane mbo abé .

⁵ Zôsôô a ye bo kandé ya mevele mʼabume mé, a nyeʼane ki asese ya angeteñe dé.

Mfefé Paradis

⁶ Akamenyañ a mone ntômba ba ye tabe vôme wua. Ze ki a mon ékela ba ye bômbô vôme wua. Mone nyak, étoñe ngbwengbwem a tit é nʼavoñ ba ye di vôme wua, ôyôme monafam wo ye yaʼale be.

⁷ Ngale nyak a Urs ba ye di vôme wua, e bone babe ki ba ye bômbô vôme wua. Ngbwengbwem a nyak ba ye kendé bilok.

⁸ Nyañebéé a ye vôé e mbil akpwe, a mon a tyiya mebé a ye some wo wé e mbile viet.

⁹ Te kʼabé ngʼéndaman bia ye boban e nkôle wom ôse ô nʼétyi, amu si ja ye jaé ne lut a ñyemane Zambe, avale fʼane mendim ma jalé mañ.

Minkôm mia bulan

¹⁰ A ye bo môs ôte na ndi Izayi wo ye kebelan ane nyungu ya meyoñ , meyoñ ma ye jeñe je, étôtok ja ye jaé e vôm é tele.

¹¹ A ye bo môs ôte na, Nti a ye same wo éyoñe baa na a kôté mebukaʼa ya bôte bé, e ma me liʼiya Asiri, Ejipte, Patrôs, Elam, Sinéar a Amat, nalé fe ma me liʼiya e bikôte bi mañ.

¹² A ye bete nyungu asu meyoñ me bôt. A ye kôane bôte yʼIsraél be nga mane mialan, a sulane bôte ya Yuda be nga mane tetan, be soʼo mekuʼu menyine ya si nyô.

¹³ Mesengan mʼEfrayim ma ye man, a besiñe be Yuda ba ye bo momo. Efrayim a ye bo te beta sengane Yuda, a Yuda a ye bo te beta wosan Efrayim.

¹⁴ Mfaʼa jôb da dim, bese ba ye kubu e minkôle befilisteñ, mfaʼa jôb da tôô, ba ye ke sa meyoñe ya nkôté si biôm. Edom a Môab ba ye ke éjôé jabe si, avale te fe mfaʼa bone bʼAmon.

¹⁵ Nti a ye kôlô mbate mañe yʼEjipte. A ye samese wo wé e beta ôsôé yôp. A ye kandé wô mimbale zamgbwa a ngule ya mvebe wé. A ye bo na e bôte bé be wulu été a mebo.

¹⁶ Njoñ wo ye lôt été asu mebukaʼa ya bôte bé ma ye liʼi Asiri, aval e nga kui bʼIsraél éyoñ a nga kôlô si yʼEjipte.