EKLEZIASTE 12 - Bible en langue Bulu

Eto nnôm a awu

¹ Ô simesaʼane Nyô a nga té wo melu ô ngenane ndôman, nté mbia melu me ngenane te so, a nté mimbu wo ye jô na: Me nji yene mvaé été mi ngenane te so.

² Nté jôp, éfufup, ngon a ateté bi ngenane te bo ékukut, a nté minkut mi ngenane te beta zu, nalé fe mveñ,

³ e môse bebaʼale nda ba ye fôʼôban a mingungule mi bôt mia ye vitibi, e môse binga ba koʼo bidi ba ye telé ésaé jap, be too te kʼabui, e môse binga ba fombô vundu ba ye dimili mfaane wop,

⁴ éyoñe bivine mimbé bia diban e njoñ a tyiñe minsini a koʼo bidi ja tabʼ évô, éyoñe bôte ba kôlô si a nkobô ônon a binga ba yia bia ba ye tabe bivô;

⁵ éyoñe te ñhe mone nkôl a sise wo, a woñ wo bi wo zen , éyoñ élé amañdié ja sam a étandak ja bo adit a ébuma kaprié ja kpwañ; avale te môt ase a ke e nda jé ja suʼulan. Nté te ôse beyi du ke be lôtaʼan e njoñ;

⁶ nté nkole argent ô ngenane te téé a élaé or é ngenane te bôlé, nté ndeʼe njeñ é ngenane te bôlé anjeñ, nge na nka wo dutu mendim ébé ô ngenane te salé.

⁷ Nté mbuluk ô ngenane te bulane mbuluk aval ô mbe a mvebʼ ényiñ ô ngenane te bulane be Zambe a nga ve wô.

Asuʼulane ya nkobô

⁸ Momo ya bemomo, nalé nkatefoé a jô, mam mese me ne momo.

⁹ Sa ve na nkatefoé a mbe mfefek, vʼa nga yeʼele fe ñyemane mam e be bôt; a nga vôʼôlô, a nga biʼili a tak abui minkana.

¹⁰ Nkatefoé a nga bo ésaé ya yene bifia bi ne mvaé, benya bifia, bi too ntilan avale bi né.

¹¹ Bifia beyeme mam bi ne avalʼane minsoñ bibaé; betili bekalate ki ane mesen me beme vôm éziñ. Mveane Pastô wua ñwô le.

¹² Nde ñhe a mone wom nyoñe ñyeʼelan été; ntilan abui bekalate wo ye ke man a abui ñyéʼan da ve nyôl atek.

¹³ Asuʼulane ya nkobô wuna ôse e ne na: Ko Zambe woñ a baʼale mebendé mé. Amu ngume jam môt a yiane bo ñwô le.

¹⁴ Amu Zambe a ye kee mboon ôse ntyiʼane mejô, mam mese me ne nsolan, toʼo di e ne mvaé toʼo di e nʼabé!