EKLEZIASTE 2 - Bible en langue Bulu

Mevak a mefok bi ne momo

¹ Me nga jô nleme wome na: Ma zu veʼele wo a mevak, ô tame tyeʼe mvaé! Dili fe e ne momo jam.

² Me nga jô vioé na: Akute jame le! Mevaʼa ke na: Ma volô jé?

³ Me nga tyiʼi nlem été na: Ma tame zu ve minsône miam nyuane woon a kabetane jam ese e ne te fek, ve me wuluʼu fe nleme wom atyeñ, me yangeʼe yene jam e ne bone be bôte mvaé na be bo e jôbe si va nté be vee.

⁴ Me nga bo beta be mam: me nga lôñe mamiene menda, bé mefube mindiʼi mi woon;

⁵ me nga bo mamien minseñ a mefube bilé; me mane bé mevale bilé mese ma wume bibuma été;

⁶ me nga faʼa mamiene menjeñe mendim asu ya sôé afane bone bilé mendime

⁷ Me nga kus alo befam a binga, me bi fe bone bap be nga bialé e nda jam été. Me nga bi fe abui mimbame biyem: benyak a bekabat a dañe bôte bese be nga too mʼôsu Yérusalém.

⁸ Me nga kôane fe argent a or, akume bejô bôt a bijôé; me nga bili beyia bia: befam a binga, nalé fe abui binga, avaʼa ya bone be bôt.

⁹ Me nga bo éwôlô môt, me nga bik a dañe bôte bese be mbe mʼôsu Yérusalém, nalé fe na feʼe jam é nga too be ma.

¹⁰ Jôm ése mise mam me nga kômbô, me nji kamane me je; me nji kamane nleme wom avaʼéziñ, amu nleme wom ô nga yene mvaé yʼésaé jam ése: ngab é mbe énjam ésaé te nje le.

Asuʼulane yʼésaé te

¹¹ Me nga fombô bisaé ya mo mam me nga bo a abime njuʼu me nga nyoñe na ma bo bie, a zu kooé na bise bi mbe momo jam a ntôñan évuñulu: môt a bi bi mfi e jôbe si va.

¹² Nde me nga tame fombô ñyemane mam, akut a nsoʼon étyi. E ne foʼo na e môt a nyoñ éto njô bôt a be a bili a voʼo bo jam afe, ve di bôte befe be tameya bo.

¹³ Me nga yene fe na fek é bili mfi a dañ akute mboon avale fe éfufup é bili mfi a dañe dibi.

¹⁴ Mfefek wo kee mise mé e vôm a yian, vʼakute môt da wulu e dibi été. Daa me ma yeme na bebaane be bili avalʼasuʼulane da.

¹⁵ Ajô te nde me jôya e nleme wom été na: Jame da kui e bʼakute môt nde fe da ye kui be ma: jé ñhe me mbe abime feʼe di? Ma jô mamiene na: Dili fe e ne momo jam.

¹⁶ Nsimesan ba simesane mfefek avale fʼane wu ba simesan akute môt mi ne te tabe nnôm éto: ane melu ma lôt nne fʼôvuane ya mam wo kui nalé. Etua jame na: Mfefeʼe môt wo wu fe vʼane akute môt.

¹⁷ Ajô te ñhe me nga vini ényiñ amu na, mfaʼa wom ésaé ése ja boban e jôbe si va é nʼabé amu mam mese me ne ve momo a ntôñan évuñulu.

¹⁸ Me nga vini njuʼu ôse me maneya wu e jôbe si amu ma yiane liʼi avaʼa ese yʼété e be nyô a ye tyendé ma.

¹⁹ Ve za a yem nge a ye bo mfefek ngʼakute môt? Akôsa bo nalé nye foʼo a ye bo njôô ya njuʼu ôse me wuya e jôbe si va a feʼe ése: momo jame fe le.

²⁰ Nlem ô nga suʼulane bili mʼatek amu njuʼu ôse me wuya e jôbe si.

²¹ Tame yene môt a boya ésaé jé a atyeñ fek a nyeman, ve ngabe jé ja ye veban e be môt a nji wu njuʼu éziñ: dili fe e ne momo a beta mbia jam.

²² Za jômô môt a bili mfaʼa ya njuʼu ôse a nga wu a ésaé a nga bo e jôbe si?

²³ Melu mé mese me ne foʼo ve mintaé, ésaé jé ki vʼôlun. Jaʼane alu, nleme wé ô nji woʼon: dibi fe e ne momo jam.

²⁴ Jam e ne môte mvaé e ne ve na a di a nyu a yen, asu dé émien, ngabe ya njuʼu wé é ne mvaé. Me nga yene na dili e ne ve mveane Zambe.

²⁵ Za mfe a ne di a buʼuban ye sa ma?

²⁶ Amu Zambe a ve môt a yene mvaé fek, nyeman a mevak. Ve mbo abé a ve nyʼévevé ya kôan a naane biôm asu ya ve nyô Zambe a yene mvaé: momo jame fe le a ntôñan évuñulu.