EKLEZIASTE 11 - Bible en langue Bulu

Abui ntabane ntyee da ndeñele

¹ Wuʼa bidi biôé e mendime yôp, amu éyoñ éyoñ é lôteya, wo ye beta yene bie;

² vaʼa bôte zamgbwa nge muam ngabe jia, amu ô ne te yem mbia jam a ne kui e si nyô.

³ Eyoñe minkut mi nto njalan a mveñ, mia sôôé je si; a ngʼélé ja ku si, mfaʼa ya nké ngʼakôé, ja ye bômbô e vôme ja ye ku.

⁴ Nyô a fombô évuñulu a ye bo te bé bidi nyô a toé mise mé e minkut, a ye bo te kôane bidi.

⁵ Aval ô ne te yem ane évuñulu ja vuñ nge ane atyi mon da yaé abume minga a nʼabum, nalé ate ô ne te yem ésaé Zambe nyô a bo mam mese.

⁶ Miase mvoñe jôé mametyé a te ve wo wôé awoʼon mamengôʼé; amu ô nji yeme jôm ja ye bo nya jômô, nge jina nge jili, nge na bibaane bi ne bo mvoʼé .

⁷ Efufup é ne mvoʼé a e ne mvaé na mis me yene jôp.

⁸ Nge môt a nyiñ abui mimbu a vaʼak a mimbu mite mise, ve a simesane na melu ya dibi ma ye bo abui: jam ese da kui e ne momo.

Enyiñ ésoé a ateʼe nnôm

⁹ A ndômane môt, vaʼak éyoñ ô ngenane ndôman, nleme wôé ô boʼo wo na ô vak nté melu ô ngenan ésoé, wuluʼu mezene nleme wôé wo liti wo a avale mise môé me lôô; ve yeme na mfaʼa ya mam mete mese, Zambe a ye zuu wo ntyiʼane mejô.

¹⁰ Ajô te vaʼa éndeñelaʼa e nleme wôé, a titan abé é ke nyôle jôé ôyap; amu éto ésoé a ngu bia lôt avô.