EFEZE 5 - Bible en langue Bulu

¹ Vuane Zambe, amu mi ne bon a nyeʼe.

² Nyiñan e nyeʼan été, avale Krist a nga nyeʼe bia, a a nga ve émiene Zambe ajô dangan, ane mvean étyiʼa, aval ane ôlobinda a ne abeñe menyum.

³ Ebamba, mvin, aval ese bi ne, a ôzañ akum, bi boʼo te totebane zañe jenan, avale te nde da yiane mimfufup.

⁴ Mbia bifia, minkobô mi ne tee fek nge mbia fianga, nalé a nji yian. Ve vaʼan e mvean akéva.

⁵ Amu mia yiane tuʼa yeme na, teke mbo ébamba, nge mvimvine môt, nge ñwôlé bôte bevoʼo akum, nkañe bezambe befe ate, a ne bi ngap éjôé Krist ba Zambe.

Dibi e melu mvus, ve éfufup éyoñe ji

⁶ Môt a boʼo te duʼu mia a bivôlevôla bifia. E ne bebela na, mame mete mme ma dutu ayaa Zambe e be bon be ne melo.

⁷ Ajô te, te boone benyoñe ngap, mia be be.

⁸ Melu mvus, mi mbe dibi, ve éyoñe ji mi ne éfufup e be Nti. Wulaʼan ane bone bʼéfufup.

⁹ Ebuma éfufup é ne jôé na: Mvam, zôsôô nge na benya mejôô.

¹⁰ Fasane mame Nti a yene mvaé.

¹¹ Te boone benyoñe ngap a minkôkôme mimboone mi dibi. Ve kulaʼane mie éngengeñ.

¹² E ne ôsone ya kobô mame bôte bete ba bo asoé.

¹³ Ve jam ese e ne nkulane éngengeñ, da litiban a éfufup.

¹⁴ Amu jam ese da litiban e ne éfufup. Ajô te ba jô na: veʼe ôyo, a môt ô ne ôyo.

Kôlôʼô si e zañe miñwuan, a Krist a ye faé be wo

¹⁵ Mi tukaʼa fomban aval ényiñ mia nyiñ: Te boone mekut, ve boʼone mimfefeʼe mi bôt,

¹⁶ Mmbe mia yeme belan éyoñe ya éyoñe ji, amu melu me ne abé .

¹⁷ Te boon asuk, ve mi tukaʼa yem jé é ne nkômbane Zambe.

¹⁸ Te veane miabebien nyuane bilam wo soʼan, amu wo kee môt e zene njañan, ve boʼone njalan a Nsisim.

¹⁹ Minlañe ya ézezañe jenan mi boʼo besam a bia bi Zambe. Yiʼan a wumulu Nti a minleme mienane mise.

²⁰ Vaʼane Zambe Esaa akéva biyoñe bise e mfaʼa ya mame mese, a jôé Nti wongan Yésus Krist.

²¹ E woñe Krist été, kañesaʼane kean éjôé bana a ba bevoʼo si;

Beyôm a beyal

²² A beyal, suʼane mia bebiene si e be benyo beyôm, aval ane e be Nti.

²³ Amu nnôm a ne nlô ya be ngal, aval ane Krist a ne nlô keké, nye ate a ne nyii ya Nyôl jé.

²⁴ Ve aval ane keké é ne éjôé Krist si, nalé fe beyal ba yiane bo e be beyôm mfaʼa mam mese.

²⁵ A beyôm, nyekaʼane benyo beyal, aval ane Krist a nga nyeʼe keké a ve émien amu je.

²⁶ Ajô te a nga kômbô bo je mfuban a ntunane je a mendim ma sôp e ne na, mejô me Zambe été.

²⁷ A nga kômbô ve je émien étôtok, teke ayeñ, nge mbot, nge jam éziñ e ne abé , ve na keké jé é bo étyi a tee jame ya ve je bijô.

²⁸ Nalé ñhe nnôm a yiane nyeʼe ngal aval ane nyôle jé émien.

²⁹ Teke môse môt a nga vini nyôle jé émien. Ve a ve je bidi a voñôlô je, avale Krist a bo keké jé,

³⁰ amu bi ne bibuʼa ya nyôle jé.

³¹ Ajô te fam ja ye liʼi ésaa ba nyia, ja ye lat a ngal, a bebaane ba ye bo ve nsône wua.

³² Ndimba jame nyô é ne anen, ma jô na, ja fombô Krist a keké.

³³ Ma wômesane jô na: Môt ase ya be mia, mfaʼa wé a yiane nyeʼe ngal ane émien, a ngale ki a seméʼé nnôme wé.