EKLEZIASTE 8 - Bible en langue Bulu

A ne mvaé ya bo njô bôte mewôk

¹ Za a funane mfefeʼe môt a za a yem atinane ya mam? Fek môt a bili ja bo asu dé na e faé a tyendé fe mimbote yʼasu dé.

² A ne mvaé ya ve njô bôte mewôk éyoñ a kobô amu bi nga kane nye ngana asu Zambe,

³ ajô te te bo avôle ya ke nyʼôyap a te wo yemele e mbia jam été amu a ye bo jam ese a ye yene mvaé.

⁴ Amu nkobô njô bôt ô bili ngu; za a ye jô nye na: Wo bo jé?

⁵ Nyô a baʼale abendé a ye bo te yeme jam éziñ e nʼabé. Nleme mfefek wo yem éyoñ a ntyiʼane mejô.

⁶ Yaa, jam ese é bili éyoñ a ntyiʼane yʼété, ve mbia jam a ne asu môt:

⁷ a ne te yeme jam da ye boban, za a ye liti nye éyoñe jame te da ye kui?

⁸ Môt éziñ a se nguleya jôô mvebʼényiñ a bi wô na ô bo te kôlô; nalé fe na môt éziñ a se nguleya jôô môse yʼawu: njaman ô nji bo e mewosane mete, nalé fe na nkpwala ô nji ve ba ba bo wô zene ya tup.

⁹ Mam mete mese me nga yene me éyoñe me nga wua mise mam mfaʼa mam mese ma boban e jôbe si, éyoñe môt a bili ngule ya bo môte mboʼo abé .

Mevak me ne boban akôsa bo njembane maʼan

¹⁰ Ke me nga yen mbia be bôt be jambeʼe soñ a ke. Bôt be mbe be soʼo vôm a nʼétyi a vuane mboone wop e tison été: momo jam fe le.

¹¹ Nleme ya bôt ô ne njalane ya bo abé amu melebe ya mbia mboon me ne te jiʼa veban.

¹² Ve da akôsa bo na mbo abé a ne bo abé biyoñe ntet a beta fe nyiñ abe melu, me ma yeme na mvaé é ne asu ba ba ko Zambe woñ amu be bili woñ asu dé.

¹³ Ve mvaé é nji bo asu mbo abé , vʼa ye ke limiti melu mé a dañe nsisiñ, amu a nji bi woñ asu Zambe.

¹⁴ Momo jame mfe a bobane si nyô a too na: Asuʼulane ya bezôsôô be bôte bʼéziñ da viane luʼan a mboone bebo abé , a di bebo abé bʼéziñ é lukaʼan a mboone bezôsôô be bôt: ma jô na momo jame fe le.

¹⁵ Ajô te me nga seʼe mevak, amu jam afe, e jôbe si, e nji bo mvaé asu môt ve na a di, a nyu a wôʼavak; jam da yiane tôñe nye ésaé jé été nté melu yʼényiñe Zambe a ve nye jôbe si nde le.

¹⁶ Eyoñe me nga ve nlem asu ya yeme fek a yene fʼévevé bôt be bôô je si nyô, amu mise me môt me nji kʼôyo toʼo amôs toʼo alu,

¹⁷ éyoñe te nje me nga yen ésaé ése Zambe a nga bo; môt a se nguleya yemelan ésaé ja bobane jôbe si va, akôsa bo na a saé na a jeñe je, ve teke yene je; jaʼane mfefek wo yemete na wo yem, ve teke nguleya yene je.