BETYIʼI MEJÔ 9 - Bible en langue Bulu

¹ A nga bo na Abimélék, e monafame Yérubal, a nga ke Sikem, e be bendôm be nyia. Nde a nga kobô bôte bese ya janyañe dé na:

² Ma yeʼelane mia mi jô benya bôtô bese ya Sikeme na: Jé ja dañe mvaé mfaʼa wônan, ye na bôte mewôme zamgbwa, e ne na bobefame be Yérubal bese be jôô mia, ye na môte wua nye a jôô, mi simesane na me ne jia ya bivese bienan a wua ya minsône mienan?

³ Nde bendômenyañ be nga baʼalane nkobô wé ôte ôse e señ jé e be benya bôtô bese ya Sikem. Ane minleme miab mi nga ndeñ e mfaʼa Abimélék amu be nga jô na: Abialé dangane le.

⁴ Be nga ve nye minsañ mi moné mewôme zamgbwa mi soʼo e nda zambe Bal Bérit mfaʼa ya kuse bôt be ne te mfi a bezametane mam be tôñe nye.

⁵ Ane a nga zu Ofra e jale bʼésaa wé, a wôé bobenyañ, bobefam be Yérubal bôte to éyoñe jia. Yôtam étam, nyô a mbe mongô, nye a nga liʼi amu a nga sobô.

⁶ Ane benya bôtô bese ya Sikem a Bét-Millo ase be nga sulan a telé Abimélék njô bôt, bebé élône yʼakoʼo e ne ntélan e Sikem.

Nkana Yôtam

⁷ Eyoñe Yôtam a nyoñeya foé éte, ane a nga ke tebe abôbône nkôle Garizim, éyoñe te a nga yôtan ôyabe yôbe na: Vôʼôlaʼane ma, a mia benya bôtô ya Sikem, Zambe fe a tame vôʼôlô mia!

⁸ Bilé bi nga ke na bi woʼo njô bôt a zu tebe be ôsu mbon. Be nga jô ôlivié na: Boʼok njô bôte wongan.

⁹ Vʼôlivié ô nga yalane be na: Ye ma ye jôʼé mbone wom ñwô ôte wo volô na Be ve Zambe a bôte duma, Vʼamu na me ke ndeñekolô E bilé yôp?

¹⁰ Ane bilé bi nga jô figié na: Wo, zaʼa jôô bia.

¹¹ Ve figié é nga yalane be na: Ye ma jôʼé avoé dam A mvaé ébuma jam, Vʼamu na me ke ndeñ kolô E bilé Yôp.

¹² Ane bilé bi nga jô ndiʼi woone na: Wo, zʼa ñhe jôô bia!

¹³ Ve ndiʼi woon ô nga yalane be na: Ye ma jôʼé e woone wom A ve Zambe a bôte mevak Vʼamu na me ke ndeñe kolô E bilé yôp?

¹⁴ Nde ñhe bilé bise bi nga Jô Esaé biyo na: Wo, zaʼa jôô bia!

¹⁵ Ane ésaé biyo é nga Yalane bilé na: Nge e ne bebela na mia Kômbô woʼo ma mbone na Me bo njôô wônan, Zaʼan a sobô évôvoé jame si; Nge nalé momo wôna nduan ja Ye vam ésaé biyo si A mane diʼi besédre ya Libañ.

¹⁶ Ajô te éyoñe ji ye e ne bebela a zôsôô a mboon mia te bo na mia telé Abimélek njôô? Ye mia te bo Yérubale mvaé a e nda jé?

¹⁷ Amu na ésaa wom a nga wosan asu denan, a nga ve ényiñe jé asu bita a kôté mia e wo bôte ya Madian;

¹⁸ ve mia, mi maneya kôlô si den a wosane ndaa ésaa wom. Mi maneya wôé bobefame bé, bôte mewôme zamgbwa, akôme da yôp, a mi teléya Abimélék njô bôte ya benya bôtô ya Sikem, nyô a ne e mona mbo ésaé minga wé, amu a bialane mia.

¹⁹ Nge jam mia te bo Yérubal a nda jé e môse wu e ne bebela a zôsôô , Abimélék a boʼok avaʼa denan, a mia kik boʼone avaʼa dé!

²⁰ Nge momo wôna nduan é soʼok e bʼAbimélék a mine benya bôtô ya Sikem a ba ya nda Milô, a nduan é soʼo fe e be benya bôtô ya Sikem a ba ya nda Milô a min Abimélék!

²¹ Ane Yôtam a nga kôlô a tup; a nga ke e Bir a tabe wé akekui Abimélék a nga wu.

Engôngol awu Abimélék

²² Abimélék a mbe njô bôt Israél tañe mimbu mila.

²³ Ane Zambe a nga lôme mbia nsisime metyamaʼane e zañe Abimélék a benya bôtô ya Sikem, nde benya bôtô ya Sikem be nga koñe Abimélék,

²⁴ be bulaʼane nye mboon évô a nga bo bobefame be Yérubal mewôme zañgbwa a nalé ate metyi mab ma ye tabe e bʼAbimélék, monyañe wop, nyô a nga wôé be, a e be benya bôtô ya Sikem mbe be nga volô nye na a wôé bobenyañe bé.

²⁵ Ane benya bôtô ya Sikem be nga telé bôte ya yabe Abimélék e mebôbône minkô be boʼok ésaé ya wôlé belôtan bese ba zu bebé vôm be tele zen e biôm bise be bili. Ve be nga kat Abimélék jame te.

²⁶ A nga bo na Gal, e mona Ebéd, ba be bobenyañ be nga zu lôte Sikem. Ane benya bôtô ya Sikem be nga tabe nye ndi.

²⁷ Nde be nga ke mefub a kolé bibuma bi ndiʼi woon, be nga tyaʼa bibuma bite, a bo abui mevak; nde be nga nyiin e ndaa zambe wop, a di a nyu, nde be nga yoʼé Abimélék.

²⁸ Gal, e mona Ebéd a jôʼô na: Za a ne Abimélék a za a ne Sikem, asu ya na bi saane Abimélék? Ye a nji bo e mona Yérubal a Zebul, ye a nji bo évete jé? Boʼone bôte bʼAmor ésaa Sikem bisaé; ve bia amu jé bia yiane saane Abimélék?

²⁹ Za a ye kee ma bôte bana e mo mam été? Eyoñe te ma ye wôé Abimélék. A a nga jô Abimélék na: Yemeteʼe nkane bita wôé a ke wosan!

³⁰ Eyoñe Zebul, njôô ya tison a nga wôʼô e jame Gal e mona Ebéd a nga jô, nde a nga yaa.

³¹ Ane a nga lôm Abimélék minlôman asoé a jô nye na: Gal, e mona Ebéd a bobenyañ, be zuya e Sikem a tindi bôte ya tisone na be ke wo ngame yat.

³² Eyoñe ji kôlôʼô si a alu, womien a bôt be ne ngame jôé a ke sobô afan été.

³³ Mametyé, éyoñe tyé ja lendé, wo ye kôlô si a ke e tison. Eyoñe Gal a e bôt be ne ngame jé ba ye zu wosane wo, wo ye bo nye e jame ngule jôé ja ye ve wo nkañesan.

³⁴ Nalé Abimélék a bôt be mbe e ngame jé be nga kôlô si a alu a ke sobô bebé Sikem be too minsamba minyin.

³⁵ Wôna Gal, e mona Ebéd a nga kui atan a ke tebe anyiine mbé ya tison. Eyoñe te Abimélek a bôte bese be mbe e ngame jé be nga kui asoé.

³⁶ Nde Gal a nga yene bôt a jô Zebule na: Tame yen nsamba bôt wo so abôbône minkô. Nde Zebul a nga yalane nye na: Nsisiñe ya minkô ñwô wo yen a nyoñ ane bôt.

³⁷ Nde Gal a nga beta nyoñe nkobô a jô na: Nsamba bôte foʼo ñwô wo sis e mfaʼa ya ézezañe nlam a nsamba ôfe wo zu e zene Elône mimvimviʼi.

³⁸ Ane Zébul a nga yalane nye na: Mbamba minkobô miôé mi ntoo vé, wo ô mbe ô jôʼô na: Za a ne Abimélék, na bi saane nye? Ye sa bôt ô nga biasé mbe le? wuluʼu éyoñe ji a wosane nye!

³⁹ Ane Gal a nga tebe ôsu benya bôtô ya Sikem a wosane Abimélék.

⁴⁰ A nga mate ôsu Abimélék amu a nga tôñe nye. Abui bôt e nga balé fe mbalan ya wu nde be nga mane ku si a kui anyiine mbé .

⁴¹ Ane Abimélék a nga tebe Aruma. A Zébul a nga titane Gal a bobenyañ; be nji fe bo nguleya beta tabe e Sikem.

⁴² Mametyé, bôte ya Sikem be nga kômesan a ke mefup, Abimélék a wôʼô jame te.

⁴³ Ndʼa nga nyoñ e nsamba bôte wé a kabe wô minnoñ mila a ke sobô mefup. Eyoñ a nga yen ane bôt be nga kui atane tison, ane a nga ke wosane be a bôé be.

⁴⁴ Abimélék a minnoñ mi bôt ba be be be nga wulu a tebe anyiine mbé ya tison; nde minnoñ mibaé yʼété mi nga kubu e be bôte bese be mbe mefube a bôé be.

⁴⁵ Abimélék a nga wosane fe tison tañe ngumba môs; ane a nga nyoñe je a wôé bôte bese be mbe été. Ane a nga mane tyame je a sôé nku e vôm tison éte é mbe (g).

⁴⁶ Eyoñe benya bôtô ya Sikem be nga wôʼô jame te, be nga ke e bibé bi né e nda zambe Bérit été.

⁴⁷ Ane be nga kate Abimélék na benya bôtô bese ya beta tisone Sikem be maneya sulan.

⁴⁸ Nde Abimélék a nga bet e nkôle Salmôn, émien a bôt be mbe ngame jé. A nga nyoñ ôvôn e wo wé nde a nga baʼé ntyaé élé, a bete wô a beté wô étu; ane a nga jô bôte ya ngame jé na: Mi yeneya e jam ma te bo, boʼon avôle ya bo ane ma.

⁴⁹ A bôte bese be nga tyik, môt ase, ntyaé élé, a tôñ Abimélék; be nga dibe ébé a mintyaé bilé a diʼi je a bôte bese be mbe été. Ajô te bôte bese ya beta tisone Sikem be nga mane wu. Bôt bebé toyini, befam a binga.

⁵⁰ Ane Abimélék a nga wosane fe Tébés. A nga bômane nye bita a nyoñe nye.

⁵¹ Beta ôlem a mbe ézezañe tison, befam a binga bese be nga ke sobô été a benya bôtô bese ya tison.

⁵² Ane Abimélék a nga tulan a kui vôm ôlem ô mbe; nde a nga wosane wô a subu bebé e mbé na a futi nduan été.

⁵³ Nde minga éziñ a wua éfus akoʼo ba koʼo bidi, de ve bi Abimélék e nlô a tyaʼa nye ékôkoé nlô.

⁵⁴ Awolo te ebien, Abimélék a nga loone ndômane môt é nga beʼe nye biôme mewosan a jô nye na: Dutuʼu nkpwaté mekône wôé a wôé ma, be za jô me na: Minga e nye a te wôé nye. Ane ndôman môt éte é nga jii nye nkpwaté mekôn, nde a nga wu.

⁵⁵ Eyoñe bôte yʼIsraél be nga yene na Abimélék a wuya, nde be nga bulan môt ase e nda jé.

⁵⁶ Ajô te Zambe a nga bulan abé Abimélék a nga bo ésaa e be émien éyoñ a nga wôé bobenyañ mewôme zamgbwa.

⁵⁷ A Zambe a nga bulane bôte ya Sikem abé be nga bo e be bebien. Nalé ate biyoʼé Yôtam, e mona Yérubal, bi nga tôéban e be be.