DANIEL 10 - Bible en langue Bulu

Engele a kobô mame ya melu ma suʼulan

¹ Mbu lale Sirus njô bôte ya Perse a nga jôô, foé Zambe é nga litiban e be Daniel, nyô a mbe jôé afe na Beltsazar. Foé éte é ne nyô ya buni, é nga liti mbia minjuk mia zu. Daniel a nga tuʼa fase foé éte a yen atinane yʼété amu ñyenan a nga yen.

² Melu mete, ma Daniel, me nga too meyeb été tañe sondô éla:

³ Teke di jôm éziñ: toʼo tit nge nyu woon, teke tyembane nlô, vʼakekui sondô éla éte é lôteya.

⁴ Ngon ôsu é too melu mewôm mebaé a menyin, me nga too mfôme beta ôsôé ba loone tigre.

⁵ Me fombôʼô ana, nde ma yene môt éziñ a beʼe bifumulu mengômesan, kandé or é tii nye angeteñ.

⁶ Nyôle jé é mbe é funaʼane akoʼo é nʼédima, asu dé vʼane feleves, mise mé me funaʼane bisiʼi bi nduan, mo mé a mebo mé bi vianeʼe ngeñeban ane nséane mvot. Eyoñ a kobô, vʼane wo wôʼô éduñe nkunda bôt.

⁷ Ma, Daniel, me nga yene jame te étam. Bôt be nga bômane ma be nji yene jôm, ve be nga mate ke sobô, amu woñ ô nga bi be.

⁸ Me mbe étame ya yen étua, jame di. Ve ngul é nga kôlô ma nyô, asu dam é tyendé fe, nyô é nga bo ékukut, me suʼulane te fe ngule nyô.

⁹ Me nga wôʼô môt ate a kobôʼô mejô; éduñe ya tyiñe jé é nga bo na me dimili fek, ve ku asu e butu si.

¹⁰ Nde wo wo bi ma a telé me tetele me nyeñebaʼan.

¹¹ Môt ate a nga jô me na: A Daniel Zambe a nyeʼe, vaʼa nguleya wôk atinane ya mejô ma kobô wo. Tebeʼe tetele, amu ba te lôme ma be wo awolo di.

¹² A nga beta jô na: Te ko woñ a Daniel! Ataté môs ôsu ô nga suu womiene si mfaʼa Zambe wôé, a bi nkômbane ya yeme jam da lôt. Zambe a nga wôʼô meyeʼelane môé, a me nga zu na me ve wo éyalan.

¹³ Ve Engele a kamane njôane ya Perse, a nga tebe me ngame yat tañe melu mewôm mebaé a wua, a kui éyoñe Miké, wua ya minlô beéngele, a nga zu volô ma. Ajô te me nga tabe fefele bejô bôte ya Perse.

¹⁴ Eyoñe ji ma zu bo wo na ô yeme jam da ye kui bôte bôé melu ma zu, amu ñyenan ôfe wu ô; fombôʼô éyoñe te.

¹⁵ Eyoñ ése a mbe a kobôʼô ma mejô mete, me nga lôô si, teke nguleya tot éfia jia.

¹⁶ Ve vevea jôme mfe, a funaʼane môt, a nga zu nnambe ma biyaé, éyoñe te me nga bo nguleya beta kui anyu a kobô. Nde ma jô môt a nga tele mʼôsu na: A Nti, amu ñyenane wu, biyebe bia te bi ma, a me ne éyoñe ji teke fe ngu.

¹⁷ Ma me ne teke mfañe môt, me ne nguleya laane Nti wom aya éyoñ me nji beta bi ngu nge mvebe?

¹⁸ Awolo te ebien nde nyô a mbe a funaʼane môt a nga beta nnambe ma asu ya beta ve ma ngu,

¹⁹ a môte mbok a nga jô me na: A môte Zambe a nyeʼe, te ko woñ! Mam mese me ne mvoʼé asu dôé! Betaʼa bi ngule nlem , a beta nyoñe ngule jôé! Nté ôse a mbe a, kobôʼô ma, ngule jame ki é betaʼa bulane be ma. Nde ñhe ma jô nye na: A Nti ô ntoo kobô ma, amu ô beteya ve ma ngu.

²⁰ Nye na: Ye wo yem amu jé ma te zu be wo? Ma te zu kate wo jam e ne ntilan e kalate benya mejôô. Ve da me ngenane me bili na me wosane Engele a kamane Perse, a éyoñ ébien ma zu ke nje Engele a baʼale Grés a so.

²¹ Ve môte mfe a nji volô me na me wosane besiñe bete, ve Miké, Engele a baʼale Israél.