DANIEL 8 - Bible en langue Bulu

Nyenane baa: Nnôme ntômba a nnôm ékela

¹ E mbu lale Beltsazar a nga jôô, ma Daniel, me nga yene mfefé ñyenan e mvuse wu yʼôsu.

² Me mbe me fombôʼô, éyoñe ñyenane te, a yen vʼane nge me ne e Suz, nlô tisone yʼéfas éjôé yʼElam. Nyenane te été, me mbe mfôm ôsôé ba loone Ulayi.

³ Eyoñ me nga bete mis, me nga yene nnôme ntômba a tele mfôm ôsôé valé, a beʼe minlaʼa mibaé. Minlaʼa mite mibaé mi mbe ôyabe yôp, ve nlaʼa wua ô dañe wu ôvoʼo ôyabe yôp, a wu ô nga dañ ôyabe yôp ñwô ô nga suʼulane kui.

⁴ Me nga yene nnôm ntômba a wuʼa minlak mfaʼa jôp da dim, mfaʼa yʼakôé a mfaʼa ya nké. Teke tite fe éziñ é mbe nguleya jibi nye, a teke môt a mbe nguleya nyii môt e mo mé. Avalʼese a kômbô, nde a mbe a boʼok a ngule jé é mbe ve yaé yaé.

⁵ Awolo me mbe me fasek jôm me nga yen nje nnôm ékela a nga so mfaʼa jôp da dim; a nga tyele si avôl avôl, mebo te nnambe tyia, angônda nlak a too nye e zañe mise mebaé.

⁶ Nde a kui bebé nnôme ntômba me nga yen mfôm ôsôé a beʼe minlaʼa mibaé, ve jimbi nye a ngul ése.

⁷ Me nga yen ane a kui nnôme ntômba bebé, ve jimbi nye, a buʼu nye minlaʼa mié mibaé. Ve wua nnôme ntômba si, nnôme ntômba nyô, te nguleya jibi nye, a tibi nye a mebo; teke môt a mbe nguleya vaa nye e mo mé;

⁸ ngule nnôm ékela é nga bo ve yaé te bulane mvus. Vʼéyoñ a nga kui abôbône ya ngule jé, nde beta nlak a nga buʼi atemetem; minlaʼa mife minyin mi nga kui e vôme wuna ô nga too mi lôô mfaʼa mekuʼu menyine ya si nyô.

⁹ Mfefé nlak ô nga kui, ô soʼo nlaʼa ô nga dañe tyôtyoé ya minlaʼa minyine mi, ngule jé ve zu yiane mfaʼa ya nké, mfaʼa jôbe da tôô a mfaʼa si ja dañ abeñ.

¹⁰ Nlaʼa te ô nga wosane beéngele ya yôp, a wua abui yʼété si, nalé fe abui ateté a tibi de a mebo.

¹¹ A nga wosane fe jaʼane évete beéngele ya yôp, a vaa bityiʼa be mbe be vaʼa nye môs ôse, ve ndamane vôme wé a nʼétyi.

¹² Beéngele ya yôp be nga veban e mo mé éyoñe jia, baa be bityiʼa ya môs ôse, amu mbia mboone nlaʼa te. Nlak ô nga wua mbamba nkañane Zambe si. E jam ése ô nga bo e nga wulu mvoʼé .

¹³ Eyoñe te me nga wôʼô Engele a kobôʼô. Mfe a nga sili nye na: E mam ñyenan wo liti, ma ye tabe nté ôvé? Nté ôvé mimveane ya môs ôse mia ye bo momo, nalé fe nté ôvé ékotekot ja ndamane mam mese ja ye jôô, a nté ôvé ba ye tibi vôm a nʼétyi a beéngele ya yôp a mebo?

¹⁴ Nde Engele ôsu a nga yalane nye na: Ngôʼé a tyé, toyini ébaé a mintete mila bia yiane taté lôt, éyoñe te ñhe vôm a nʼétyi a ye beta teléban étyi.

Atinane ya ñyenane baa

¹⁵ Ma Daniel, me ngenane me kele ôsu a fombô jam me nga yen, a me jeñe zene ya wôʼô atinane yʼété, nde vevea jôm a funaʼane môt a nga zu tebe ma ôsu.

¹⁶ Nde me nga wôʼô tyiñ é soʼo ôsôé Ulayi é jôʼô nye na: A Gabriel, tame bo môte nyô na a wôk e jam a te yen.

¹⁷ Ane Gabriel a nga subu vôm me nga tele. Amu woñ ô nga bi ma, nde me nga ku asu e butu si, vʼa nga jô me na: A Daniel, ô ne ve môt; ve tame yeme na, ñyenane te ô ne ajô susuʼa biyoñ.

¹⁸ Nté a mbe a kobôʼô ma, asu dam dʼe butu ve si, a me nga dimili fek. Nde a nga bi ma a beta telé ma tetele.

¹⁹ Nye me na: Ma zu kulane wo jam da ye boban éyoñ é ne ntelan, éyoñ ayaa Zambe da ye man.

²⁰ Nnôme ntômba wo te yen a beʼe minlaʼa mibaé a ne ndeme ya bijôé ya Méde a Perse.

²¹ Nnôm ékela a nʼéjôé Begrék; beta nlak e zañe mise mé a ne ndeme njô bôt ôsu.

²² Eyoñe nlak ô nga buʼi, minlaʼa mife minyin mi nga faa vôm ate: Bijôé binyin bia ye nyoñ éjiane ji yʼôsu mbie le, ve teke kui ngu ane énjé.

²³ Eyoñe bijôé bite bia ye kui asuʼu dap, a bebo abé ki be tulane mboon abé wop ôkup, njô bôt a ne mbia anyu a ôkup mfaʼa ya meduʼan a ye kuu.

²⁴ Ngule jé ja ye yaé, jame te teke so be émien. A ye bo éndaman bôt ve semé. Jam ese a ye bo da ye wulu mvoʼé a kui vôme ya mane jiane biwôlô bi bôt a ayoñe ya ba be nʼétyi.

²⁵ Amu atyeñe dé, a ye kui na a duʼu bôte bevok. E mebune mé été, a ye jian abui bôt da buni na e too mvoʼé te jôme ya ko woñ, a a ye wosane njô bôte ya bejô bôt. Eyoñe te ñhe ba ye buʼu nye, môt éziñ te futi mo mé été.

²⁶ Nkôñelane ya buni mfaʼa jam ô nga yen ajô mimveane ya mamengôʼé a mametyé ñwô le, ve baʼaleʼe ñyenane wu nsolan, amu wo fombô melu me ngenan ôyap.

²⁷ Eyoñe te nje ma Daniel, me nga suʼulan a me nga kon nté éziñ. Eyoñ me nga beta bo mvoʼé me nga beta taté mboon ésaé jam e be njô bôt. Ve da na, ñyenane wu ô kele ôsu a ndeñele ma nsisim , amu me mbe teke tuʼa wôʼô wô.