EKLEZIASTE 5 - Bible en langue Bulu

¹ Anyu dôé e boʼo te bo ôjejaʼa, nalé fe nleme wôé ô boʼo te bo avôle ya kobô asu Zambe. Amu Zambe a ne e yôb été, womiene ke e si nyô: ajô te nkobô wôé ô boʼo tyôtyoé.

² Abui mam da tyelé môte nleme yôp nde da soo nye abui mbia biyeyem a bifuuk mejô bia so abui nkobô.

³ Eyoñ ô nga tiñeti Zambe jam, te beta yange ayabe ya bo de amu Zambe a nji liti mvam e be mekute me bôt: boʼok e jam ô nga tiñeti.

⁴ E ne wo mvaé na ô bo te tiñeti Zambe jam, sa na ô tiñeti ve teke bo.

⁵ Te kañese na anyu dôé e bo na ngume nyôle wôé ô bo abé , a te yange jô ntuni na me nga kop. Amu jé Zambe a yiane wôʼôlun amu nkobô wôé a ndaman ésaé ya mo môé.

⁶ Bemomo be mam ba yené abui biyeyem été avale fe bemomo be mam ba yené abui nkobô été: ajô te wo yiane ko Zambe woñ.

Mbaʼalan akum ô nʼayaé

⁷ Nge wo yene be kpweʼeleʼe minzôzoé a tibi zôsôô a nya ntyiʼane mejôô e si éziñ, te kame jame te; amu beta môt a kaman e beta môte mbok, ve ba ba dañe be e beta be bôt be ne fe.

⁸ Si ja volô bôte bese; jaʼane ényiñe njô bôte fe é tii ésaé mefup.

⁹ Nyeʼe moné a ne te kate nye, a nyeʼe akum te yene mfi yʼété: momo jame fe le.

¹⁰ Eyoñ akum da bo abui, ba ba diane de fe ba bo abui. Za mfi ôfe mbi abui akum a bili ye sa ve na a nyeʼe a lôô akume dé?

¹¹ Oyo môt a saé ô ne mvaé toʼo a di tyôtyoé ngʼabui; ve njaane bidi nkukum ô nji jôʼé nye na a kʼôyo.

¹² Mbia ôlune jam me nga yene jôbe si: akume mbi akum a baʼale asu bidime bié.

¹³ Akume te da mane jañ e mbia jam éziñ été; nge a nga biaé mon, mon ate a liʼi teke jôme mo.

¹⁴ E soé a nga so je abume nyia, a ye fe bulan aval a nga so: a nji nyoñe jôme ya kee je mfaʼa yʼésaé a nga saé.

¹⁵ Jame te fe e nʼôlune na a ke aval a nga so: mfi wé ô ne jé na a nga saé asu évuñulu?

¹⁶ Jam afe na a nga jañele melu mé e dibi été njalan a ôlun, nkôt a éyôé.

¹⁷ Jame ma me yeneya mvaé e ne na: Môt a di a nyu, a buʼubane mvaé yʼésaé jé ése a nga bo e jôbe si melu mese yʼényiñe jé Zambe a nga ve nye: amu ngabe jé nje le.

¹⁸ E ne fe ne maʼa Zambe a ve na: Môt a bi akum a abui biôm, a bi nguleya diane biôme bite a nyoñe ngabe jé a vaʼa fe a ésaé jé.

¹⁹ Eyoñ a ye bo teke mfañe biôm, a ye simesane melu yʼényiñe jé, éyoñe Zambe a mbe a yalaʼane nye a mevaʼa ya nleme wé.