ESDRAS 4 - Bible en langue Bulu

Nlôñan nda Zambe wo tebe

¹ Eyoñe besiñ be Yuda a Bényamin be nga wôʼô na bôt be nga ke minkôm be nga lôñe Nti, e Zambe Israél nda ,

² be nga zu e be Zôrôbabél a bivete ya ndabôt a jô be na: Bia be mia bia ye lôñ amu bia fe, avalʼane mia, bia loon e Zambe wônan, bia tyiʼi fe nye biôm ataté éyoñe Esar-Adon njô bôte ya Asiri, nyô a nga zuu bia va.

³ Ve Zôrôbabél, Yasua a minlô mi bôte mivoʼo be nga yalane be na: Saa ke mia a bia bia yiane lôñe Zambe wongan nda : biabebien bia ye lôñ asu Nti, e Zambe Israél, avale Sirus njô bôte ya Perse a nga bendé bia.

⁴ Nde bôte bete be nga ve bôte ya Israél ateʼe nyô: be nga ve be woñ ndemben ba ye bo te fe ngule ya lôñ,

⁵ be nga kuse bôt a moné na be tuʼulan Israél ésaé. Nalé a nga boban nté ôse Sirus njô bôte ya Perse a nga vee, a kui fe éyoñe Darius njô bôte ya Perse a nga jôô.

⁶ Eyoñ Asuérus a nga jôô, atataʼa ya éjôé jé bôte bete be nga tili kalate ésoman ajô bôt be too Yuda a Yérusalém.

⁷ Nalé fe na melu mʼAtakzersés, Bislam, Mitredat, Tabil a beébe bebo bisaé bap bevok, be nga tili Artakzersés njô bôte ya Perse kalate. Kalate ate a nga tiliban a bikanga bi Aramééñ, a too fe nkôñelan nkobô Aramééñ.

⁸ Ane Reyum njôô a Simkayi ntilimam, be nga tili Artakzersés kalate nyô ajô Yérusalém na:

⁹ Reyum njôô, Simkayi ntilimam a beébe bebo bisaé bap bevoʼo bese ba ya Din, Arfarsatak, Tarpél, Afaras, Erék, Babilôn, Suz, Déya, Elam,

¹⁰ a bôte bevoʼo Osnapar a nga kee be minkôm a toé be e tisone Samari a e mevôm mevok Efrate yat, akk.

¹¹ Mejô ya kalate be nga tili Artakzersés njô bôt mme ma: bebo bisaé bôé be too Efrate yat, akk.

¹² Njô bôt a yeme na Beyude be nga kôlô be wo a kui e be bia va Yérusalém be nga lôñe tison ja ben éjôé é too fe nkpwala , be nga beta lôñ mimfin yʼété a beta fe kôm mimbôkaʼa mié.

¹³ Njô bôt a tame ñhe yeme na nge tison éte ja beta lôñeban a nge mimfine mié mia beta kômban, ba ye bo te beta yaʼan nge mvôla, nge toya , nge duan, a na jame te da ye suʼulan abé mfaʼa njô bôt.

¹⁴ Amu bia di nku ya nda njô bôt a é ne te yiane mfaʼa wongane na bi yen ane njô bôt a biaséban: ajô te bia lôme njô bôt mam mana na a yeme me

¹⁵ éyoñe te ba ye jeñ e kalate mam ya simesan été nye bʼésoo be nga lik, wo ye koé a yem e kalate mam ya simesan ate été na tison éte é ne tison ja ben éjôé, nyô ja soo minjuk e be bejô bôt a mebôta me si, a na bôte yʼété be veya bebien e mbia nlô aso ayabe mvus. Amu ajô te nde tison éte é nga tyamban.

¹⁶ Bia kômbô njô bôt a yeme na nge tison éte ja beta lôñeban a nge mimfine mié mia beta kômban, jame te ébien da ye bo na ô sube ngabe si ya jôô Efrate yat.

¹⁷ Eyalan njô bôt a nga lôm nje ji: Ma lôme kalate nyô e be Reyum njôô ya éfase si, e be Simkayi ntilimam a e be beébe bebo bisaé bap bevok be too Samari a mevôm mevok me ne Efrate yat, mbôlané!

¹⁸ Kalate mi nga lôme bia a nga lañebane foʼo ôsu viam.

¹⁹ Me nga bendé na minjeñan mi boban, a be nga koone foʼo na aso ayabe mvus, tison éte é nga bete nlô e be bejô bôt a na bôte yʼété be nga ve bebien nzametan a mbenan éjôé.

²⁰ Biwôlô bejô bôt bi mbe Yérusalém bi nga jôô si ése é ne Efrate yat a bôt be nga yaʼane be memvôla, betoya a duan.

²¹ Ajô te mia yiane ve abendé na bôt bete be telé ésaé ba bo, nalé tison éte ja ye bo te beta lôñeban veñgeveñge ve ngul ja veban é soʼo be ma.

²² Miabebien tabaʼan ntyele ya bi jame te fiañga, amu abé é za nenenen a soo njuk e be bejô bôt.

²³ Nné ane kalate njô bôt Artakzersés a nga lañeban asu be Reyum njôô, Simkayi ntilimam a asu beébe bebo bisaé bap bevok, nde be nga ke Yérusalém avôl avô e be Beyude a telé bisaé biap a ngu a ayoʼo ése.

²⁴ Eyoñe te ésaé ya nda Zambe e Yérusalém é nga tebe; é nga tebe akekui mbu baa Darius njô bôte ya Perse a nga jôô.