ESDRAS 1 - Bible en langue Bulu

Kalate nsuane bôt Sirus a nga tili

¹ Mbu ôsu Sirus njô bôte ya Perse a nga taté jôô, nalé ate ajô Nti a nga jô a anyu Yérémi nkulu mejô da ye tôéban, Nti a nga fôʼô Sirus njô bôte ya Perse nleme ya lôme tyiñ a tili fe kalate éjôé jé ése été na:

² Avale di nde Sirus njô bôte ya Perse a jô na: Nti, Zambe a ne yôp, a veya ma bijôé bise ya si a a veya ma ésaé ya lôñe nye nda e Yérusalém a ne e Yuda.

³ Za ya be mia a ne môte ya e bôte béé? Zambe wé a tabeʼe e be nye a môt ate a ntoo ve bet e Yérusalém a ne e Yuda a lôñe ndaa Nti e Zambe Israél, e Zambe a ne e Yérusalém.

⁴ E vôm ase ba bese be ne mebukaʼa ya bôte bé be too, bôte ya valé ba ye ve be argent, or, akum, mimbam biyem a mimvean ane nlem wo nyeʼe asu nda Zambe é ne e Yérusalém.

⁵ Nde menda me bôte ya Yuda a Bényamin, betuni a bone be Lévi, ba bese Zambe a nga fôʼô minlem, be nga kôlô si na be ke lôñe nda Nti nje é ne Yérusalém.

⁶ Ba bese be nga bômane be be nga ve be mimvolan biôme mevale meva, argent a or, akum a mimbam biyem, biôm bi ne édima, te lañe biôm bise bi nga veban ane nlem wo nyeʼe.

⁷ Njô bôt Sirus a nga bulane fe biôm bise ya nda Nti mbie Nébukatnétzar a nga nyoñ e Yérusalém, a futi bie e ndaa zambe wé.

⁸ Sirus njô bôte ya Perse a nga bo na Mitredat, mbaʼale nkop, a kuli bie atan a kalane bie Sésbatsar, évete ya Yuda.

⁹ Tañe ya biôm bite é mbe avale di: befandé be or mewôm mela, befandé be argent toyini awôm, atyeñ mewôm mela,

¹⁰ bilaé bi argent mewôm mela, fia bilaé bi argent mintet minyin a awôme da, biôm bife toyini jia.

¹¹ Biôm bise bi mbe mboon a or a argent bi mbe toyini étan a mintet minyin. Sésbatsar a nga bo na biôm bite bi ke nsamba bôt be nga too minkôm be nga kôlô Babilôn a ke e Yérusalém.