DANIEL 6 - Bible en langue Bulu

¹ A Darius, mone Méde a nga bet éjôé a too mimbu mewôm mesaman a mibaé.

Besiñe be Daniel ba lame nye ôlam

² Darius a nga yene mvaé ya telé bengovina ya bifase bijôé tañe ntet a mewôm mebaé be jôô señe jé e mevôm mese yʼéjôé jé.

³ A nga telé fe beta bivete bilaa, bengovina ntet a mewôm mebaé be mbe éjôé jabe si. Ajô te môt éziñ a nji fe bo nguleya ndeñele jam da fombô mfi njô bôt. Daniel a mbe wua ya beta bejôô bete belaa.

⁴ Daniel a mbe a dañe beta bivete bivoʼo bibaé a bengovina, amu a mbe a yeme abui mam, jame te e nga tindi njô bôte na a ve nye ésaé ja fombô ngum éjôé ôse.

⁵ Eyoñe te beta bivete bivok a bengovina be nga jeñ nge Daniel a nga bo bikobe biziñ bi ne soo njuk e be ngum éjôé ôse, ve be nji yen ékob éziñ, nge ateʼe éziñ, amu Daniel a mbe nya zôsôô : Jame ya ve nye bijô e nji bo be nye.

⁶ Ane bôte bete be nga jô bebiene na: Bia ye bo teke jame ya ve Daniel mekua, nga ve bia jeñe jam éziñ da lat a metiñe ya Zambe wé.

⁷ Teke yange, beta bivete bite bibaé a bengovina be nga ke be njô bôt, a jô nye na: A njô bôte Darius, tabeʼe nnôm éto!

⁸ Beta bivete yʼéjôé, bi bi nʼabe biwôlô, bengovina, betebʼôsu yʼéjôé, a benya bôtô yʼéjôé, ba te tabʼékôan, nde ba sili wo ô bo jame di na: O nyoñe ntyiʼan njô bôt, a mialane wô avale di na: Tañe melu mewôm mela, môt ase a ye yeʼelane zambe nge môte mfe a nji bo wo, a njô bôt, ba ye wua nye ébé bengbwegbwem.

⁹ Ajô te, a njô bôt, a ntoo ve nyoñ atiñe te a sane de, nalé ba ye bo te beta tyendé de aval atiñe Beméde a Bepers e né, teke atyendé.

¹⁰ Eyoñe te njô bôt Darius a nga san atiñ .

Ba wua Daniel ébé bengbwengbwem

¹¹ Eyoñe Daniel a nga wôʼô na aval atiñe te e maneya saneban, a nga bulane nda jé. A too étune ya yôp, nde a nga yoé bevundi be lôô mfaʼa Yérusalém a né. Vôm ate nye a nga boʼo a kute meboñe si a kañe Zambe wé, môse wua biyoñ bilaa, aval a mbe a boʼo biyoñ bise.

¹² Ane besiñe bé be nga so avô, a koone nye a yeʼelan a loone Zambe wé.

¹³ Nde be nga ke be njô bôt a jô nye na: A njô bôt, ye ô nji san atiñe na: Nté melu mewôm mela, môt ase a ye yeʼelane zambe éziñ, nge môta biname mfe a nji bo wo, ba ye wua nye ébé bengbwengbwem? Njô bôte nye na ntyiʼane te foʼo le avalʼane atiñe Beméde a Bepers e né te atyendé.

¹⁴ Bôte bete be na: A njô bôt, Daniel, wua ya minkôm mi nga so si ya Yuda a nji semé toʼo wo, toʼo atiñ ô nga san; a yeʼelane Zambe wé biyoñ bilale môs .

¹⁵ Eyoñe njô bôt a nga wôʼô mejô te, a nga dañe wôʼôlun, a jeñe nlô été na a nyii Daniel. A kui éyoñe jôp da dim, a nga jeñe zene ya nyii nye.

¹⁶ Ve besiñe be Daniel be nga beta zu teke yange a jô njô bôte na: A njô bôt, wo tuʼa yem atiñ Beméde a Bepers na, atiñ nge ntyiʼane njô bôt ô se nguleya tyendéban.

¹⁷ Amu abendé njô bôt, nde be nga zuu Daniel a wua nye ébé bengbwengbwem. Njô bôt a nga jô nye na: Zambe wôé étam, nyô wo saane nye a mban ôse, nye a ne nguleya nyii wo.

¹⁸ Be nga futi beta akok mbé yʼébé. Njô bôt a nga futi sitame wé émien akoʼo te yôp, nalé fe sitame biwôlô bebo bisaé bié, nalé môt éziñ a ye bo te tyendé jam éziñ mfaʼa Daniel.

¹⁹ Ane njô bôt a nga bulane nda jé; a nga bômbô zaé a bômbô fe énoñ étam, a nji ke buti ôyo dis.

Daniel a kôlô ébé bengbwengbwem mvoʼé mvoʼé

²⁰ Ndibe tyé, njô bôt a nga kôlô si a jiʼa ke ébé bengbwengbwem.

²¹ Eyoñ a nga kui je bebé, a nga loone Daniel a tyiñ ôlun: a Daniel, mbo ésaé vevea Zambe, ye Zambe wôé wo saane nye a mban ôse a te kui na a vaa wo e menyu bengbwengbwem?

²² Daniel a nga yalane nye na: A njô bôt, tabeʼe nnôm éto!

²³ Ya, Zambe wom a te lôme éngele wé a dibe menyu bengbwengbwem a be nji bo ma mbia jam éziñ. E ne bebela na, me nji bo bijô biziñ e be Zambe, a me nji bo ékob éziñ mfaʼa wôé!

²⁴ Nde njô bôt a nga jô na, be vaʼa Daniel ébé bengbwengbwem mevak njalane nlem . Eyoñ a kôlôya, be nga yene nye teke aveñ, amu a nga too ndi nleme be Zambe.

²⁵ Njô bôt nye na, be bi bôt be nga koñe Daniel; nde be nga wua be ébé bengbwengbwem ba be binga bap a bone bap. Ane bengbwengbwem be nga bi be, a bôé be bives, te na be kui ébé si.

²⁶ Ayap e lôteya, ane Darius a nga lôme foé nyô e be bôt mevale mese, meyoñ mese a minkobô mise be too si nyô na: Mvoʼé é boʼo be mia abui abui!

²⁷ Ma ve atiñe na: E si jam ése ma jôô, môt ase a yiane liti ntut ésemé e be Zambe Daniel. A ne vevea Zambe, nyô a ye tabe nnôm éto. Njôane wé wo ye bo te man, ndañane wé wo ye tabe nnôm éto.

²⁸ Aval a kôté nde fe a nyii, a bo mesimba a bitua bi mam e yôp été a e si nyô. Bebela na, Nye a te nyii Daniel e biaé bengbwengbwem.

²⁹ Asuʼulan Daniel a nga bi beta éto éjôé Darius a ji Sirus, njô bôte ya Perse.