ESDRAS 9 - Bible en langue Bulu

Ajô meluk e zañe Beyude a Bikuu

¹ Eyoñe mam mete me maneya, minlô mi bôt mi nga zu be ma a jô na: Ayoñ Israél, betuni a bone be Lévi be nji ke kandan a meyoñ ya mesi be too, nge kandan a mbia mboone mame wop: nyô bôte ya Kanaan, nyô Beétieñ, Beférézieñ, Beyébuzieñ, bone bʼAmon, bone be Môab, bôte yʼEjipte a Beamorééñ.

² Amu be nga luʼu bengone bap asu dabe bebien a asu bobefame bap, a bundane mvoñ é ne étyi a bôte ya mesi mete; minlô mi bôt a beyeme metiñ mbe be nga taté bo beta mbia jam ate.

³ Eyoñ me nga wôʼô ajô te, me nga nyabe mengômesane mam a alôʼô dam, me nga té ésil a tabe si nyôl é too ma nteʼan.

⁴ Eyoñe te bôte bese be nga nyeñeban amu mejô me Zambe Israél, be nga sulan vôm me nga too amu mbia mboon besoo minkôm be nga bo, a ma me nga too si, nyôle nteʼan akekui éyoñ mimveane ya mamengôʼé.

⁵ Eyoñe ba ve mveane ya mamengôʼé, me nga kôlô si ôsame viam été, ngômesan jam a alôʼô dam nyaban; me nga kute meboñe si a same mo e be Nti Zambe wom,

⁶ a jô na: A Zambe wom, me nji fe yem jôm me né, a ma wôʼôson ya bete asu dam e be wo, a Zambe wom! Amu minkobane miañgan mi maneya bulan a yandan e minlô miañgane yôp, a mekua mañgan me vuseya a kui yôp.

⁷ Ataté melu bʼésaa bangan, mekua mañgan me neneya a kui e môse wu, a ô nga kalane bia e mo besiñe bangan, e nkpwaté mekôn, e minkôm, e nsa, ôsone ya asu dangan ane môse ya den amu minkobane miañgan.

⁸ Vʼakôsa bo nalé, éyoñ ébiene ji, Nti, e Zambe wongan, a ndôme mvamane bia a nsuane bôt bʼéziñ be soʼo minkôm, a mveane bia vôm bi ne tabe e vôme wé a ne étyi, nalé ate Zambe wongan a ye kui bia mis a ve bia ôbe ényiñ ézezañe ya éto ôlo jañgan.

⁹ Amu bi ne alo, ve Zambe wongan a nji ke jôʼé bia ôlo viangan été. A litiya bia mvame jé asu be bejô bôte ya Perse, mfaʼa ya bulane ve bia ényiñ, nalé bia ye beta telé ndaa e Zambe wongan, a beta kôm mevôm me nga mane tyamban, a ve fe bia vôm ya woʼon e Yuda a e Yérusalém.

¹⁰ Eyoñe ji, a Zambe wongan, bia ye ñhe beta jô aya mvus éte?

¹¹ Amu bi nga liʼi mebendé môé ô nga ve bia a anyu bebo bisaé bôé bekulu mejô na: Si mia nyiin a nyoñe je ane ngap é ne si é ne ndaman amu mimboon meyoñ me too été ma bo, amu be jaléya je a mam me ne angôndô ataté li a kui li.

¹² Ajô te te veane bengone benan e be bobefame bap, a te luʼane bengone bap asu bobefame benan; mia ye bo te nyamete mvoʼé jap nge mvaé jap; éyoñe te mia ye bo ngu a di bidi bia yô si éte, a mia ye liʼi je é bo ngap asu bone benan.

¹³ Mvuse ya mbia be mam mese me nga kui e be bia amu mbia mimboone miañgan a amu mekua mañgan, akôsa bo ô nji ke ve bia melep me too abime da yian a minkobane miañgan, a Zambe wongan, a amu ô baʼaleya besoo minkôm ba,

¹⁴ ye bia ye beta taté na bia tyam mebendé môé. A ke ôsu a bo bilat a meyoñ me ne mbia jôm ana? Yʼayaa dôé da ye bo te yôñe be bia a kui vôm ya mane jiane bia teke mebukaʼa nge ba ba fam awu?

¹⁵ A Nti, e Zambe Israél, ô ne zôsôô , amu bi ne den ve mebukaʼa . Bia bana bi ne ôsu viôé a mekua mañgan, a teke môt a ne tebe asu dôé amu ajô di!