ESDRAS 5 - Bible en langue Bulu

Nlôñan nda Zambe wo ke ôsu

¹ Nkulu mejô Agé a nkulu mejô Zakari, mone Iddô, be nga kulu mejô a jôé Zambe Israél e be Beyude be nga too e Yuda a e Yérusalém.

² Eyoñe te Zôrôbabél mone Séaltiél a Yasua mone Yôtsadak be nga kôlô si a beta taté nlôñan nda Zambe ba be bekulu mejô be Zambe ba be be be nga too.

³ Eyoñe te ébien nje Tatnayi njôô ya Efrate yat, Sétar-Bôznayi a beébe bebo bisaé bap be nga zu e be be a kobô be na: Za a nga ve mia ngule ya lôñe nda éte a kôme mimfine mié?

⁴ Nde bi nga yalane be na: Bôte ba lôñe nda nyô be ne môé na beza?

⁵ Ve dise Zambe wop é nga too e be bemvendé ya Beyude. Be nji ke telé mboone bisaé nté be nga yañge na foé é ke e be Darius a ke fe kui éyalan ya kalate a kobô ajô te é soya.

⁶ Kalate Tatnayi njô bôte ya Efrate yat Sétar-Bôznayi a beébe bebo bisaé bap bevoʼo be ne Afarsak Efrate yat, be nga lôme Darius.

⁷ Be nga kate nye foé é too avale di: A njô bôte Darius, mbôlô!

⁸ Njô bôt a tame yeme na bi nga ke éfase éjôé é ne Yuda a kui e ndaa Zambe a ne anen. Ba lôñe je a mekok me ne mbaan; be nga bôé bilé e mimfin; ésaé ja boban a ngômôtô ése a ja wulu fe mvoʼé e mo map été.

⁹ Bi nga sili bemvendé minsili a kobô be na: Za a nga ve mia ngule ya lôñe nda nyô a beta kôme mimfine mi?

¹⁰ Bi nga sili fe be biyôlé biabe na bi lôme wo bie a tili biyôlé minlô mi bôt.

¹¹ Eyalan be nga ve bia nje ji: Bi ne bebo bisaé be Zambe ya yôp a si, a bia beta lôñe nda é nga tame lôñeban den a ntoo mimbu abui mvus; beta njô bôt yʼIsraél a nga lôñe je a mane fe je.

¹² Vʼéyoñ bʼésaa bangan be nga bo Zambe ya yôbe na a wôʼô ôlun, nde a nga kee be e mo me Nébukatnétzar njô bôte ya Babilôn, mone Kaldééñ a tyame nda éte a kee bôt e minkôme Babilôn.

¹³ Ve jame da na mbu ôsu Sirus a nga jôô e Babilôn, Sirus a nga ve abendé na be beta lôñe nda Zambe.

¹⁴ E nda Zambe ya Babilôn été, Sirus a nga vaa fe biôme Nébukatnétzar a nga vaa e nda Zambe ya Yérusalém a kee bie e Babilôn, a nga bo na be kalane bie Sékbatsar, môt émien a nga telé njôô ya Yuda.

¹⁵ Ane a nga jô nye na: Kele biôme bi, a bôé bie e nda Zambe ya Yérusalém, a na nda Zambe é betaʼa lôñeban e vôme wé.

¹⁶ Ane Sékbatsar ate a nga zu a bôé mimbôkaʼa ya nda Zambe e Yérusalém; ataté éyoñe te a kui éyoñe ji, ba lôñe je ve é ngenan te man.

¹⁷ Ajô te éyoñe ji, nge njô bôt a yene nalé mvaé, be tame jeñ e vôm ba baʼale mintilan mi njô bôt e Babilôn a yen nge njô bôte Sirus a nga ve abendé éziñe na be beta lôñe nda Zambe éte e Yérusalém. Mvus éte, njô bôt a tame kalane bia nkômban wé mfaʼa ya ajô di.