ESDRAS 6 - Bible en langue Bulu

Darius a tili kalate na melôñ ya nda Zambe me ke ôsu Mveane Zambe nda

¹ Ane njô bôte Darius a nga ve ngule na be ke e nda ba baʼale bekalate a naane mintilan e Babilôn a bo minjeñan.

² Eyoñe te be nga koone mvulekane kalate e tison Ameta, éfas éjôé ya Médi, jam ya simesan é mbe ntilan été avale di:

³ mbu ôsu Sirus njô bôt a nga jôô, ñwô njô bôt Sirus a nga bendé na: Nda éte be beta lôñe je é bo vôm ba tyiʼi mimvean, a ja yiane bi mimbôkaʼa mi ne ngu. Ja ye bo ôyabe yôp menyiʼi me mo mewôm mesaman; ndam ki menyiʼi me mo mewôm mesaman.

⁴ Minnoñ mekoʼo me ne mbaan a nnoñ mimfefé bilé wua. Nda njô bôt nje ja ye yaʼane tañ ése.

⁵ Jam afe na ba ye bulan biôm bi ne mboon a or, a argent, mbie Nébukatnétzar a nga vaa e nda Zambe ya Yérusalém a kee bie e Babilôn, ba ye bulane bie e nda Zambe ya Yérusalém e vôm bi nga too, a bôé bie e nda Zambe.

⁶ Eyoñe ji a Tatnayi njôô ya Efrate yat, Sétar-Bôznayi a mia beébe bebo bisaé babe ya Afarsak mi too Efrate yat, tebaʼan e fefe.

⁷ Jôkaʼan bisaé ya nda Zambe éte bi ke ôsu; môt a jôô Beyude baa be bemvendé bap be lôñe je e vôme wé.

⁸ Abendé ma ve da fombô jam mia yiane bo bemvendé ya Beyude bete ane be ne beta lôñe nda Zambe éte: mia ye nyoñe tañ ja yiane ésaé akume njô bôt été, akume te é soʼo betoya ya Efrate yat, a yaʼane je bôte bete éyoñ ja yian, nalé ésaé ja ye bo te tebe.

⁹ Jôm ja yian asu mimveane Zambe ya yôp mi ne ngum nje ji: bitoñ beyôm benyak, beyôm mintômba a bone mintômba, avut, nku, woon a mbon; mia ye ve je betuni ya Yérusalém môs ane môs , avale bebien ba ye sili, a teke éngbwemese éziñ,

¹⁰ nalé ba ye ve Zambe ya yôp mimvean mi ne mbamba menyum a yeʼelan asu njô bôt a bone bé.

¹¹ Abendé ma ve asu nyô ase a ye tyam nkobô wu nde di: ba ye vaa éfus élé ya nda jé a tyelé nye été a wôé nye; ba ye bo nda jé avise mbuan wo nyum abé .

¹² Wôna Zambe, Nyô a boya na jôé dé é tabe e vôme nyô, a ye kpwé njô bôt a bôte bese ba ye same wo wop a tyam njôane wu, éyoñe ba tyame nda Zambe é ne Yérusalém! Ma Darius, me veya abendé te. Ba yiane bo de mewôk teke selan.

¹³ Eyoñe te Tatnayi njôô ya Efrate yat, Sétar-Bôznayi a beébe bebo bisaé bap be nga bo ane abendé njô bôt Darius a nga ve be é mbe teke yañge.

¹⁴ Ajô te bemvendé ya Beyude be nga lôñ, a ésaé é nga wulu be mvoʼé , avalʼane minkulan mejô Agé nkulu mejô a Zakari mone Iddô mi mbe; be nga lôñ a beta kôm avalʼane abendé Zambe Israél é mbe, a avalʼane abendé Sirus, di Darius a di Artakzersés njô bôte ya Perse é mbe.

¹⁵ Nda é nga man e môse lale ya ngon Adar, mbu saman Darius a nga jôô.

¹⁶ Eyoñe te bone bʼIsraél, betuni a bone be Lévi a mebukaʼa me bôt me nga too minkôm, be nga bo abôʼô ya dii nda Zambe éte a mevak.

¹⁷ Asu ndiane nda Zambe, be nga ve beyôm benyak ntet, beyôm mintômba mintet mibaé, bone mintômba mintet minyin; asu nsilane njaman abé ya Israél, ase be nga ve beyôm bikela awôm a bebaé avalʼane tañ meyoñ yʼIsraél é né.

¹⁸ Be nga telé betuni avalʼane minsamba miap mi né a bone be Lévi avale be ne nkaban mfaʼa ya bo ésaé Zambe e Yérusalém, avalʼane é ne ntilan e kalate Môze été.

¹⁹ Ane bôt be nga so minkôm be nga jem abôʼô Pak e ngon ôsu ya mbu é too melu awôm a menyin.

²⁰ Betuni a bone be Lévi be nga tune bebien vôme wua, bese be mbe mfuban; nde be nga wôé éyeme Pak, asu bôte bese be nga so minkôm, asu bobenyañe bap be mbe betuni a asu dap bebien.

²¹ Bone bʼIsraél be nga so minkôm be nga di Pak ba be ba bese be nga kandane mvin ya meyoñ me ne te yeme Zambe a ba be nga zu fulan a be mfaʼa ya jeñe Nti, e Zambe Israél.

²² Nde be nga jem abôʼô belet é ne te mvusan a mevaʼa mese, tañe melu zamgbwa, amu Nti a nga bo na be vak, éyoñ a nga kôñelane nleme njô bôte ya Asiri mfaʼa wop a suʼu be ésaé ya nda Zambe, e Zambe Israél.