EFEZE 1 - Bible en langue Bulu

Paul a ne za

Mebatan

¹ Paul, nlômane Krist Yésus amu nkômbane Zambe, ma tili mimfufup a bebuni Krist Yésus.

² Mvam a mvoʼé bi tabeʼe e be mia bi soʼo e be Zambe Esaa wongan, a e be Nti Yésus Krist.

Mbamba be mam Zambe a nga ve bia e be Yésus Krist

³ Zambe a boʼo ébotan, Esaa Nti wongan Yésus Krist. A nga botane bia a ébotane ya Nsisim ése é ne e yôb été a e be Krist.

⁴ A nga tobe bia e be nye, te yene mbôkaʼa ya si ô za boʼok, ane bia ye bo mimfufup, a teke bijô asu dé, e nyeʼan été.

⁵ A nga tyiʼi mfaʼa wongane na bia ye bo bone be ntoñe béé zene ya be Yésus Krist; e nne mvame é nga kômbô nalé

⁶ amu duma yʼétôtoʼo jé a amu mvam a nga jalé bia e be Eñwé a dañe nyeʼe.

⁷ E be nye, a zene ya metyi mé, bi ntoo nkôtan . E be nye, mintyamane metiñe miangan mi ntoo njaman , aval ane afoʼo ya mvame jé e né.

⁸ Zambe a nga ve bia je teke alañe a yoé bia mfaʼa ya ése a ñyeman ôse.

⁹ A nga bo bia na, bi yeme nsolane jame ya nkômbane wé, e mbamba ôsimesane a nga bi ôsusua e be Emien

¹⁰ mfaʼa ya bo biyoñe na bi jaléban, e ne na: E late émo minlañ ése, éjôé évete jia si, nje é ne Krist; e biôme bi ne yôp été a bi bi nee si.

¹¹ E be nye fe, bi nga nyoñe ngabe jangan, Aval ane ntaʼane mame Nyô a wulu mam mese a e nkômbane wé ô né; e mbe bia ntiñetan aso nnôm éto

¹² na bi bo benyoñe ngabe ya duma yʼétôtoʼo jé, e ba be nga taté bi ndi nleme be Krist.

¹³ E be nye fe, mi nga wôʼô bebela nkobô, E Mbamba Foé a nyii mia. Avale dada te fe mi nga buni be Nye; A Sitame Nsisim ô mbe ngakaʼa, Mfufube Nsisim a nga lômbane be mia,

¹⁴ ane éfase ya ngab éliʼi jangan, akekui amané nkôtan , éyoñe bia ye nyoñ ngab éliʼi ése asu duma yʼétôtoʼo jé.

Meyeʼelane me Paul asu bôte ya Eféze

¹⁵ Amu ajô te ma fe, ataté ane me nga wôʼôtane mbunane wônane mi bili be Nti Yésus, a nyeʼane wônan asu mimfufube mise,

¹⁶ me nji jôʼé ve akéva ajô denan, éyoñ ma tote mia e meyeʼelan mam été.

¹⁷ E Zambe Nti wongan Yésus Krist, Esaa, nye ate a ne étôtok, a vaʼa mia nsisime fek, ñwô ô liti mia nye, a tuʼa bo na mi yeme nye.

¹⁸ A kuʼi minleme mienan éfufube jé, ane mi ne yem za ndi nleme nloone wo ve mia, akume ya étôtoʼo jé, élik a bo mia benyoñe ngap, mia be mimfufup,

¹⁹ abim abui ngul a nga ve asu mvaé jangan bia bebuni . E ngule jé, éwôlô jé a ntute ngule wé ôse.

²⁰ A nga belane bie e be Krist, éyoñ a nga wômôlô nye miñwuan, a tooé nye e mbo nnôme wé e yôb été,

²¹ mbetane yôp a dañe Ngul éjôé ése, Njôan, Ewôlô, Eto Fili a jôé ese é ne ngule ya toteban, saa ve émo jina étam ve nalé fe émo ja zu.

²² Yaa, a maneya telé biôme bise e mebo mé si, a telé nye ane nlô ya keké ése,

²³ nje é ne nyôle jé, njalane ya Nyô Zambe Emien a jalé ngumba.