ESDRAS 8 - Bible en langue Bulu

Bôt ba be Esdras be nga ke

¹ Mina mi ne minlô mi bôte ya menda bʼésaa bap, nalé fe bindan ya ba be nga ke nsamba wom a kôlô Babilôn melu Artakzersés njô bôt a nga jôô.

² Bone be Finéas: Gerson; bone bʼItamar: Daniel; bone be David: Atuk;

³ bone be Sekania, bone be Paréôs: Zakari ba be befam ntet a mewôm metan be nga lañeban;

⁴ bone be Payat-Môab: Eljoénayi mone Zeraya ba be befam mintete mimbaé;

⁵ bone be Sekania mone Mayaziél ba be befam mintete mila.

⁶ Bone bʼAdin: Ebéd mone Yônatan ba be befam mewôm metan.

⁷ Bone bʼElam: Ezayi mon Atalia ba be befam mewôm zamgbwa;

⁸ bone be Sefatia: Zebadia mone Mikaél ba be befam mewôm muam;

⁹ bone be Yôab, Abdias mone Yehiel, ba be befam mintete mibaé awôm daa a muam.

¹⁰ Bone be Selômit; mone Yôsifia ba be befam ntet a mewôm mesaman;

¹¹ bone be Bebayi: Zakari mone Bebayi ba be befam mewôm mebaé a muam;

¹² bone bʼAzgad: Yôanañ mone Akatañ ba be befam ntet a awôme da;

¹³ bone bʼAdonikam, ba ba suʼulan môé map mme ma: Elifélét, Yeyél a Semaéya ba be befam mewôm mesaman;

¹⁴ bone be Bignayi: Utayi a Zabud, ba be befam mewôme zamgbwa.

¹⁵ Me nga sulane be bebé ôsôé wo lôt mfaʼa ya Ayava, a bi nga vule minkane valé tañe melu mela. Me nga dañe fombô bôt a betuni. Ve me nji yen wua ya bone be Lévi été.

¹⁶ Eyoñe te me nga loone minlô: Eliézer, Ariél, Semaéya, Elnatañ, Natan, Zakari a Mesulam; beyeʼele bôt be mbe môé na: Yôyarib a Elnatañ.

¹⁷ Nde me nga ve be mebendé asu évet, jôé na Iddô, é nga too Kasifia, a me nga futi jam ba yiane jô nye a bobenyañe bé be ne Benétinieñ, be too Kasifia e menyu mab été ane be ne soo bia bebaʼa bebo bisaé asu ndaa e Zambe wongan.

¹⁸ A amu mbamba wo Zambe wongan ô mbe e be bia, nde be nga soo bia Kérébia, mfefeʼe môt ya bone be Mali, mone Lévi, mone Israél, ba be bone bé a bobenyañ tañe bôt awôm a muam;

¹⁹ Asabia ba Ezayi ya bone be Mérari, bobenyañ a bone bé, bese bôte mewôm mebaé;

²⁰ nalé fe bôte ya Benétinieñ mbe David a minlô mi bôt be nga telé na be volô bone be Lévi ésaé, bôte mintete mibaé a mewôm mebaé be loʼone be a môé map.

²¹ Vôm ate, bebé ôsôé Ayava, me nga yôtan mbômbane zaé ya suu biabebiene si asu Zambe wongan, bi sili nye dulu mevak asu dangan, bone bangan a akume dam ése.

²² Me nga ye wôʼô ôson ya sili njô bôt beta nsamba a bebebe bikabela mfaʼa ya baʼale bia asu besiñ nté ôse bia ye wulu, amu bi nga jô njô bôte na: Wo Zambe wongan ô ne amu mvoʼé ya ba bese ba jeñe nye, ve ngule jé a ayaa dé bia zu e be ba bese ba liʼi nye.

²³ Amu ajô te nde bi nga tyi bidi a yeʼelane Zambe, a nga yalane bia.

²⁴ Eyoñe te nje me nga telé bôt awôm a bebaé be too minlô betuni e fefel: Kérébia, Asabia a awôme bôte ya bobenyañe bap.

²⁵ Me nga veʼe kop asu dap: argent, or a biôme njô bôt, bebôndé mefeʼe bé, minlô mi bôte mié a ba bese yʼIsraél be nga too nalé be nga ve asu ndaa e Zambe wongan.

²⁶ Nde me nga kalane be e mo: betalañ be argent mintete misaman a mewôm metan; biôm bi ne mboon a argent tañe betalañ ntet a betalañ be or ntet.

²⁷ Bilaé bi or mewôm mebaé a zamgbwa, tañe bedarik toyini jia a bisua bibaé bi too mboon a mvot é ne abeñ, é too abeñ ane or.

²⁸ Nde me nga jô be na: Mi ne ntelan mfaʼa Nti, biôme bi bi ne ntelan étyi, nalé fe na argent nyô a or nyô bi ne mvean ane nlem wo kômbô asu Nti e Zambe bʼésoo benan.

²⁹ Mombaʼan a tuʼa baʼale nye akekui éyoñ mia ye veʼe nye ôsu minlô betuni a bone be Lévi, a ôsu minlô menda me bôt yʼIsraél e Yérusalém, e bitune menda ya nda Nti.

³⁰ Ajô te betuni a bone be Lévi be nga nyoñe argent, or a biôm bi nga veʼeban na be kee bie e Yérusalém, e ndaa Zambe wongan été.

³¹ Ane bi nga kôlô ôsôé Ayava na bi ke e Yérusalém, ngon ôsu é too melu awôm a mebaé. Wo Zambe wongan ô mbe be bia a ô nga baʼale bia mewosane besiñ a melam mese bi nga tôbane me e zene zen .

³² Eyoñ bi kuiya Yérusalém, bi nga woʼon tañe melu mela.

³³ Môse nyini ñwô bi nga veʼe argent, or a biôm bivok e nda Zambe wongan été, e mo me Mérémôt, mone Uri ntuni , ba be Eléazar mone Finéas be mbe valé; bone be Lévi be mbe fe valé: Yôzabad mone Yasua a Nôadia mone Binuyi,

³⁴ éyoñe biôm bise bi maneya lañeban a veʼeban, nde be nga tili tañe bekili ése.

³⁵ Ane bôt be nga so minkôm be nga ve e Zambe Israél mimvean mi ne ngum: beyôme benyak awôm a bebaé asu Israél ase, beyôme mintômba mewôm ébu a besaman, bone mintômba mewôm zamgbwa a zamgbwa a beyôme bikela awôm a bebaé asu abé . Bise bi nga vebane ngum e be Nti.

³⁶ Nde be nga kalan mebendé me njô bôt e be bivete bié a e be bejôô ya Efrate yat, be nga volô bôt a volô fe nda Zambe.