DANIEL 12 - Bible en langue Bulu

Biyebe a ényiñ

¹ Engele a nga beta jô me na: Eyoñe te Engele Miké a ye yené, évete ya beéngele, nyô a baʼale bôte bôé. Eyoñe te ja ye bo ji ya minlem mi tyele yôp, avale te e ngenan te tame bo nté ane ayoñ e tabe a kui éyoñe te. Ba bese ya ayoñe dôé môé map ma ye bo ntilan e kalate yʼényiñ ba ye nyiiban.

² Abui bôt e nʼôyo mesoñe si da ye veʼe ôyo, bevok asu ényiñe ya nnôm éto ba bevok asu ôson, asu angôndô ya nnôm éto.

³ Mimfefek mia ye faé a étôtok ane ji ya yôp; mbe be nga volô bôte bevoʼo na be bo te tyendé, ba ye faé nnôm éto anʼateté.

⁴ Wo Daniel, baʼaleʼe foé nyô nsolan, te kulane jam e ne kalate nyô te na, éyoñ yʼasuʼulan é kpwaan. Bôt abui ba ye lañe nye a ñyemane wop wo ye kôʼôlan.

Eyoñe yʼasuʼulan

⁵ Eyoñe te ma, Daniel, me kele ôsu a fombô jam me nga yene, te bôte befe bebaé be nga yené, be tele tetele e minsaʼa mi ôsôé mibaé.

⁶ Wua a nga kobô môt a nga beʼe éfumulu ngômesan a tele mendime yʼôsôé yôp, a sili nye na: Bitua bi mame bi bia ye man éyoñ évé?

⁷ Môt a nga beʼe mengômesan me ndombo a nga bete mo mebaé yôp, a me nga wôʼô a jôʼô na: Ma kane ngana a jôé Zambe a too nnôm éto na: Mame ma ma ye tabe mimbu mila a étun. Ma ye man éyoñe ngule yʼayoñe bôte Zambe ja ye buʼuban ése.

⁸ Ma, Daniel, me nga wôʼô mejô mete, ve teke yeme jôm. Ajô te me nga sili na: A Nti wom, mam mete mese ma ye man éyoñ évé?

⁹ Nye me na: A Daniel, foé nyô ja yiane tuʼa tabe nsolan a kui éyoñ yʼasuʼulan.

¹⁰ Bôt abui ba ye tuneban, fuban, a bo nya mvoʼé amu meveʼele . Mbia be bôt, amu te nguleya yem, ba ye ke ôsu a bo mbia be mame map. Ve mimfefek mia ye yem e jam da lôt.

¹¹ Ataté éyoñe mvean wo veban éyoñ ése wo ye tebe, a kui éyoñe ngunemelan ja jian ja ye teléban e nda Zambe, mimôs mia ye lôt toyini, mintete mibaé a mewôm ébul.

¹² Ebotan a môt a ye yañge a kui mimôs toyini, mintete mila a mewôm mela a mitan!

¹³ Ve wo kelek a kui asuʼulan. Wo ye bi awoʼon a wo ye tebe asu ya nyoñe maʼane môé melu ma suʼulan.