EFEZE 6 - Bible en langue Bulu

Bon a bebiaé. Belo a Bemasa

¹ A bon , vaʼane bebiaé benan mewôk e be Nti, jame da yian e nde le.

² Seméʼé éso a nyua, atiñ ôsu e bili ngakaʼa, nde le:

³ Ajô te wo ye bi mvaé a ényiñ ayap e si nyô.

⁴ A mia bebiaé, te boone benyo bone na, be kañge. Ve mfaʼa ya yale be, jeñane nleban a nyeʼelan bia so e be Nti.

⁵ A belo, wôʼane Bemasa benane ya si nyô a woñ, a mfôʼôban, a nlem ô ne teke abui mam, aval ane nge Krist nye mia ve mewôk.

⁶ Saa amu nkasa ô ne mia mvus, aval ane nge mia kômbô yené mvaé e be bôt, ve aval ane belo be Krist, ba ba jeñe zen ése ya bo nkômbane Zambe.

⁷ Boʼon ésaé a mbamba minlem, aval ane nge mia bo Nti, saa bôt.

⁸ Mia yeme na, mvaé môt ase a ne bo, a ye beta nyoñe je e be Nti, jaʼan a ne ôlo nge fili.

⁹ A mia Bemasa, boʼone fe be avale da. Jôkaʼane bisisia. Mia yeme na, mfaʼa wônan a mfaʼa wop, Masa a ne yôp été, a nsémane mingume mi bôt ô nji bo be nye.

Biôme mewosane ya Zambe

¹⁰ Ma suʼulane jô na: Boʼone ngul e be Nti, a e ngule jé ja dañe ngul ése.

¹¹ Jaéne biôme mewosane bi Zambe, ane mi ne dôngan atyeñe mimboon mi Satan.

¹² Bi nji wosane metyi nge minsôn, ve bi jôé, betebe ôsu, a bejôô ya dibi, mimbia minsisim mi ne yôb été.

¹³ Ajô te biane biôme mewosane bi Zambe, nde éyoñe mbia môs wo ye kui, mia ye bo ngule ya yeme ngu a tebe ne sim, a koone na mi maneya bo mam mese.

¹⁴ Tebaʼane ñhe tetele! Mi jaé bebela mengeteñ ane kandé, zôsôô ane ében,

¹⁵ dulu ya kate Mbamba Foé mvoʼé e mebo ane bikôndé.

¹⁶ Mi dañe nyoñ ébene mbunan, ja ye ve mia nguleya dime mekoñe me nduane Satan.

¹⁷ Mi suʼulane nyoñ ékôngô nyian a nkpwaté mekône Nsisim, e ne na: Mejô me Zambe.

¹⁸ Nsisim a vaʼa mia ngu e meyeʼelane menan mevale mese, e minjaʼane mienan, biyoñe bise. Belaʼane mbômban évevé wônan, asu meyeʼelan te kat, ajô mimfufube mise,

¹⁹ a mfaʼa wome fe na, bifia bi veban anyu dam asu ayoʼo ese ya kañete ndimba jame ya Mbamba Foé,

²⁰ nye ate me ne nlôman ô ne nkaʼane ngôkop. Yeʼelaʼane ñhe na me yen, e Mbamba Foé ate été, ngule ja volô na me kobô ajô yʼété ane da yian.

²¹ Ma yi na mia fe mi yem été jam, jé ma bo; Tikik, e mojañ ma nyeʼe, mbane mbo ésaé e be Nti, a ye kate mia mefoé mese.

²² Ma vañe foʼo mia nye lôme na, a kate mia e vôme bi ntele, a ve fe mia ngule minlem.

²³ Mvoʼé é boʼo e be bobejañ, nyeʼan a mbunan bi soʼo e be Zambe Esaa, a e be Nti Yésus Krist.

²⁴ Mvam é tabeʼe e be ba bese ba nyeʼe Nti wongan Yésus Krist e nyeʼan ô ne te tyendé.