ESTHE 5 - Bible en langue Bulu

Esthe a ke be njô bôt

¹ Eyoñe môse lale ô nga kui, Esthe a nga jaé mengômesane mé me nga njô bôt, a ke tebe nseñe ya nda njô bôt été, zôsôô a menda me njô bôt. Njô bôt a mbe e nda jé été, a too éto njôane jé, zôsôô a anyiine mbé .

² Eyoñe a nga yen Esthe nga njô bôt a tele nseñ, a nga liti nye mvam a same nye ntume or a nga bili. Esthe a nga zu bebé a nambe wô sok.

³ Njô bôt a nga sili nye na: Jé ja lôt a Esthe nga njô bôt? Wo kômbô jé? Me ne nkômesane ya ve wo jaʼan éfase ya si ma jôô je.

⁴ Esthe a nga yalane nye na: Nge njô bôt a kañese a zu den ba Aman be di bidi ma te kôme nye.

⁵ Njô bôt a nga jô na: Be jiʼa ke loon Aman asu ya kañese nkômbane Esthe. Nde bebaane be nga ke e dina Esthe a nga kôm.

⁶ Amané ndian, njô bôt a nga jô Esthe na: Wo kômbô sili ma jé? Me ne nkômesane ya jalé minkômbane miôé a ve wo jaʼan éfase ya si ma jôô je.

⁷ Esthe nye na: Jam ma kômbô sili wo nga?

⁸ Ya! Nge njô bôt a yeneya me mvaé, a nge ô ne nkômesane ya kañese minkômbane miam, ma yi mia Aman mi beta zu e ndiane ma ye kôme mia a akiti. Eyoñe te ma ye kate wo jam e né.

Aman a kôm élé ya tyelé Mardôsé

⁹ Môs ôte, Aman a nga kôlô be nga njô bôt nleme njalane mevak a mefôn. Ve mbé ya nda njô bôt, a nga yene na Mardôsé a nji tebe tetele nge bo mone jam éziñ a liti na a semé nye; ajô te a nga dañe yaa nye.

¹⁰ Ve a nga bi nlem a bulane nda jé. A nga loone bemvôé bé a minga wé.

¹¹ A nga tametan abui akume dé asu dap, abui bone dé a duma njô bôt a nga jalé nye éyoñ a nga zalé nye a dañe biwôlô bebo bisaé bise.

¹² Aman a nga jô fe na: Ma étam Esthe nga njô bôt a te bañete na me ke liti njô bôt e ndian a te kôme den. Me ne fe nloon akiti bia njô bôt.

¹³ Ve mam mete mese me nji ve me avak nté ôse me lôô Mardôsé, mone Beyude, a boʼésaé anyiine ya nda njô bôt.

¹⁴ Nde Zérék minga wé a bemvôé bé bese be nga jô nye na: Ke be teléʼé élé é too nkôñ yôb méta mewôm mebaé a zamgbwa; wôna a akiti mametyé, ô kate njô bôte na be tyelé Mardôsé yôp. Eyoñe te mia njô bôt mia ye ke ndian ô too mevak. Ane Aman a nga yene jame te mvaé, nde be nga telé élé ba tyelé bôte yôp.