DEUTERONOME 2 - Bible en langue Bulu

¹ Ane bi nga bulane mvus a ke nkôte si mfaʼa ya évele mañ, avale Nti a nga jô. Bi nga lôt abui éyoñ mefôla ma bômane si minkôle ya Séyir.

Israél a tulane mesi mʼEdom, Môab a Amon

² Môs éziñ Nti a nga jô me na:

³ Bia yiane ke mfaʼa zene yʼakôé, amu valé bi tabeya vôm ate a ayap.

⁴ Nde a nga jô ma me kate mia na: Mia ye tulan afôla si ya Séyir, e vôme bobenyoñ be too, mvôʼô Esô. Ba ye ko mia woñ; ve te jeñane na

⁵ mi wosane be, amu maa ye ke ve mia jôm e vôme wop, toʼo ve vôme ya telé abo. Amu me nga ve foʼo mvôʼô Esô si minkôle ya Séyir.

⁶ Mia ye yaʼane be bidi a mendim mia ye yi.

⁷ Vʼe ne bebela na Nti, e Zambe wônan, a nga botane mia e mfaʼa ya jam ese mi nga bo, a nga baʼale mia éyoñe mi nga tulan e beta nkôte si nyô. A tabeya be mia tañe mimbu mewôm menyin, a mi nji ke jembane jôm.

⁸ Bi nga bene lôte si ya Séyir, e vôme bobejañ be too, mvôʼô Esô. Bi nga saʼale fe e zene ja lôte mbiʼili a mevôm ba loon Elat a Esioñ-Gébér. Bi nga tyendé zen a tulane nkôte si ya Môab.

⁹ Ane Nti a nga jô ma na: Te wosane Môab nge bo nye bita amu maa ye ke ve wo ngap e si jé. E bone be Lot mbe me nga ve Ar ane ngap.

¹⁰ Osusua be Emite mbe be nga too Ar be too ayoñe bôt é ne ngu, abui a meyab ane bone bʼAnak.

¹¹ Bôte bʼéziñ be nga buni na be ne Berefayim ane bone bʼAnak, ve Bemôabite be nga loone be na Beémite.

¹² Wôna ôsusua Behorite mbe be nga taté tabe afôla si ya Séyir, ve mvôʼô Esô be nga bôé be a jiane be a tabe valé e señe jap. Avale te fe bone bʼIsraél be nga bo e si Nti a nga ve be na be tabe.

¹³ Ane Nti a nga jô na: Éyoñe ji tataʼane dulu a dañ ôtôñe Zeréd. Nde bi nga bo nalé.

¹⁴ Ataté nkôlane ya Kadés-Barnéa a kui ndañan ôtôñe Zéréd mimbu mewôm mela a muam mi nga lôt. Valé miaé ôse ya ba be mbe nguleya wosan éyoñe nkôlane yʼEjipte ô maneya jañ, avale Nti a nga kane ngana.

¹⁵ Nti Emien Nye a nga mane jiane be a kui môt a suʼulan.

¹⁶ Eyoñe miaé bôt ôte ôse ô nga mane jañ,

¹⁷ Nti a nga jô me na:

¹⁸ Éyoñe ji mia zu tulane nné sii Môab a tulane sii Ar.

¹⁹ Mia ye kui zôsôôô a sii bone bʼAmon. Te teʼane be, amu me nji tiñeti mia ngab éziñ e si jap. Amu be ne fe mvôʼô Lot, a e mbe me nga ve afôla si te.

²⁰ Nyeman ô mbe na afôla si te e mbe di Berefayim. E ne foʼo na ôsusua Berefayim mbe be nga too été, Berefayim bone bʼAmon be mbe be loʼone na Bezamzumite.

²¹ Ayoñe bôte te e mbe ngu, abui a meyap, ane bone bʼAnak. Ve Nti a nga mane jiane be éyoñe bone bʼAmon be nga so, mbe be nga bôé be a tabe e si jap.

²² Avale te fe Nti a nga bo bone bʼEdom, mvôʼô Esô be too nkôle Séyir; a nga mane wôé Behorite éyoñe bone bʼEdom be nga so a bôé be a tabe si jap; be ngenane valé a kui môse wu.

²³ Mfaʼa Beavite be nga too mebôta ya si ya Gaza, e bôt be nga so Kaftor be nga mane wôé be a tabe si jap.

²⁴ Kôlaʼane si, mi téé dulu, a dañe mbiʼili ya ôtôñ Arnon. O lôô, ma ve Sihoñ mon Amoréen, njô bôte ya Hesboñ a si jé e mo môé; tatéʼé vambane si éte a wosane nye bita.

²⁵ Ataté den, ma zu mias angôndô ya be wo a woñ ya be wo e be meyoñ mese me too yôbe si; a ba ba ye wôʼôtane foé duma ya jôé dôé ba ye fôʼôban a tabe biyebe amu ajô dôé.

Nyoñane sii Sihoñ, njô bôte ya Hesboñ

²⁶ Bi too e nkôte si ya Kédémôt, nde me nga lôme minlôman e be Sihoñ, njô bôt ya Hesboñ, a bifia ya mvoʼé na:

²⁷ Bia kômbô lôt e si jôé. Bia ye wulu foʼo ve nnôma zen , teke yale mbo nnôm nge mbo nga.

²⁸ Bia ye yaʼane wo bidi a mendim bia ye yi a moné;

²⁹ mvôʼô Esô be too nkôle Séyir, a Bemôabite be too sii Ar, be nga ve bia nkañesane ya lôte mesi map. Eyoñe te bia ye dañe Yordan a ke e si Nti, e Zambe wongan a ve bia.

³⁰ Ve njô bôte Sihoñ a nji ve bia nkañesane ya lôte si jé; a nya ajôô a ne na Nti, e Zambe wônan a nga bo nye ntip, nalé mia ye bo nguleya nyoñe si jé, nje mi too a kui môse ya den.

³¹ Nti a nga jô me na: Vôʼôlôʼô, ataté éyoñe ji, ma ve Sihoñ a e si jé éjôé jôé. Tataʼane nyoñane mesi valé.

³² Ane Sihoñ a nkane bita wé be nga zu wosane bia e Yahas.

³³ Nti, e Zambe wongan, a nga bo na bi dañ: bi nga bôme be, émien, bone bé, nkane bita ôse.

³⁴ Eyoñe te ébien nje bi nga mane nyoñ bitisone biabe bise; bi nga mane tyame bie bise, a mane fe wôé befam, binga a bongô; bi nji ke liʼi môte wua vevee.

³⁵ Bi nga nyoñe foʼo ve mimbame biyem a akum ese bi nga koone de e bitison bi nga nyoñ.

³⁶ Teke tison éziñ é mbe abime nguleya tebe ôsu viangan: ataté tisone Aroér, é ne mbiʼili Arnon, a tisone foʼo é ne e mbiʼili te fe, a kui si ya Galad. Nti, e Zambe wongan, a nga ve bie e mo mangan.

³⁷ Ve bi nji ke nnambe bifuse bi si bone bʼAmon: bi nga jôʼé e si ése é ne ôsôé Yabôk e mfaʼa jôp da tôô, nalé fe bitison bi ne e si minkô, a mevôme Nti, e Zambe wongan, a nga ve atiñe na bi bo te nnambe.