ESTHE 4 - Bible en langue Bulu

Mardôsé a sili Esthe na a volô

¹ Eyoñe Mardôsé a nga yem jam ese da lôtan, a nga nyabe mengômesane mé, ve jaé nkuta a woban asub a bômane ki tison, a kele a yône ñyône mintaé.

² Eyoñ a nga kui ôsu ya nda njô bôt, a nga tebe, amu môt éziñ a nji bi ngule ya nyiin été a beʼe mengômesane meyep.

³ E mebôta mese yʼéjôé, vôm atiñe njô bôt e nga kateban, Beyude be mbe ve miñyôn: be nga tyi bidi, be nga kuli miliʼi mis a yôn; abui ya be be e nga jaé mengômesane meyep a bômbô asub été.

⁴ Bengo be binga be mbe be saane Esthe a bebaʼale bé be nga zu kate nye jam be nga yen, a a nga dañe ko woñ. A nga lôme Mardôsé mengômesane na a vaa ma meyep, ve a nga ben.

⁵ Nde Esthe a nga loone Atak, wua ya bebaʼale njô bôt a nga ve na be saane nye, a lôme nye a sili Mardôsé jam da lôt a amu jé a bo avale te.

⁶ Nalé ate Atak a nga ke be Mardôsé e beta nseñ ya tison, ñwô ô mbe mbé yôb anyiine nda njô bôt.

⁷ Nde Mardôsé a nga kate nye mam ma lôtan; a nga dañe kobô nye ajô moné yʼAman a nga tiñeti na a ye futi e nkobe njô bôt nge ba wôé Beyude bese.

⁸ A nga ve nye ntilan yʼatiñ e nga katebane Suz asu ya jiane Beyude. Mardôsé a nga jô Atak na a kate Esthe jam e né a liti fe nye ntilane te; Atak a yeʼelane fe Esthe na a ke be njô bôt a sili nkoon éngôngole wé a suñe fe ajô yʼayoñe dé.

⁹ Atak a nga zu kate Esthe nkobô Mardôsé.

¹⁰ Esthe a nga kobô Atak a kate Mardôsé na:

¹¹ Bebo bisaé be njô bôte bese a bôte ya mebôta mʼéjôé ba yem atiñe na: Môt ase, fam nge minga, a nyiine be njô bôt mfaʼa nseñe yʼété te na a bili nloon, ba ye wôé nye avalʼ atiñ e né be bôte bese; môt a ne nyiñ ve nyô njô bôt a same ntume or wé. Ve ma me nji bi nloone ya ke be njô bôt den a ntoo melu mewôm mela.

¹² Nde be nga kate Mardôsé éyalan Esthe.

¹³ Ane Mardôsé a nga lôme bôt be kate Esthe na: Te buni be womien été na ô ne ngule ya fam étam mfaʼa ya jam da yange Beyude, amu na ô too e nda njô bôt.

¹⁴ Nge wo bene bo jam éziñ éyoñe ji, mvolan wo ye so Beyude vôme mfe a ba ye nyiiban. Ve wo wo ye wu a nda bôte jôé ja ye man. Ve za a yem, ndôʼôtô na ô nga tobane bo nga njô bôt amu avale été di.

¹⁵ Ane Esthe a nga lôme Mardôsé foé nyôna na:

¹⁶ Kele sulane Beyude bese be too Suz, mi bômbô zaé amu ajô dam. Te diane bidi nge nyu jôm éziñ tañe môse mila a melu mela. Avale te fe bebo bisaé be binga bam a mamien bia ye bo. Eyoñe te ma ye ke be njô bôt akôsa bo na nalé a wosan atiñ , a nge ma yiane wu, ma ye wu!

¹⁷ Nde Mardôsé a nga ke a bo avale Esthe a nga bendé nye.