EKLEZIASTE 7 - Bible en langue Bulu

Jôm é ne mvaé

¹ Mbamba jôé a ne mvaé a dañe mbon ô ne mbamba menyum A môse yʼawu mvaé a dañe wu yʼabialé.

² A ne mvaé ya ke nda awu a dañe nkeane ya nda ndian. Amu asuʼulane ya môt ase e ne ndʼawu a vevea môt a ke nyoñe nyeʼelane valé.

³ Olun ô ne mvaé a dañe vioé amu na éyôé é kusa bo asu ve nlem ô ne bo mevak

⁴ nleme mimfefek ô ne e ndʼawu, ve wu mekute me bôt e nda mevak

⁵ a ne mvaé ya wôʼô bijô bi mfefek a dañe na ô bo môt a wôʼô jia mekute me bôt.

⁶ Vioé mekute me bôt ô ne ane biyo bia tôtan e mvé si: dili fe e ne momo jam.

⁷ Etibelaʼa é ne bo mfefeʼe na ô veñesan akut, ve memvaka ma bo na môt a dimili fek.

⁸ Asuʼulane jam e ne mvaé a dañ atataʼa yʼété ôjibi ô ne mvaé a dañe mebun.

⁹ A nji bo mvaé ya jiʼa wôʼôlun amu mekute me bôt mme ma jiʼa wôʼôlun.

¹⁰ Te sili na: Melu ya mvus me mbe abeñ aya a dañe melu ya den? Amu nsili wôé wo liti na fek é ne wo momo.

¹¹ Fek é ne mvaé anʼélik; ja volô bôt be bili je.

¹² Ja kamane môt avale fʼane moné; môt a bili je a nyiñ ayap: ajô te e ne mvaé ya yeme je.

¹³ Tame fombô mboone Zambe: Zʼa ne sôane zôsôô jôm a boya ékotekot?

¹⁴ E môse mam mese ma ke mvoʼé , vaʼak, e môse ma ke abé : tebeʼe élé atyeñe si: Zambe a lôme mvaé ba abé avale da, nalé ate môta binam a ye bo te yeme jam da ye kui nye akiti.

Abé jôme ya si ése

¹⁵ Me nga yene mam mete mese éyoñe bemomo melu yʼényiñe jam. Zôsôa môt éziñ a jañ e zôsôô wé été a mbia môt a nyiñ ayap mbia mboone wé été.

¹⁶ Te bo zôsôô a dañe nné, a te dañe bo fek; amu jé wo ye jiane womien?

¹⁷ Te dañe bo abé a te veñesan akut; amu jé wo yiane wu te na éyoñe jôé é kui?

¹⁸ A ne mvaé ya bi jame dina, ve wo wôé teke jôʼé dili: amu nko Zambe woñ a nji yiane fubane bibé.

¹⁹ Fek ja bo mfefeʼe na ô dañe bo ngu a dañe bengovina awôm be too e tison.

²⁰ Yaa! Zôsôa môt a bo mvaé teke bo abé a nji bo si nyô.

²¹ Ajô te ñhe te ve nlem mfaʼa ya mejô mese bôt ba kobô, ô za wôk ane mbo ésaé wôé a kobô wo abé .

²² Amu abui biyoñ, wo yeme na, wo fe ô nga kobô bôte bevoʼo abé .

Fek ja jemban e be fam a minga

²³ Me nga mane fase mam mete mese a fek. Me nga jô na: Ma ye bi fek. Ve é ne mʼôyap.

²⁴ Bebela a ne ndam a édoʼo abui. Zʼa ne wôʼô nyʼase?

²⁵ Ma ma ye ve ngu a nleme wom ôse ya yem, ya fak a jeñe fek a mbamba ntaʼane bifia, ya yeme fe na abé e nʼakute jam, akute jam da bo môte na a sok.

²⁶ Ve me nga yene na e minga a nʼôlam, nyô nleme wé ô nʼavot a mo mé mengataʼa, a nʼayô a dañ awu; môte Zambe a yene mvaé a tube nye, ve mbo abé a ye bo jôm a bi.

²⁷ Jam me nga yene le, nalé nkatefoé a jô, éyoñ me maneya fase biôm jijia asu ya bi jame ya jô.

²⁸ Me ngenane ma jeñ, ve me ngenane te yen: me yeneya fame jia e toyini befam été, ve me ngenane te yene minga wua e binga bese été.

²⁹ Ve da ye ô lôô jam me nga yen: Zambe a nga kôme bôt zôsôô , ve bebien be nga mane ve mam ayaé.