EKLEZIASTE 4 - Bible en langue Bulu

¹ Me nga yene fe bitibelaʼa bise bia boban e jôbe si: miliʼi ya bôt ba wu ékpweʼele mme ma: ve teke môt a volô be nlem ! Bôt ba tibili be mbe be bili ngu, ve teke môt a volô be nlem !

² Me lôô na bôt be wuya be nʼébotan a dañe ba be ngenan be vee,

³ ve nyô a nji tame bialé nye a dañ ébotan a bese amu a ye bo te yeme bikotekote bi mam bia boban e si nyô.

Esaé a mam ma tôñe je

⁴ Me nga yene na ésaé ése a nkaban ôse ésaé éziñ ja kabe bi ne ve éviele bana ba bo ba bevok: dina fe e ne momo jam a ntôñan évuñulu.

⁵ Akute môt da baʼa mo a di minsône mié mibien:

⁶ e ne mvaé ya ve womien ôbe awoʼon a lôte na ô tuʼi nyôle jôé a mboon ésaé é ne teke yeme mfi yʼété.

Ntaban étam a mbia be mame yʼété

⁷ Me nga yene fe momo jam e jôbe si:

⁸ môt a too étam, teke môte mfe, teke mon nge monyañ, ve a saé te kʼawoʼon; jaʼane mise mé fe teke jaé a akum. Nde ñhe ma saé a nyume mamiene mvaé asu za? Jame te fe e ne momo a mbômban évevé ô ne mvin.

⁹ Bôte bebaé ba dañe wua amu be bili mbamba maʼane ya ésaé jap.

¹⁰ Amu na nge ba ku, wua a ye bete nyô mbok. Ve ngoʼé môt a nʼétam! Nge a ku a nji bi môta baa asu ya bete nye.

¹¹ Nalé fe na nge ba bômbô si bebaé ba ye wôʼan ayôñ, ve môt a nʼétam a ye wôʼô ayôñ aya?

¹² A nge môt éziñ a dañe nyô a nʼétame ngu, bebaé ba ye dañe nye; nkol ô ne mimbaʼa mila ô ne te jiʼa téé.

¹³ Mongô a nʼazoé vʼa too fek a ne mvaé a dañe njô bôt a ntoo nnôm vʼa too akut, te fe beta kañese na be ve nye melep .

¹⁴ Jaʼane mongô ate a nga so mimbôk asu ya jôô nge na a nga taté boʼo a jakéʼé bôt biôm e vôm a zu bo njô bôt.

¹⁵ Avale jame te éyoñ e nga boban, me nga yen ane bôte bese ba ke mimbi a bômane mongô a nga tyendé njô bôt ya mvus éto jé.

¹⁶ A mbe nlô ya nsamba bôt ô ne tekʼalañé. Ve da miaé mi bôt mia zu mia ye bo te beta bi mevaʼa nalé asu dé. Amu dili fe é ne momo jam a ntôñan évuñulu.

Ntyele ya kobô asu Zambe

¹⁷ Te ke nda Zambe te taté fas. Kelek a nkômbane ya vôʼôlô nalé a ne mvaé a dañe mveane metunaʼa avale mekute me bôt ma bo mbe be ne te yeme na ba bo abé .