DANIEL 3 - Bible en langue Bulu

Mvinda ya kañe éveʼela or

¹ Njô bôte Nébukatnétzar a nga bo éveʼela or é too ôyabe yôp méta mewôm mela, ndam méta éla a telé je e njeʼese Dura, éfuse si ya Babilôn.

² Ane a nga bañete bivet, benya bôtô, bejôô, betyiʼi mejô, bebaʼale akum, bebôndé mefek, bekobô mejô a bejôô bese ya biwôʼô bijôé na, be zu tabe beta ékôane ya telé éveʼela njô bôt a nga bo ngume ntelan.

³ Ajô te beta biwôlô bebo bisaé bete bese be nga sulan a tabe ôsu éveʼela asu abôʼô ya telé je ngume ntelan.

⁴ Môt a wulu tebe yʼékôan a nga yôtane tyiñe ngule na: Mia bôt mevale mese, a minkobô mise, vôʼôlaʼan abendé di na:

⁵ Eyoñ mia ye wôʼô tyiñe toñ, mfañ, mvet, ntyam ateba, ndeñge, éloñ, biôm ba bôm mevale mese, mia ye kumbu si a kañ éveʼela or nje Nébukatnétzar njô bôt a maneya telé.

⁶ Môt ase a ye bo te kumbu si a kañ ba ye wua nye e mbeʼe nduan awolo te ebien.

⁷ Ajô te awolo bôte bese be nga wôʼô tyiñe toñ, mfañ, mvet ntyam ateba, ndeñge, biôm ba bôm mevale mese, be nga kumbu si a kañ éveʼela or Nébukatnétzar njô bôt a nga telé.

Bemvôé be Daniel ba ye kañe ve Zambe

⁸ Awolo te ebien nde bôte bʼéziñe ya Babilôn be nga somane Beyude

⁹ a jô Nébukatnétzar njô bôte na: A njô bôt tabeʼe nnôm éto!

¹⁰ A njô bôt, womien ô nga ve abendé na: Môt ase a ye wôʼô tyiñe toñ, mfañ, mvet, ntyam ateba, ndeñge, éloñ, biôme ba bôm mevale mese, a yiane kumbu si a kañ éveʼela or,

¹¹ a na, nyô ase a bo te kumbu si a kañ, ba ye wua nye ézezañe mbeʼe nduan.

¹² Ve Beyude bʼéziñ ô nga ve bisaé éfas éjôé ya Babilôn: Sadrak, Mésak a Abéd-Négo, bôte bete be nji bisi abendé dôé, a njô bôt, be nji saane bezambe bôé, nge kañ éveʼela or ô maneya telé.

¹³ Ane Nébukatnétzar a nga wôʼô mbia ôlun a bendé na be zuu nye Sadrak, Mésak a Abéd-Négo. Eyoñ be soya be a telé be ôsu njô bôt,

¹⁴ Nébukatnétzar a nga kobô a sili be na: A Sadrak, Mésak a Abéd-Négo, ye bebela na, mia bene saane bezambe bam a kañ éveʼela or me maneya telé?

¹⁵ Eyoñe ji, tabaʼane nkômane na éyoñ mia ye wôʼô tyiñe toñ, mfañ, mvet, ntyam ateba, ndeñge, éloñ, biôm ba bôm mevale mese, mia ye kumbu si a kañ éveʼela me maneya bo. Nge nalé momo wôna awolo te ebien, ba ye wua mia ézezañe mbeʼe nduan. Zambe mbé a ye bo nguleya nyii mia e mo mam?

¹⁶ Sadrak, Mésak a Abéd-Négo be nga yalane njô bôt Nébukatnétzar na: Bi nji kômbô yalane wo jam éziñ ajô di.

¹⁷ Ve yeme na: E Zambe wongan, nyô bia saane nye, a ne nguleya nyii bia. Yaa a njô bôt, a ye kôté bia e mbeʼe nduan a e mo môé.

¹⁸ Toʼo ki a nji kômbô nyii bia, ve a njô bôt, yeme na, bia ye bene saane bezambe bôé a bene kañ éveʼela or ô maneya telé.

¹⁹ Eyoñe te Nébukatnétzar a nga jaé ne lut a ôlun, teke fʼajibi mfaʼa Sadrak, Mésak a Abéd-Négo, nye na be kôbane mbeʼe nduan ô bo ayôñ tañe biyoñe zamgbwa, a dañ abime be nga bo be boʼok.

²⁰ Nde a jô biwôlô bezimbi bivoʼo ya nkane bita wé na, be kaʼa Sadrak, Mésak a Abéd-Négo a wua be ayôñe mbeʼe nduan.

²¹ Be nga kaʼa bôte bete, be beʼe mengômesane map: bizingi, melôʼô a mengômesane map mefe a wua be ézezañe ayôñe mbeʼe nduan.

²² Amu abendé njô bôt e nga dañe ngu a amu mbeʼe nduan ô nga dañ abui, nde nkabaʼa nduan ô nga wôé bôt be nga wua Sadrak, Mésak a Abéd-Négo e mbeʼe nduan été.

²³ Wôna bôt bete belaa, Sadrak, Mésak a Abéd-Négo, be nga ku tem nduan été be too nkaʼan.

Bemvôé belaa ba nyiiban e mbeʼe nduan

²⁴ Atemeteme na njô bôte Nébukatnétzar a nga kôlô si, feʼe ne vema, a sili bôte bé yʼéjôé na: Ye bi nji wua bôte belaa nkaʼan e nduan? Be na: Nalé foʼo a njô bôt.

²⁵ Njô bôt nye na: Ve me lô bôte benyin, teke nkaʼan, be wuluʼu ézezañe nduan. Teke môt éziñe yʼété a beʼe éveʼela aveñ. A môta nyini a funaʼane zambe éziñ.

²⁶ Nébukatnétzar ve subu bebé e mbé mbeʼe nduan a jô tyiñe yôbe na: A Sadrak, Mésak a Abéd-Négo, bebo bisaé be Zambe a dañ ôyabe yôp, kuan atan mi zu nné!

²⁷ Nde bivet, benya bôtô, bejôô a bebôndé mefeʼe be njô bôt, be nga bômane be a yene na nduan é nji nnambe menyôle me bôte bete, a yene fe na, ésile ya minlô miap é nji ke dik, mengômesane mabe fe teke ndaman, ényume nduan ébien teke nnambe be.

²⁸ Nébukatnétzar ve bete tyiñ nye na: Duma e boʼo be Zambe Sadrak, Mésak a Abéd-Négo, nye a te lôme éngele a kôté bebo bisaé bé. Ba te tabe nye ndi. Ba te tyam abendé njô bôt a kañese ékpweʼele ya menyôle map, sa na be saan, a kañe zambe mfe, éjiane Zambe wop.

²⁹ Ajô te, ataté éyoñe ji, atiñe dam e ne na: Môt ase, toʼo a ne mbé , ayoñ avé, nge nkobô ôvé, a ye kobô Zambe Sadrak, Mésak a Abéd-Négo ébiasé, a ye tyiʼibane bifus, nda jé fe ja ye bo avise mbuan, amu Zambe mfe a ne nyii bôt ane Nye, a nji bo.

³⁰ Mvuse éte nje njô bôt a nga ve Sadrak, Mésak a Abéd-Négo bito bia dañe ngu éfas éjôé ya Babilôn.

Biyeyeme baa njô bôt: Beta élé

³¹ Njô bôt Nébukatnétzar a nga lôme foé nyô e be bôt mevale mese, meyoñ mese, a minkobô mise mbe be too si nyô ése nye na: Mvoʼé é boʼo be mia abui abui!

³² Ma yene mvaé ya bo na bôt be yem mesimba me mam a bitua bi mame Zambe a ne ôyabe yôp a boya mfaʼa wom;

³³ mesimba me mam mé me nʼangôndô yʼanen! Bitua bi mame bié bi nʼangôndô ya ngu! Zambe ate a ye jôô nnôm éto, njôane wé ô too a kui miaé mise!