ESTHE 1 - Bible en langue Bulu

Njô bôt Asuérus a bo dina

¹ Jame di e nga boban melu njô bôt Asuérus a nga jôô bifuse bi si mewôm mebaé a zamgbwa, ataté Inde a kui Etiôpi.

² Melu mete, njô bôt Asuérus a nga too nda njô bôt é mbe e Suz, nlô tison.

³ Mbu lale ya njôane wé, ñwô a nga bo beta dina asu bivete bié, bebo bisaé bé bese, nkane bita Perse a wu ya Médi, bingok a bengovina ya mekuʼu me si;

⁴ a nga liti be bitôtoʼo bi biôm ya nté nkôñ wé, a duma ya ngul éjôé jé. Dina ate a nga tabe melu ntet a mewôme muam.

⁵ Eyoñe melu mete me maneya, njô bôt a nga beta bo dina mfe e minseñe ya nda njô bôt tañe melu zamgbwa asu bôte mevale mese be nga too tisone Suz, ataté bôbenen a kui bôbetok.

⁶ Bindelé bi too ndubane léñ, sut, évele mevule me ntômba, bi nga tii e minkol mi too éfumulu, angôô nsolan e bilondo bi argent a mekône me marbre. Binoñe yʼaba nda , mboone or a argent bi nga tele si bi too ñyañane porfir, marbre, nakre a évindi marbre.

⁷ Be nga nyuu bôte bilam e bilaé bi or mevale meval été. Woon a mbe bifôfôt a be nga ve nye bôt éneʼene.

⁸ Ajô te môt ase a mbe nguleya nyu aval a kômbô, amu njô bôt a nga bendé bebo bisaé bese ya nda jé na be jalé minkômbane mi bôte bé a nga bañete.

⁹ Wôna e nda njô bôt été, Vasti, nga njô bôt Asuérus, nye fe a nga bo dina asu binga.

Vasti a sub éto nga njô bôt amu ébiasé

¹⁰ E môse zamgbwale, valé njô bôt Asuérus a too njalan a mevak amu woon a nga nyu, a nga loone bekalane bilaé zamgbwa be mbe be saane nye môé na: Mewuman, Bizta, Arbôna, Bigta, Abagta, Zétar a Karkas

¹¹ a bendé be na be zuu nye Vasti, nga njô bôt, a beʼe ékate njô bôt. Asuérus a nga kômbô liti biwôlô bebo bisaé bié a e bôte bevoʼo be mbe valé, abim avé nga njô bôt a mbe abeñ, amu a mbe foʼo étua abeñ.

¹² Bekalan élaé be nga kalan abendé njô bôt e be ngal, vʼa nga bene zu. Ajô te njô bôt a nga dañe yôñ a beta ayaa.

¹³ Nde a nga kee bebôndé mefeʼe bé ésok, amu beyeme mame ya metiñ a mebelan mbe be mbe be kôme mam me njô bôt éyoñ ése.

¹⁴ Bebôndé mefek be nga dañe njô bôte bebé be mbe môé na: Karkena, Kétar, Admata, Tarsis, Mévés, Marsena a Memukan, biwôlô bebo bisaé bi njô bôt zamgbwale ya Perse a Médi bi mbie bia dañ nkôñ yôp éjôé ése.

¹⁵ Njô bôt a nga jô be na: Ma, njô bôt, ma te lôme bekalan élaé bame na be kate Vasti nga njô bôt abendé dam, ve a nji bo de mewôk. Avalʼane metiñ ma jô, za melebe ma yiane nye?

¹⁶ Ajô te Memukan a nga jô njô bôt a biwôlô bebo bisaé na: Vasti, nga njô bôt a te foʼo bo mbia jam, sa ve mfaʼa njô bôt étam, ve nalé fe mfaʼa biwôlô bebo bisaé bé, jaʼane fe mfaʼa befam bese be too mebôta me si ya éjôé ése.

¹⁷ Bebela a ne na, e binga bese ba ye nyoñe foé ya mboone nga njô bôt wu ba ye taté fe na ba biasé e ngule beyôme bap. Ba ye kale bebien be jôʼô na: Njô bôt a nga bendé na be zuu nye Vasti nga njô bôt, ve a nga bene zu!

¹⁸ Den émiene nyô, beyale biwôlô bebo bisaé ya Perse a Médi ba ye wôʼôtane mboone nga njô bôt a ve bebiene nguleya fetane beyôme bap, a ébiasé binga ja ye dutu ayaa befam.

¹⁹ Ajô te nge njô bôt a yene nalé mvaé, ô mialane foé ntyiʼane wo ve Vasti mvinda nnôm éto ya bo te beta tebe njô bôte mis, a wo ve minga mfe a yian éto nga njô bôt. Ntyiʼane te wo yiane nyiin e metiñe ya Perse a Médi été mme môt a se nguleya tyam.

²⁰ Eyoñ ba ye yem ntyiʼane wôé e mevôm mese ya beta ndam éjôé wôé nyô, minga ase a ye bo nnôme wé mewôk, jaʼane nnôm a nʼéwôlô nge mone môt.

²¹ Njô bôt ba biwôlô bebo bisaé bé be nga yen ôsimesane te mvaé, ajô te njô bôt a nga tôñ e feʼe Memukan.

²² Nde a nga lôme bekalate e mebôta me si mese, avalʼane ntilan a nkobô bôt ba nyiñ été bi né. Bekalate bete be nga yemete fam ése na é boʼo njôô ya nda bôte jé, é boʼo fe na bôt be kobô nkobô be nga bialane wô.