EFEZE 2 - Bible en langue Bulu

Ataté ényiñ a kui awu

¹ A mia, mi nga to miñwuan amu mintyamane metiñe mienan, a amu mam abé menan,

² mbie mi nga nyiñ été, éyoñ mi nga tôñe zambe ya si nyô, étoñe ntômba ja yengan e zañe yôp a si, e nsisim wo bo ésaé e zañe bikañekañe bi bôt.

³ Bi nga to tañ éte été, bia bese fe bi nga ve biabebien e minkômbane ya minsône miangan e melu mvus. Bi nga bo minkômbane miap, a tôñe mintindane miap; a zene ya abialé, bi nga too fe ane bôte bevok, ayaa si.

⁴ Ve Zambe a ne njalan a mvam; amu beta nyeʼan a nga nyeʼe bia,

⁵ e too ke na, bi mbe miñwuan amu minkobane miangan, a nga ve bia ényiñ bia be Krist. Mi nyiñeya a mvam !

⁶ Mfulaʼan a nye, a nga wômôlô bia, a tooé bia yôp e Krist été.

⁷ Nde amu mbamba nleme wé mfaʼa wongan e be Yésus Krist, a nga kômbô liti mfaʼa ya mimbu mia zu, afok e ne teke aveʼane ya mvame jé.

⁸ Mi nyiñeya foʼo vʼamu mvam , a zene ya mbunan. Mi see jame ya bo, e ne mveane Zambe.

⁹ E nji bo ajô mimboone mi mam, môt éziñ a za bo mebun amu nalé.

¹⁰ Amu nye a nga kôme bia. Bi nga tébane be Yésus Krist, asu mbamba mimboon mmie Zambe a nga kôm ôsusua na, bia ye bo mie.

Nlatane Bikuu a Beyude e be Krist

¹¹ Nde, mi simesaʼane ñhe na, e melu mvus, e mia mi nga beʼe ndeme ya bikañekañe e minsône mienan été, e mia mi nga lañeban ane minsôso e be ba ba simesane na be ne ntyiʼibane metye e mvuse ntyiʼan ébuʼa ya minsôn,

¹² simesaʼane na, éyoñe te, mi nga too tee Krist, tee ngap ayoñe Beyude été, beyeñ e bilate ya ngakaʼa, teke ndi minlem a teke Zambe e si nyô été.

¹³ Ve éyoñe ji, e be Krist, e mia mi nga too ôyap melu kôa, mi subuya bebé amu metyi me Krist.

¹⁴ E ne été na, nye a ne mvoʼé jangan. A boya jôm é mbe nkandane na é bo jôme jia. E minsône mié été, a tyameya mfine nkandan, e ne na: Ziñ.

¹⁵ A nga vaa metiñ a mebendé map a minjôane miap. A zen éte, a nga kômbô na, ataté mone Beyude a mone Bikuu, a té e be émien, mfefé môte wua a mveane mvoʼé ,

¹⁶ a late bise bibaane a Zambe bi bo nyôle jia, a zene ya Krôa: valé ate nye a nga wôé ziñ.

¹⁷ A nga zu kate foé mvoʼé e be mia mi nga to ôyap, a mvoʼé e be ba be nga to bebé.

¹⁸ A amu nye, bana a ba bevok, e Nsisime wua été, bi mbili anyiine be Esaa.

¹⁹ Ajô te mi nji fe bo beyeñ nge mintabe, mi ntoo ba baa be mimfufup be too. Mi ne ba ya nda bôte Zambe.

²⁰ Mi nga nyiine melôñ, mme mete mbôkaʼa ya été ô ne minlôman, a bekulu mejô, a Yésus Krist émien a too akoʼo ya jua.

²¹ E be nye, ngume nda ôse wo lat, a beteban a bo mfufube nda Zambe e be Nti.

²² E be nye ate, mia fe mi ne mfulaʼan, nyian e melôñe mete été, a bo étabaʼa Zambe a zene ya Nsisim.