EKLEZIASTE 10 - Bible en langue Bulu

Beangôndô ya akute mboon

¹ Mimbime minlo mia ndaman a ve ngume ndeʼe mbon ôlobinda mbia ényum. Avale te mone mboon akut a dimili fek ngule jé a duma dé.

² Nleme mfefek ô ne nye mbo nnôm, ve wu akute môt ô ne nye mbo nga.

³ Eyoñ akute môt da wulu e zen , fek ja jañe nye a a jô môt ase na: Akute dili!

⁴ Nge ntebʼôsu wôé a yaa wo, te liʼi vôme wôé wo bo ésaé: amu évôvoé nlem ja bo na ô saʼale bikop.

⁵ Ntebʼôsu a ne nguleya kop. Ajô te me nga yene bité bi ne te yian e si nyô:

⁶ nsusuʼu môt wo nyoñ éto é nʼôyabe yôp, ve minkukum mi likiʼi mi bili bito ya si.

⁷ Me nga yene alo e bete bikabela a biwôlô bi bôt bi wuluʼu a mebo anʼalo.

⁸ Nyô a faʼa ébé, a ye ku été, a nyô a tub abé akak nyo ja ye lôbe nye.

⁹ Nyô a faʼa mekoʼo si a ne balé aveñ a nyô a sale bilé mbia jam a ne kui be nye.

¹⁰ Nge ba bo te jeb ôvôn ô ntoo atu, ngul ja sili abui asu ya bo wô ésaé. Yaa, fek é ne évôle ya ndañan.

¹¹ Da volô jé na ô séé nyo nge wo taté jôʼé na é lôbe wo?

¹² Mejô yʼanyu mfefek me ne njalane mvam; ve biyaé biʼakute môt bia dutu awu dé.

¹³ Atataʼa ya nkobô yʼanyu dé e nʼakut, a amané ya nkobô wé ô ne mbia nsoʼon étyi.

¹⁴ Akut da kobô abui. Môt a ne te yeme jam da ye boban, a za a ye kate nye jam da ye bobane mvuse jé?

¹⁵ Esaé akute môt ja teʼe nye amu a ne te yeme ke tison.

Njô bôt a ngule jé

¹⁶ Ngoʼo wo si é bili njô bôt a too mongô a bivet bia di ataté mametyé!

¹⁷ Ebotan a wo, si njô bôte wé a ne mone ya nda bôte mintômba, a bivete bié bia di éyoñe ja yian, asu ya nyoñe ngu a teke bisulane menyu!

¹⁸ Andile nda da ku nyô a dañ élese ya kôme de yôp, a nda ntelé môt ja toé.

¹⁹ Beta be bôt ba kômesane ndian asu mam mevale mevale yʼényiñe jap, woon a ve be mevak a moné a ve be nguleya bi jôm ése.

²⁰ Te kobô njô bôt abé , jaʼan ôsimesane wôé été a, étune nda wo bômbô été, te kobô nkukum abé : amu ônone ya yôp wo ye kee foé, biôm bise bi bili mefap bia ye kañete jam ô nga jô.