ESTHE 3 - Bible en langue Bulu

Mejô e zañe Aman ba Mardôsé

¹ Eyoñe mam mete me maneya, njô bôt Asuérus a nga nene Aman, mone Amedata ya Agag, a nga bete nye nkôñ a telé nye éto ja dañ ôyabe yôb a lôte bi bivete bise ba be be be mbe nsamba wua.

² Biwôlô bebo bisaé bise ya nda njô bôt bi mbe bi kute meboñ a kumbu si asu Aman, amu njô bôt a nga bendé nalé. Ve Mardôsé étam a nga bene bo nalé.

³ Bebo bisaé bevok be nga sili nye na amu jé a nji ve abendé njô bôte mewôk.

⁴ Môs ôse be nga baʼalane kobô jam be nga yen, ve Mardôsé teke wôʼô be. A mbe a yalaʼane be na: Me ne mone Beyude. Nde be nga somane nye be Aman, be yangeʼe yen nge a ye kee mboone te ôsu.

⁵ Aman a nga yene foʼo na Mardôsé a bene kute meboñ a kumbu asu dé, ndʼa nga dañe wôʼôlun.

⁶ Be nga kate fe nye na Mardôsé a ne mone Beyude. Ajô te a nga yene de mone jame na a kun émien ve be Mardôsé étam, nde a nga jeñe zene ya mane jiane bôte be Mardôsé e ne na, Beyude bese be nga too éjôé njô bôt Asuérus si.

⁷ Metataʼa me mbu awôm a baa Asuérus a nga jôô, ngon ôsu ba loone Nisañ, mme Aman a nga bo asimba a mekôʼô ba loone bepurim, mfaʼa ya yemelane môs a ngon bia yian asu mefeʼe ya minsôñane mié. Ane asimba e nga liti ngon awôm a baa ba loon Adar.

Aman a kômesane jiane Beyude

⁸ Ane Aman a nga jô njô bôt Asuérus na: Ayoñ éziñ e ne va, bôte yʼété be ne mmialan e mebôta mese yʼéjôé jôé. Ba nyiñ nkandan a bôte bevok, ba tôñ mboone mame wob ñwô ô nji funane wu ya ayoñ afe, a be nji ve metiñ me njô bôte mewôk. O nji yiane jôʼé bôte bete ne mieññ.

⁹ Nge wo yene nalé mvaé, kañeseʼe ve abendé, e too ntilan ya mane jiane be. Wôna ma ye ve betalañ be argent toyini awôm e mo bebo bisaé yʼéjôé na be ke futi be nda énaan akume njô bôt.

¹⁰ Ane njô bôt a nga vaa élondo ônyu vié a kee je Aman, e mone Amedata ya Agag, nsiñe Beyude.

¹¹ Njô bôt a nga jô Aman na: Baʼaleʼe argent wôé, mfaʼa ya ayoñe bôte di, ma kee fe wo de, boʼo de jam wo kômbô!

¹² Be nga loone betili bekalate be njô bôt e ngon ôsu é too melu awôm a mela; be nga tili bekalate aval Aman a nga liti a lôme be e be bijiane bi njô bôt, e be bengovina ya mebôta mesi a e be bivete ya meyoñ . Bekalate bete be mbe ntilan e mevale mintilan mese a e minkobô mise ba belane mie éjôé. Be nga sane be jôé njô bôt Asuérus a futi atok a élondo njô bôt.

¹³ Minlôman mi nga kee bekalate bete abôta si ese ya éjôé. Abendé ya bekalate bete e mbe na: Be tyik a wôé Beyude bese éngôngole momo: bisoé a minnôm, binga a bongô, a sa akume dap. Njiane te wo yiane bobane ngume môs e ne na ngon awôm a baa ba loon Adar é too melu awôm a mela.

¹⁴ Abôta éjôé ése, kalate be nga nyoñ a nga yiane bi ngule yʼatiñ, a bôte bese be nga yiane yeme jame te, ane môt ase a ne tabe nkômane ya bo jam e ne ntyiʼan e môs ô ne ntelan.

¹⁵ Bekatefoé be nga ke avô avale njô bôt a nga bendé, wôna ntyiʼan ô nga kateban e beta tisone Suz. Njô bôt ba Aman be nga too si a nyu, ve tisone Suz é mbe feʼe ne vema.