ESTHE 8 - Bible en langue Bulu

¹ Môs ôte ôbien, njô bôt Asuérus a nga ve Esthe nga njô bôt akum Aman ese, nsiñe Beyude. Wôna Esthe a nga kate fe njô bôte na Mardôsé a ne évuvumane jé. Nde njô bôt a nga loone nye;

² a nga vaa élondo njô bôt a nga bulane nyoñe be Aman a ve je Mardôsé. Esthe a nga ve fe nye nguleya belan akum Aman.

Atiñe njô bôt da mvamane Beyude

³ Esthe a nga beta kobô njô bôt. A nga ku nye mebo a yeʼelane nye miliʼi mis na a tyam mbia minsimesan Amane ya mvoñe bôte Agag a nga bi asu Beyude.

⁴ Nde njô bôt a nga same Esthe ntume or wé, nye ve kôlô si

⁵ a jô nye na: A njô bôt, nge wo yene nalé mvaé a na nalé a ne zôsôô , nge wo liti ma mvame jôé a nyeʼane wôé, tyame ntilan bekalate Aman, e mone Amedata ya mvoñe bôt Agag a nga tili asu mfimane Beyude be too mebôta me si mese ya si wo jôô je.

⁶ Me ne nguleya jibi yen ane avale bidime te da ku ayoñe bôte dame yôb aya, me ne nguleya tabe aya éyoñ ba jian ayoñe dame mamien?

⁷ Njô bôt Asuérus a nga jô Esthe nga njô bôt a Mardôsé na: Vôʼôlôʼô, me nga tyelé Amane yôb amu a nga jeñ ényiñe Beyude, a me veya wo akume dé ese, a Esthe!

⁸ Ve me se nguleya tyam abendé e ne nsanane jôé dam atoʼo dam, e too fʼété. Ve da, miabebien mi ne nguleya tili bekalate ba liti mam me ne mvaé asu Beyude, mi sane be jôé dam a futi atoʼo été a élondo jam.

⁹ Môs ôte ôbien, ngone lale ba loone Sivan é too melu mewôm mebaé a mela, be nga bañete betili bekalate be njô bôt. Be nga tili bekalate avale Mardôsé a nga liti be a lôme be e be Beyude e be bijiane bi njô bôt, e be bengovina a biwôlô bebo bisaé ya mebôta me si mewôm mebaé a zamgbwa ya si Asuérus a nga jôô, ataté Inde a kui Etiôpi. Be mbe ntilan e minkobô a mevale mintilan mi bôt be too e mebôta me si mevale meva, a e nkobô a avale ntilan Beyude be bili.

¹⁰ Be nga sane bekalate e jôé njô bôt Asuérus a futi atoʼo été a élondo jé. Bewulu bikabela be bete bikabela bia so mebemba me njô bôt mbe be nga nyoñ ésaé ya miase be.

¹¹ Ntilan ô mbe été ô mbe na njô bôt a ve Beyude be too e bitisone bise yʼéjôé jé nguleya sulan asu ya kaman ényiñe jap. A nga ve be nguleya tyiʼi tyiñ a wôé, éngôngole momo, e abôta ese ya si a e ayoñ ese, bôte be bili mengal be ne zu té be ntañete. Be mbe nguleya wôé binga a bone bab a sa akume dap.

¹² Jame di e nga yiane bobane vôm ase éjôé Asuérus été ngume môs , ngon awôm a lale ba loone Adar é too melu awôm a mela.

¹³ Kalate be nga nyoñ a nga yiane bi ngul ya atiñ e abôta si ese, a bôte bese be nga yiane yeme nye, nalé Beyude ba ye tabe nkômane ya kune bebien e be besiñe bab môs ô ne ntelan.

¹⁴ Nné ane njô bôt a nga ve be ngul, bekatefoé be nga ke avô be bete bikabela ya mebemba me njô bôte yôp. Atiñe te e nga katebane fe e nlô tisone Suz.

¹⁵ Ane Mardôsé a nga kôlô nda njô bôt, a beʼe ngômesane njô bôt é too éfumulu a ôbe évele, a beʼe fe alôʼô léñ e too évele, ékate or é too fe nye nlô. Tisone Suz é mbe é tiʼitaʼan a nkutane mefas a ayenga mevak.

¹⁶ Beyude be nga tôtan a mevak, mefôn a ndañan.

¹⁷ E vôm ase atiñe njô bôt e nga kui, abôta si, tison, avak e nga bi Beyude a be nga bo bikôane bidi a mebôk . Abui bôte ya meyoñe mevok e nga kañese bo Beyude amu woñe be nga ko be.