BETYIʼI MEJÔ 5 - Bible en langue Bulu

E jia Débôra a nga yia

¹ Môs ôte Débôra a Barak, e mona Abinôam, be nga yia e jia jina be jôʼô na:

² Israél été, môt ase a ne Nkômesane ya wosan. Bôt be veya bebien e mfaʼa ya wosan: Vaʼane Nti Akéva!

³ Mia, bejô bôt, mia bôt mi bili ngule njôan Keʼane alo a vôʼôlô! Ma zu yia jia asu duma Nti, Zambe yʼIsraél.

⁴ A Nti, éyoñ ô nga so e sii Edom éyoñ ô nga sis, si é nga fôʼôsan a minkut mi nga sôé mendime map, abui mveñ e nga sôé é soʼo yôp.

⁵ Minkô mi nga fôʼôban ôsu viôé, Nti ya sinayi, Zambe yʼIsraél.

⁶ Melu Samgar, e mona Anat, Melu me Yaél, minsamba mi bôt a betit Mi nga liʼi si bilik, bewulu dulu be nga tôñe mezen me nʼékotekot.

⁷ Bivet bi mbe momo, teke fe bivet e si yʼIsraél, akekui me soya, ma Débôra, a bo aval ane nyia e be Israél.

⁸ Ayoñe bôt e nga tobe Mimfefé bezambe A éyoñe te ébien nje bita bi nga taté. Vʼé mbe njuʼu ya yen ében nge akañ, asu bôte toyini mewôm menyin Israél été.

⁹ E nleme wom ô ne mfulaʼan a bivete bezimbi yʼIsraél, Nalé fe a bôte yʼayoñ be veya bebien e mbamba nkômban. Vaʼane Nti akéva!

¹⁰ Mia mia bet e bifumulu bijakase yôp, mia mi too afibe bindelé yôp, mia mia wulu e minjoñe yôp, yôtaʼane jame te!

¹¹ Ba ba kabe mendim bebé e mevôm ba nyu mendim, ba kañ mbamba mimboon mi Nti, e mbamba mimboone mié e be bivete yʼIsraél, éyoñe bôt be nga tebe e mimbé ya tison.

¹² Veʼe ôyo, a Débôra a zu volô, Kôlôʼô si a yia jia ya bita, tebeʼe tetele a Barak e mona Abinôam a bulane mimbôʼô miôé!

¹³ E bôt be nyiñeya, be keya koone bivet, ayoñe bôte Nti e sulaneya e be nye aval ane mimben. Bedañ Amalek be nga so Efrayim. Bényamin a nga tôñe be a fulan a minsamba miap.

¹⁴ Abume bôte Makir, bejôô be nga so été, a abume Zabuloñ ki e ne bebi ntum mewosan. Bivet bʼIsakar, bi nga ke koone Débôra;

¹⁵ Isakar, mbaʼatan a Barak, a nga tôñ mvus avôl-avô e njeʼese si; ve e mebum me Ruben, bôt ve bo bisô ya mfasan a nsañetane mam teke nné.

¹⁶ Amu jé mi nga liʼi mi tele ézezañ mebemba a vôʼôlô minloñan ba loñ e mimbame miap? Mfaʼa mebume me bôte me Ruben, minlem ve sañetane beta mimfasan mi mam teke nné.

¹⁷ E Galad, e Yordan mfaʼa jôb da tôô, meyoñ me nji ke fôʼôsan. Meyoñe me Dan me nga liʼi bebé a besitima bé. Ayoñ Azer fe é nga liʼi e nsaʼa mañ, bebé a mevôm besitima bé ba tebe.

¹⁸ Bôte ya Zabuloñ, be, avale fe ane ba ya Néftali, be nga kañese tôban awu e minseñ mewosan.

¹⁹ Bejô bôt be ne besiñ, bejô bôte ya kanaañ, be nga wosane Tanak bebé e menjeñ ya Megidô, Ve teke nyoñ toʼo biôme Ya nsa, toʼo moné!

²⁰ E yôp été, ngon a ateté fe bi nga wosane Sizera, be tôñe fe mezene map.

²¹ Otôñ wo lôt aso ayap, Ôtôñe Gison, ô nga Vose besiñ. Ñwulaʼan a ôden bi ke wosan!

²² Eyoñe te bikabela bi nga taté na bia yôô, be boʼo bikinda si a biboʼose biap.

²³ Éngele Nti a jô na: Yokaʼane tisone Méroz, Yokaʼane je, yokaʼane bôt be too été. Amu be nji ke zu volô e Nti, be nji ke wosan a biyete bezimbi biap.

²⁴ Yaél, nga Eber, mone Kénieñe A boʼo ébotan e binga bese été. Yaa, a boʼo ébotan e zañe binga bese be too e menda bindelé si.

²⁵ Sizera a nga sili nye mendim, nde a nga ve nye menyañ; ékpwikpwiʼiti menyañ e mbamba ndeʼe été.

²⁶ Wôna a nga nyoñ akôn a wo wua, a ôkutaʼa nlumelui a wu ôvok. Ane a nga wôé Sizera, a sale nyʼékôkoé nlô, a nga tube nye nlô.

²⁷ Nde Sizera a nga fenekan ôsu vié a ku si. A nga bômbô tyia mebo mé si, a nga tuʼulane émien e si si, a ku abôm.

²⁸ Nde nyia Sizera a nga fombô Vundu. Eyoñe mis me tyiñelaneya nye, a nga taté na a singi a nyamete: Amu jé vagoñ bita wé a yange? Amu jé a yange te zu?

²⁹ A baʼalan éyoñ ése éyalane ya bemvôé bé ba dañe fek:

³⁰ Bezimbi ba kôane foʼo biôme ya nsa, be nga kabane fe bie. Ngone minga jia ngʼébaé asu mone bezimbi wua. Bindelé bi ne nduban a ntiñan asu Sizera. Yaa, éndelé é ne ntiñan biyoñ bibaé asu ya kotane je e tyiñe môt a ye dañ.

³¹ Besiñe bôé bese, a Nti, ba wu avale Sizera a wuya. Ve bemvôé bôé be boʼok ane jôp éyoñe da tôô étotoʼo jé ése été! Ane mvoʼé é nga bo e si tañe mimbu mewôm menyin.