ESDRAS 3 - Bible en langue Bulu

Nkôman ataʼa metunaʼa asu mimvean mi ne ngum, mbôan mimbôkaʼa ya nda Zambe

¹ Ngone zamgbwale é nga kui a bone bʼIsraél be nga too e bitisone biap. Nde bôte bese be nga sulan e Yérusalém ane môte wua.

² Ane Yasua mone Yôtsadak a bobenyañe bé betuni, nalé fe Zôrôbabél mone Séaltiél a bobenyañe bé, be nga kôlô si a lôñe ataʼa metunaʼa Zambe yʼIsraél asu mimvean mi ne ngum avalʼane é ne ntilan e kalate metiñe Môze, môta Zambe.

³ Nde be nga beta telé ataʼa metunaʼa te e mbôkaʼa wé yôp, amu be nga ko e bôt be nga koone be valé woñ, ajô te be nga ve Nti mimvean mi ne ngum ataʼa metunaʼa te yôp.

⁴ Be nga jeme fe abôʼô bibem avalʼane é ne ntilan, a be nga ve mimvean mi ne ngum môs ane môs avalʼane tañ ja yiane môs ôse é né.

⁵ Mvuse ya valé, be nga ve fe mimvean mi ne ngum mia veban éyoñ ése, a mimvean mi ne ngum asu metéé me ngon a asu mebôʼô mese a mi ba ve Nti avalʼane nlem wo kômbô.

⁶ Eyoñe môs ôsu ya ngone zamgbwale ô nga kui, be nga taté ve Nti mimvean mi ne ngum. Ve da na valé mimbôkaʼa ya nda Zambe Nti mi ngenan te bôʼôban.

⁷ Ane be nga ve beba mekok a bebo mendile moné; wôna be nga ve bôte ya Sidoñ a Tir bidi, menyu a mbone na be zuu bilé bi Sédre ya Libañ bi wuluʼu e mañe mañ a kui e Yafa, avalʼane Sirus njô bôte ya Perse a nga ve ngu.

⁸ Mbu baa ya nkuan be nga kui e nda Zambe ya Yérusalém, e ngone baa, Zôrôbabél mone Séaltiél, Yasua mone Yôtsadak a bobenyañ bevoʼo bese, betuni a bone be Lévi a ba bese be nga kui e Yérusalém be soʼo minkôm, be nga taté ésaé a ve bone be Lévi be ne mimbu mewôm mebaé a mitan ésaé ya fombô bisaé ya nda Nti ane bia wulu.

⁹ Wôna Yasua ba be bone bé a bobenyañe bé, Kadmiél ba be bone bé be mbe bôte ya Yuda, bone be Enadad ba be bone bap a bone be Lévi bobenyañe bap, bese be nga nyoñe ésaé ya fombô ba be nga bo ésaé ya nda Zambe.

¹⁰ Eyoñe belôñe nda be nga bôé mimbôkaʼa ya nda Zambe a Nti, be nga telé betuni be beʼe mengômesan, be bili fe metoñ, a Belévit bone bʼAsaf be bili biwoé ane ba ye kañe Nti avalʼane David njô bôte yʼIsraél a nga liti.

¹¹ Be nga kañese bia a nkañan a mvean Nti duma be belaʼan mejô mana: Nyeʼane wé mfaʼa Israél ô too nnôm éto. A bôte bese be yôtaʼane beta ñyôtan, be kañe Nti amu be nga bôé mimbôkaʼa ya nda Nti.

¹² Vʼabui ya betuni, bone be Lévi a minlô ya menda me bôt mi ntoo abui mimbu, amu be nga yene ndaa ôsu, be nga yi abui éyoñ be nga bôé mimbôkaʼa ya nda éte mise map me lôô. Ve bôte bevoʼo abui be nga bete metyiñe yôbe ngu a yôtan ñyôtane ya mevak,

¹³ ajô te é mbe ayaé ya kandé ñyôtane mevak a wu miñyôn amu éduñe ñyôtane bôt é mbe é kele ôyap.