DANIEL 2 - Bible en langue Bulu

Biyeyeme njô bôt a nga Taté yem

¹ Mbu baa ya njôane wé, ñwô Nébukatnétzar a nga yeme biyeyem, biyeyeme bite bi nga ndeñele nye nsisim , te fe nguleya beta ke ôyo.

² Ane njô bôt a nga bendé na be loone mimvimviʼi, bebo majik, mingbwengbwee, beyeme mam mevale mese, be kate nye biyeyeme bié. Eyoñe be soya a tebe asu njô bôt,

³ nde a jô be na: Ma te yeme biyeyem bia ndeñele ma nsisim abui: ma kômbô mi kate ma bie.

⁴ Beyem be nga yalane nye nkobô aramééñ na: Enyiñe njô bôt é boʼo ayap! Kate bebo bisaé bôé biyeyem wo te yem, bi kate wo atinane yʼété.

⁵ Njô bôte nye na: Me maneya tyik avale di na, nge mi bo te kate ma biyeyem a atinane yʼété, mia ye tyiʼibane bifuse bifus, a menda menan ma ye bo ve mevise me mbuan.

⁶ Ve nge mia kate ma biyeyeme a atinane yʼété, ma ye ve mia abui memvaka a duma e nʼanen. Ajô te katane ma biyeyem a atinane yʼété.

⁷ Beyem bete bese be nga yalan éyoñe baa na: Njô bôt a tame ñhe kate bebo bisaé bôé biyeyeme biôé, a bia ki bia ye kate wo atinane yʼété.

⁸ Njô bôt nye na: Ma yeme foʼo na mia yi na éyoñ é lôt abui amu mia yem e jam me maneya tyik.

⁹ Ve nge mi bo te kate ma biyeyem bite, wôna melep ma ye bo avale da e be mia bese, amu mi maneya kui tyiñe ya kobô minsos a meduʼan mfaʼa wom, mi yangeʼe ke na éyoñ é lôt. Ve me ma kômbô na mi, kate ma biyeyeme ma te yem, éyoñe te fe ma ye yeme na, mi ne kate ma atinane yʼété.

¹⁰ Beyem be nga yalane na: A njô bôt, teke môte ya si nyô a ne bo e jam wo sili; nalé fe na: Njô bôt éziñ, toʼo a nʼéwôlô abui, nge ngu, a ngenane te tame sili mvimviʼi, mbo majik nge nnem avale jam wo sili di.

¹¹ Jame njô bôt a sili e ne ayaé; teke môt éziñ a ne nguleya kate wo de ve bezambe: Ba be bôte ki be nji tabe vôme wua.

¹² Eyoñe te ñhe njô bôt a nga dañe wôʼôlun, ve ve atiñe na, be mane wôé beyeme bese ya Babilôn.

¹³ Ane ntyiʼane ya wôé beyeme bese ô nga kateban vôm ase; be nga jeñe fe Daniel a bemvôé bé na be wôé be.

Zambe a kulane Daniel biyeyeme bi njô bôt a atinane yʼété

¹⁴ Eyoñe te Daniel a nga kobô Aryok, évete bezimbi be njô bôt, nyô a nga yiane wôé beyeme ya Babilôn, a nga kobô nye a ntyel a fek

¹⁵ a jô nye na: Amu jé ntyiʼane njô bôt ô ne abime ngule di? Nde aryok a nga kate Daniel jam e né.

¹⁶ Awolo te ebien, nde Daniel a nga ke be njô bôt asu ya yeʼelane nye na, a ve nye éyoñ, a ne zu kate nye biyeyem a atinane yʼété.

¹⁷ Eyoñ a bulane nda jé, nde Daniel a kate bemvôé bé Anania, Mikaél a Azaria jame te;

¹⁸ nde fe a jô be na, be sili mvame Zambe ya yôbe na, a kulane be nsolane biyeyem ôte, ndemben ba ye bo te wôéban ba be beyeme mam bevoʼo ya Babilôn.

¹⁹ Ane nsolane jam ô nga kulubane be Daniel e biyeyem a alu. Daniel nye ve taté na a kañe Zambe ya yôp,

²⁰ nye na: jôé Zambe da yian ékañaʼa, ataté nnôm éto a kui nnôm éto! Fek a ngu bi nʼémbié.

²¹ A ne njôô ya biyoñ, a nyô ya mam ma bobane biyoñ, aval a vaa bejô bôt, nde fe a telé be; e Nye a ve mimfefeʼe fek a ñyemane mam, e be ba be ne mintyetyeñ.

²² Nye a kulane mam me nʼédok a nsolan; a yem e mam me ne e dibi été, a éfufup ja bômane nye.

²³ A Zambe ya bʼésaa bam, ma kañe wo a ve wo akéva, amu fek a ngu ô veya ma, amu ô boya na, me yem e jam bi nga sili wo, a ô kulaneya bia e jam da tyelé njô bôte nleme yôp.

²⁴ Mvus éte nje Daniel a zu ke be Aryok, e môte njô bôt a nga bendé na, a wôé beyeme ya Babilôn, a jô nye na: Te bo na beyeme ya Babilôn be wôéban. Kele ma e be njô bôt, me kate nye atinane ya biyeyeme bié.

²⁵ Nde Aryok a jiʼa kee Daniel e be njô bôt a jô nye na: E be minkôme ya Yuda été, me yeneya môt a ye kate njô bôt atinane ya biyeyeme bié.

Daniel a kañete biyeyeme bi njô bôt

²⁶ Njô bôt nye Daniel a mbe jôé afe na Beltsazar na: Ye ô ne foʼo nguleya bo na me yem biyeyeme ma te yem atinane yʼété?

²⁷ Daniel a nga yalane nye na: Befas ateté, bebo majik a mimvimviʼi be se nguleya kate njô bôt nsolane jam a kômbô yem.

²⁸ Ve Zambe a ne yôp, Nye a kulane minsolane mi mam, nye a bo na ô yeme jam da ye bobane melu ma zu. Biyeyem ô nga yem ô too ôyo mbie bi:

²⁹ A monti njô bôt, éyoñ ô nga bômbô si, ô nga taté na wo simesane mame ya melu ma zu. Nde nyô a kulane minsolane mi mam, a nga liti wo jam da ye boban.

³⁰ Nge nsolane jame te ô nga kulebane be ma, nalé a nji boban amu na, me bili fek ja dañe nyô ya bôte bese be vee, vʼamu na, môt éziñ a kate wo atinane ya biyeyem, a na, ô yem asimesane ya e nleme wôé.

³¹ A Monti njô bôt jam ô nga yen nde di: O nga yen étua beta éveʼela é tele wo ôsu é too aval étôtok ja wôé mis, é too fe ékowoñ.

³² Nlô ya éveʼela te ô mbe nya or, nkuk a mo bi too argent, abum a mebé ki mvot;

³³ mebo me too étyé, éfase mekule mebo jia é too étyé, ji évoʼo ki ndiʼane tyia.

³⁴ Ô nga nyeʼe ô lôô éveʼela te, akekui éyoñe akok e nga famé e nkôle yôp, môt éziñ momo, a jimbi mekule mebo mʼétyé a ndiʼane tyia mʼéveʼelaʼa te, a tyaʼa me.

³⁵ Nde éyoñe jijia étyé, ndiʼane tyia mvot argent a or bi nga veñesane mbuluk, ñwô évuñulu é nga mialan ane bivio bia yele vôme ba tyaʼa bidi. Nde éveʼela ése é nga mane jañ jôm te liʼi. Vʼakoʼo e nga jimbi éveʼela, e nga veñesane beta nkô a yiane si ése.

³⁶ Biyeyem ô nga yeme le, a njô bôt. Atinane yʼété ki nde di:

³⁷ A njô bôt, ô ne njôô ya bejôô, amu Zambe ya yôp a veya wo njôan, duma, ngu a étôtok;

³⁸ a futiya bôt, betit a anoñ éjôé jôé si: E vôm ase be né, wo ô ne masa wop. Ajô te a njô bôt, wo ô ne nlô or!

³⁹ Mvuse jôé éjôé éfe ja ye tebe te dañe ngu anʼéjôé; wôna mvuse valé éjôé lale ja ye tebe nje ja ye bo mvot a dañe si ése.

⁴⁰ Ejôé nyini ja ye tebe é too ngu anʼétyé; avalʼétyé ja fit, ja miat a koʼo jôm ése, avale te éjôé te ja ye fit a koʼo bijôé bi ne je ôsu.

⁴¹ Wôna, aval ô nga yene mekule mebo a anyu ya mebo, éfase jia ndiʼane tyia, ji évoʼo ki étyé, nde éjôé te ja ye salé zañ; ve jôm éziñe ya ngul étyé ja ye bo été amu ñyenan ô nga yen étyé mbundaʼan a ndiʼane tyia.

⁴² A mbôlô anyu ya mebo e mbe éfase jia étyé, ji évoʼo ki ndiʼane tyia, éjôé te ja ye bo ngu éfase jia, a éfas évoʼo ki teke tabe.

⁴³ O nga yene étyé mbundaʼan a ndiʼane tyia amu bejô bôte ya bijôé bite ba ye bo bilat a zene ya meluk. Ve bilate bite bia ye bo teke tabe, avale fe étyé ba ndiʼane tyia be se nguleya fulan.

⁴⁴ Melu ya bejô bôte bete, Zambe ya yôp a ye telé éjôé ja ye bo teke tyamban, a éjôé te ja ye bo teke éjôé yʼayoñ afe si, ja ye fit a bo bijôé bite momo; a ébien ja ye tabe nnôm éto:

⁴⁵ Ajô te nde ô nga yen akok e koʼo nkôle yôp môt éziñ momo, a e nga koʼo étyé mvot ndiʼane tyia, argent a or. Zambe a nʼanen a boya njô bôte na, a yeme jam da ye bobane melu ma zu. Biyeyeme biôé bi ne bebela a nkulane yʼété ô ne wu ya buni.

⁴⁶ Eyoñe te njô bôte Nébukatnétzar a nga ku asu e butu si, ve kute meboñ asu Daniel, a bendé na be ve nye bityiʼa beôlobinda.

⁴⁷ Njô bôt nye Daniel na: Bebela na, Zambe wônan a ne Zambe ya bezambe, a Masa ya bejô bôt a, a kulane minsolane mi mam, vôme wo te bo nguleya kulane nsolane jame wu.

⁴⁸ Nde njô bôt a nga nene Daniel a faʼé nye abui a biwôlô bi biôm. A nga telé nye njôô ya éfuse si ya Babilôn a telé fe nye évete nnene ya beyem bese ya Babilôn.

⁴⁹ Daniel a nga yeʼelane njô bôte na a ve Sadrak, Mésak a Abéd-Négo mevôme ya saé éfuse si ya Babilôn. Ve Daniel a mbe mbôndé mefek e nda njô bôt.