DANIEL 5 - Bible en langue Bulu

E beta dina Baltazar

¹ Môs éziñ njô bôte Beltsazar a nga bo beta dina asu biwôlô bebo bisaé bié, be mbe toyini, ane a nga nyu woon be too.

² Eyoñ a maneya nyu woon, nde a jô na be zuu nye bilaé bi mvot a silba ésaa wé Nébukatnétzar a nga nyoñ e nda Zambe ya Yérusalém. A nga kômbô belane bie, asu ya nyu, baa be biwôlô bebo bisaé bié, binga bé a bibone bié.

³ Nde ba ke soo bilaé bi mvot bi nga so nda Zambe, e Yérusalém, njô bôt ve zu belane bie ba be bôte bese a nga bañete.

⁴ Eyoñe nyuan ô maneya, be ve zu taté na ba yia bia bezambe be or, argent, mvot, étyé, bilé a mekok .

⁵ Awolo te ebien, akule wo ve zu yené bebé ébeʼe belambe. De ve zu taté na da tili éfumulu mfine ya nda njô bôt.

⁶ Eyoñe njô bôt a yen ane wo te wo tili, nye ve zu tabʼéyôé a ko woñ asimesane dé été; ateʼe ve bi nye angeteñ a meboñ.

⁷ Njô bôt, ve zu bete tyiñe ngu na be loone beyeme ya Babilôn, bebo majik, befas ateté a mimvimviʼi, nde a jô be na: Môt a ye yeme lañe ntilane wu a kate ma atinane yʼété, ba ye jalé nye ngômesane melitan, ba ye jalé nye nsanga or tyiñ a éyoñe te a ye bo wua ya bengovina bʼôsu yʼéjôé.

⁸ Beyem bese be mbe be saane njô bôt be nga zu, ve teke wua a nga bo nguleya lañe ntilane te nge kate njô bôt atinane yʼété.

⁹ Eyoñe te njô bôte Beltsazar a nga tuʼa dañe ko woñ; biwôlô bebo bisaé fe bi mbe feʼe ne vema.

Daniel a ve atinane ya ntilan

¹⁰ Eyoñe nyia njô bôt a nga wôʼô miñyône njô bôt a biwôlô bebo bisaé bié, a nga nyiine nda dina a jô na: Enyiñe njô bôt é boʼo ayap! Asimesane dôé e boʼo te bo na ô ko woñ, nge dimili nyôle ya ékôbe jôé.

¹¹ Amu môt a ne éjôé jôé été a too njalan a nsisime bezambe be nʼétyi. Melu ésoo a nga too be nga yene na a yeme fase mam, atyeñ a feʼe bia funane feʼe bezambe bi too be nye. Ajô te ésoo, njô bôte Nébukatnétzar a nga telé nye évete mimvimviʼi, bebo majik, befas ateté a mingengañ.

¹² A bili nsisim wo selan mi mi bôte bevok, wu ya yeme yemelane mam, atyeñ a nguleya ve atinane ya biyeyem, a kulane mesoé me ba a kulane minsolane mi mam. Be tame loone môt ate, Daniel, nyô njô bôt a nga yôlé jôé na Beltsazar: a ye kulan atinane ya ntilane te.

¹³ Nde be nga zuu Daniel be njô bôt, nye ki ve sili nye na: Ye wo ô ne Daniel, nkôme mone Beyude ñwô njô bôt ésaa wom a nga soo wô si ya Yuda?

¹⁴ Me wôʼôya na ô ne njalan a nsisime ya bezambe, a na, wo yeme fase mam, atyeñ a feʼe ja selane bôte bevoʼo bese.

¹⁵ Be ndôme soo ma beyem a bebo majik na, be lañe ntilane wu a ve ma atinane yʼété, ve be nji bo nguleya bo jame te.

¹⁶ Ve be kateya me na, ô ne nguleya kulane mesoé me ba a kulane minsolane mi mam. Nge wo kui na ô lañe ntilane wu, a ve ma atinane yʼété, ba ye jalé wo mengômesane melitan, a jalé wo nsanga or e tyiñ , a wo ye bo wua ya minlô mi bôte yʼéjôé.

¹⁷ Daniel nye njô bôte na: A njô bôt, tame baʼale memvaka a bifaʼé asu dôé, nge ve bie bôte befe. Ve da, ma zu lañe ntilan a kate wo atinane yʼété.

¹⁸ Zambe a dañ ôyabe yôp, a nga bo ésoo Nébukatnétzar beta njô bôt, njalan a duma a éjijin.

¹⁹ Amu anen a nga nyoñe be Zambe ate nde bôte ya mesi mese, meyoñ mese, a minkobô mise be mbe be fôʼôbaʼan asu dé. A mbe a vaʼa mekua yʼawu e be môt ase a kômbô, a jôkéʼé ki môt ase émien a kômbô na a nyiñ; a mbe a neneʼe nge sili nyô émien a kômbô sili si.

²⁰ Vʼa nga suʼulane bo mebun, njalan a nkobô ébiasé; ajô te Zambe a nga vaa nye éto njôane jé, a vaa nye duma.

²¹ Be nga titane nye vôme bôt be too a bo nye na a nyiñ ane betit; ba be bijakase ya fé be nga tabe vôme wua, a jaʼa bilok ane benyak, mfô a botéʼé nye nyô. A nga tabe nalé a kui môs a nga yeme na Zambe a dañ ôyabe yôp a ne Njôô ya bejô bôt a a telé môt émien a kômbô na a bo njô bôt.

²² Wo, Beltsazar, mone wé, wo ô too ô tukaʼa yeme mam mete mese, ve da na ô nji sili womiene si.

²³ O soñeya Zambe ya yôp éyoñ wo te loone bilaé bi nʼétyi bia so nda jé, a mbie mia te belane bie asu ya nyu bilam, womien, biwôlô bebo bisaé biôé, binga bôé a bibone biôé. Jam afe na wo te lomé bia bezambe be silba a or, mvot a étyé, bilé a mekok , bezambe be ne te yene jôm, te wôʼô jam, te yeme jôm; a wo te bene ve Zambe a bili ényiñe jôé a asuʼulane dôé e wo wé été duma.

²⁴ Ajô te Zambe a te lôme akule wo e tili ntilane wu.

²⁵ Jam e ne ntilan nde di: Mené Mené, Tekel u Parsin.

²⁶ Atinan e ne na: Mené a tinane na nlañan: Zambe a maneya lañ njôane wôé tañ a kui wô nné.

²⁷ Tekel a tinane na: Mveʼan, be maneya veʼe wo kop a yene na ô nji bo adit;

²⁸ Perés a tinane na: Nkaban, njôane wôé ô ntoo nsalane zañ, asu ya veban e be beméde a Bepers.

²⁹ Awolo te ebien, nde Beltsazar a nga jô bebo bisaé bé na be jalé Daniel mengômesan melitan a jalé nye nsanga or e tyiñ . A nga bo fe foé é katebane na, Daniel a ntoo wua ya betebʼôsu yʼéjôé be tele ôsu.

³⁰ Alu e nga tôñe valé, Beltsazar, njô bôte ya Babilôn a nga wôéban.