EZAYI 10 - Bible en langue Bulu

E bôt ba soñ ayaa Nti

¹ Ngoʼo bôt ba telé mbia metiñ, a be too avôle ya tili metiñ ma soo mbia azoé.

² E aba mejô, ba telé bone be bôte fefe, a vaa minzôzoé ya bôte bam e mam ma yiane be. E jôme jab ba bi é ne minkus a ba sa bobenyui;

³ mia ye bo aya e môse melep , éyoñe nkulu a ye so ôyap? Mia ye tub e be za a bi mvolan? Mia ye ke naan akume denane vé?

⁴ Jame ya bo é ne ve na, mia ye vitibi ézezañe ya mimbôk, nge ku si ézezañe ya bewu. Vʼakôsa bo mam mete mese, ayaa dé e nji kôlô, a wo wé ô ngenane nsaman.

Zambe a belan Asiri

⁵ Ngoʼo Asiri, mbeñ yʼayaa dam, mbeñe te, e wo wom été, ayaa dame le,

⁶ Ma lôme wô ô wosan ayoñ e nʼabé, ma bete wô avô ô ke wosan e bôt ba tyaʼa ma nlem , be sa be biôm a bo fe be jôme ya nsa, a tibi be a mebo ane mbotoʼo ya zene yôp.

⁷ Ve nye ki a nji wôʼô jame te nalé, nleme wé ô nji tyiʼi jame te avale te, amu ôsimesane wé ô ne na a mane jian, a na a mane abui meyoñ .

⁸ Ya! A jô na: ye bivete biam bi nji bo bejô bôt bise?

⁹ Ye Kalnô a nji suʼulan ane Karkémis, nge Amat ane Arpad, nge Samari ane Damas?

¹⁰ Nge wo wom ô nga kui e be bijôé bia kañe bengunemelan a biveʼela biab bi ne nkpwelan bi mbe bi dañe bi ya Yérusalém a Samari,

¹¹ ye ma ye bo te bo Yérusalém a bengunemelane bé e jam me nga bo Samari a bengunemelane bé?

¹² Vʼéyoñe Nti a ye man ésaé jʼése, e nkôle Sioñ yôb a e Yérusalém été, ma ye zu, nalé Emien a jô, a wosan asimesane mebune njô bôte yʼAsiri, a wosane fe mfaane ya mise bivéé wé.

¹³ Amu a jôya émiene na: me maneya bo amu ngule ya wo wom a amu feʼe jam, amu me ne ntyetyeñ, me maneya tyame minné ya meyoñ , a sa akume dab be nga mane naan. Ane mben, me maneya sili ba bese be nga too bito bi njôane si ne vulut.

¹⁴ Wo wom ô kuiya vôm akum ya meyoñ e né ane dumbaʼa. Me nyoñeya si ése ane ba toʼé metyi kub ja te ben, a teke môt a nga kute mefap nge kui nsoñ, nge kobô anʼônon.

¹⁵ Ye ôvôn wo seʼe ôbien a dañe môt émien a belane wô? Ye zik ja nene ébien a dañe môt a bo je ésaé? Aval ane nge ôlé ñwô wo bo na môt a fôʼô wô a fôʼôsan, aval ane nge ntum ñwô wo bete môt nyʼa nji bo élé yôp!

¹⁶ Ajô te Nti, Zambe ya minsamba mewosan, a ye lôme nkôt e be bôt be nʼavem, a étôtoʼo jé si, ésiʼi ja ye yôñ ane nduan.

¹⁷ Efufube yʼIsraél ja ye veñesane nduan. A éñwé a nʼEtyi a ye veñesane nkabaʼa nduan wo ye diʼi, a mine biyo a minsiniʼi môse wuwua.

¹⁸ A ye diʼi étôtoʼo yʼafane dé a bilé bia wume afub dé a ye diʼi de nyôl a nsisim , jame te da ye funane nkôkon wo duk .

¹⁹ Mebukaʼa bilé yʼafane dé ma ye bo étua tyôtyoé, mone mongô a too ngule ya lañe me.

Mebukaʼa yʼIsraél

²⁰ A ye bo môs ôte na: mebukaʼa yʼIsraél a ma ya nda Yakob me nga fam awu, ma ye bo te beta yeʼebe be nyô a bôme me: ma ye foʼo yeʼebe be Nti, e be nyô yʼIsraél a nʼEtyi.

²¹ Mebukaʼa ma ye bulan, mebukaʼa ya nda Yakob, e be Zambe a ne ngul.

²² A Israél toʼo na e bôte bôé be mbe abui ane nseleʼe ya mañ, mebukaʼa étam mme ma ye bulan: atiñe ya jañ e tyiiya teke selan, a zôsôô ntyiʼane mejô a ye ke ôsu,

²³ a Nti, Zambe ya minsamba mewosan, a ye tôé njañane te e si ése.

Melebe mefe asu Asiri

²⁴ Ajô te, avale di nde Nti, Zambe ya minsamba mewosan, a jô na: a ayoñe bôte dam e too Sioñ, te ko Asiri a bôme wo a mbeñe woñ, a a beteʼe nkasa wé yôbe na a bibi wo avalʼEjipte é nga bo,

²⁵ amu a liʼiya vʼabe melu étam, wôna ayaa dam da ye mane be wo, vʼôlune wom wo ye kôñelan mfaʼa ya njañane wop.

²⁶ Nti ya minsamba mewosan a ye bibi nye nkasa nyôl, aval a nga bôme Madian akôm Oréb a a ye bete nkasa wé e mañe yôp, aval a nga bo Ejipte.

²⁷ A ye bo môs ôte na: mbeʼe wé wo ye sendé wo étuu, a ébôñeté jé ja ye sendé e tyiñe jé, ébôñeté ja ye ve afoʼo éto.

Kpwatôla a kui ane feleves

²⁸ A kuiya bebé e yat, a nga tulane Migron, a ye baʼale mimbeʼe mié e Mikmas,

²⁹ be nga dañe fandane minkô: bia ye bômbô meyôa e Yéba! Rama a fôʼôban, Gibéa Saül a tup.

³⁰ Yônôk, a ngone ya Galim! Vôʼôlôʼô a Layisa!

³¹ Anatot a nʼéngôngo! Madména a tup. E bôt be too Gébim ba mate,

³² a môse te ôbien éyoñ a tebe e Nob, a sise nkôle ya ngone Sioñ, a wo wé, nkôle Yérusalém.

³³ Tame yene Nti, Zambe ya minsamba mewosan, a wua mintyaé si a ngul ése: ba be ne meyab abui be bibaneya, ba be ne beta minkôñ be silibaneya si

³⁴ ba ku étyé si, a mintute yʼafane si, a éjijine Libañ é nga suʼulane si.