ESDRAS 7 - Bible en langue Bulu

Atiñ da vôlô Esdras

¹ Eyoñe mam mete me lôteya, melu Artakzersés njô bôte ya Perse a nga jôô, Esdras mone Azaria, mone Ilkiya,

² mone Salum, mone Sadok, mone Ayitub,

³ mone Amaria, mone Azaria, mone Merayôt,

⁴ mone Zaraya, mone Uzi, mone Buki,

⁵ mone Abisua, mone Finéas, mone Eléazar, mone Aron, ntuni nnen.

⁶ Esdras ate a nga kôlô Babilôn; a mbe ntili bekalate, njô a nga ve émien e metiñ me Môze mme Nti, e Zambe Israél, a nga ve. A amu wo Nti, e Zambe wé, ô mbe be nye, njô bôt a nga ve nye jôm ése a nga sili.

⁷ Bone bʼIsraél bʼéziñ, betuni a bone be Lévi, beyia bia, bebaʼale mimbé a Benétinieñ be nga ke fe e Yérusalém, mbu zamgbwale Artakzersés a nga jôô.

⁸ Esdras a nga kui Yérusalém e ngone tane ya mbu zamgbwale njô bôt a nga jôô.

⁹ A nga telé nkôlan ya Babilôn e ngon ôsu é too alu da, a a nga kui Yérusalém e ngone tane é too alu da, mbamba wo Zambe ô mbe be nye.

¹⁰ Amu Esdras a nga ve nleme wé na a yéʼé a bo metiñ me Nti a yeʼele Israél memvinda a minjôan.

¹¹ Mejô ya kalate njô bôt Artakzersés a nga ve Esdras ntuni a ntili bekalate na a tili avalʼane Nti Emien a nga bendé a tili me ajô Israél na.

¹² Ma, Artakzersés njô bôte bejô bôt, ma tili Esdras ntuni a ntili bekalate, nyô a veya émien e metiñ me Zambe ya yôp, akk.

¹³ Me veya abendé na be suu mia be bôte bevoʼo ya Israél, betuni a bone be Lévi, mbe be kômesaneya na mia be be mia ke e Yérusalém.

¹⁴ Ajô te yeme na njô bôt a bebôndé mefeʼe bé zamgbwa ba lôme wo ô ke jome Yuda a Yérusalém avalʼane atiñe Zambe wôé é ne wo wo é né.

¹⁵ A na ô beʼe argent a or, mbie njô bôt a bebôndé mefeʼe bé be maneya ve Zambe Israél, a mbamba nkômbane wop a nye a bili étabaʼa jé e Yérusalém,

¹⁶ argent a or ase wo ye koone bie éfase si ése ya Babilôn, a mimvean ane nlem wo kômbô, mmie bôt a betuni ba ye bo asu ndaa e Zambe wop é ne Yérusalém.

¹⁷ Ajô te wo ye kuse beyôm benyak, beyôm mintômba, bone mintômba, mimveane miap mi ne avut a mi mi ne binyunyui, wo ye kuse bie a moné ate, a wo ye ve bie ataʼa metunaʼa Zambe wônane yôp nde é ne Yérusalém.

¹⁸ Jam ése mia ye yene mvaé ya bo, womien a bobenyoñ, a abime argent a or bia buk, mia ye bo de avalʼane nkômbane Zambe wônan ô né.

¹⁹ Kele bôé biôm be kalaneya wo asu ésaé ya ndaa e Zambe wôé, asu Zambe ya Yérusalém.

²⁰ Wo ye nyoñ abime biôm da yian e nda ba naan akume njô bôt asu bisaé bivoʼo wo ye bo asu ndaa e Zambe wôé.

²¹ A ma, njô bôt Artakzersés, ma bendé bebaʼale akum bese yʼEfrate yate na be ve Esdras ntuni a ntili bekalate a veya émien asu metiñ me Zambe ya yôp, jôm ése a ye sili mia teke selan:

²² betalañ be argent ntet, minkoé mi nlisi ntet, minlôñga mi woon mi ne anen ntet a nku teke alañé.

²³ Jam ése Zambe ya yôp a bendéya da yiane boban avale é jôbaneya asu ndaa e Zambe ya yôp, ndemben ayaa dé da ye bo te zu éjôé njô bôt a e be bone bé.

²⁴ Ajô te bia bo mia ayemé na: Teke mvôla, toya nge duan ba ye sili betuni, bone be Lévi, beyia bia, bebaʼale mimbé, Benétinieñ a bebo bisaé ya nda Zambe éte.

²⁵ Wôna wo, Esdras, avalʼane feʼe Zambe ô bili é né, teléʼé betyiʼi mejô a beyeme metiñ, mbe be tyiʼi bôte bese mejô Efrate yat, ba bese ba yeme metiñ me Zambe wôé a yeʼele me e be ba be ne te yeme me.

²⁶ E môt ase a ye bo te baʼale atiñe Zambe wôé a atiñe njô bôt avale da yian, ba ye ve nye melep , ma ya awu, nge mekaban, nge nluman aleman, nge nkeane mimbôk.

²⁷ Nti a boʼo ébotan, e Zambe bʼésaa bangan, nyô a nga ve njô bôte nleme ya ve nda Nti é ne Yérusalém abim étôtoʼo di.

²⁸ A nye ate fe a jaléya ma mvame jé asu njô bôt, bebôndé mefeʼe bé, a asu bebo bisaé bé bese be ne ngu! Amu ngu e wo Nti a ne Zambe wom ô nga ve ma, nde me nga sulan minlô mi bôte yʼIsraéle na bia be be bi ke.