EKLEZIASTE 3 - Bible en langue Bulu

Jam ese é bili éyoñ

¹ Jam ese é bili éyoñ, éyoñ asu jam ese e jôbe si:

² éyoñe ya bialé a éyoñe ya wu; éyoñe ya bé a éyoñe ya té jôm é ne mbéan;

³ éyoñe ya wôé a éyoñe ya nyii; éyoñe ya tyam a éyoñe ya lôñ.

⁴ Eyoñe ya yi a éyoñe ya woé, éyoñe ya yôn a éyoñe ya jem,

⁵ éyoñe ya wua mekoʼo fé a éyoñe ya kôane mekok , éyoñe ya wuban a éyoñe ya bo te wuban,

⁶ éyoñe ya jeñ a éyoñe ya dimili, éyoñe ya baʼale a éyoñe ya wua fé,

⁷ éyoñe ya nyap a éyoñe ya loé, éyoñe ya tabʼévô a éyoñe ya kobô,

⁸ éyoñe ya nyeʼe a éyoñe ya vini, éyoñe bita a éyoñe mvoʼé ,

⁹ za mfii môt a saé a nyoñ e njuʼu wé été?

¹⁰ Me yeneya njuʼésaé Zambe a veya bone be bôte na be bo.

¹¹ Zambe a nga telé jam ese da boban éyoñ ja yian. A nga ve fe bia nkômbane ya yeme mam yʼangôʼé a ma yʼakiti. Ve bia kate kui na bi yeme mboone Zambe ôse.

¹² Nde me nga suʼulane yene na: Jam afe e nji bo môta biname mvaé ve na a vak a bo mvaé nté a vee.

¹³ A na e môt ase a di a nyu nge tyeʼe mvaé yʼésaé jé: dili te e ne mveane Zambe.

¹⁴ Ma yeme na jam ese Zambe a bo da ye tabe nnôm éto: teke jôme ya kôʼôlan nge vaa été, a Zambe a bo na bôt be ko nye woñ.

¹⁵ Jam da boban éyoñe ji avale fʼane di da ye boban melu ôsu bi tameya bobane melu mvus: Zambe a bo mam mimbaʼalan.

¹⁶ Jam afe me nga yene jôbe si nde di: abé da jôô e vôme zôsôô a ntyiʼane mejô bia yiane boban.

¹⁷ Nde me nga jô e nleme wom été na: Zambe a ye tyiʼi zôsôô a mbo abé mejô, amu jam ese é bili éyoñ a mboon ôse ki ntyiʼane mejô wé.

Miñwuan a bevevee

¹⁸ Me nga jô e nleme wom été ajô bôte na: Zambe a ye veʼele be, éyoñe te bebien ba ye yene na: Be ne ve betit.

¹⁹ Amu asuʼulane ya bôt a di betit be nji selan: wua a wu ane nyô mbok, be bili nsisim ényiñe wua: ndañane môt a dañe tit ô ne momo, amu mam mese me ne momo.

²⁰ Bese ba ke vôme wua; bese ba so mbuluk, bese ba bulane fe e mbuluk.

²¹ Môt éziñ a se nguleya jô na nsisim ényiñe bôt wo bete yôp, nge na wu betit wo sise si.

²² A me nga yene na jam e ne mvaé be môt e ne ve na a yene mvaé ya mimboone mié, amu ngabe jé nje le. Amu na za a ye beta soo nye asu ya yene mam ma ye boban e mvuse jé?