BETYIʼI MEJÔ 3 - Bible en langue Bulu

¹ Meyoñe Nti a nga ve awoʼon a belane me asu ya veʼele Israél, ba bese be nga bo teke yeme mewosan mese ya kanaañ,

² nalé a nga boban foʼo vʼamu na miaé mi bôte yʼIsraél mi yem a yéʼé bita, a dañe dañ ba be nji tame yeme bie ôsusua:

³ Meyoñ mete mme ma: bejô bôte betan ya Befilisteñ, Bekananééñ bese, Besidônieñ bese a Behévieñ bese be nga too e nkôle Libañ, ataté e nkôle Bal-Ermon a kui anyiine Amat.

⁴ Meyoñ mete me nga volô na Nti a veʼele bone bʼIsraél, nalé Nti a ye yem nge ba ye bo mebendé me Nti mewôk, e ma a nga bendé bʼésaa anyu be Môze.

⁵ A Bone bʼIsraél be nga tabe ézezañe Bekananééñ Behétieñ, Beamorééñ, Beférézieñ, Behévieñ a Beyébuzieñ.

⁶ Be nga luʼu bengo bab a ve bobefame ya meyoñ mete e bobebinga babe bebiene yʼIsraél, a be nga kañe bezambe bap.

Otniél, ntyiʼi mejô Israél été

⁷ Ane bone bʼIsraél be nga bo e mam me nʼabé e mise me Nti, be nga vuane Nti, e Zambe wop, a kañe bebaal a beastarté.

⁸ Ane Nti a nga yaa Israél a kuane be e mo me Kusan-Riséatayim, njô bôte ya Mézôpôtamie. Nde bone bʼIsraél be nga saane Kusan-Riséatayim tañe mimbu muam.

⁹ Ane bone bʼIsraél be nga yôn e be Nti, a Nti a nga telé be nkôté bôt a nga nyii be jôé na Otniél, e mona Kenaz, monyañe mongoo Kaléb.

¹⁰ Nsisime Zambe ô mbe be nye. A nga bo ntyiʼi mejô yʼIsraél a a nga ke bita. Nti a nga ve Kusan-Riséatayim, njô bôte ya Mésapotamie, e mo mé, a e wo wé ô mbe éwôlô e be Kusan-Riséatayim.

¹¹ Si é nga tabe mvoʼé tañe mimbu mewôm menyin. Ane Otniél, e mona Kenaz, a nga wu.

Ehud, ntyiʼi mejô yʼIsraél

¹² Ane bone bʼIsraél be nga beta bo abé e mise me Nti; a Nti a nga ve Egloñ, njô bôte ya Môabe na a wosan Israél, amu a nga bo abé e mise me Nti.

¹³ NdʼEgloñ a nga lat a Beamônite a Beamalésite a wulu dulu ya ke wosane Israél. Ane a nga bôm Israél a wôlé nye tisone melen.

¹⁴ Nde bone bʼIsraél be nga saane Egloñ, njô bôte ya Môab, tañe mimbu awôm a muam.

¹⁵ Ane bone bʼIsraél be nga yôn e be Nti a Nti a nga ve be nkôté bôt, Ehud e mona Géra, e mvoñe bôte Bényamin, mbe émoñ (a). Bone bʼIsraél be nga lôme Egloñ, njô bôte ya Môab atôm a nye.

¹⁶ Ane Ehud a nga bo émiene nkpwaté mekôn ô bili meyo mebaé ô too nté anyiʼi wo da, nde a nga tyelé wô e kandé, e mengômesane mé si, ô late a éfas éngele ya mbo nnôm.

¹⁷ Ane a nga kee Egloñ, njô bôte ya Môab atôm; vʼEgloñ a mbe étua anene môt.

¹⁸ Eyoñ Ehud a maneya kalane nye atôm, nde a nga suu e bôt be nga zu liti nye be bulan.

¹⁹ Nde émien a nga beta so e vôme bengunemelane mekok be nga too bebé a Gilgal a zu koone njô bôt a jô nye na: A njô bôt! me bili wo foé yʼôbé. Ane njô bôt a nga jô na: Evô! Nde ba bese be nga too nye bebé be nga mane kui atan.

²⁰ Ane Ehud a nga zu bebé be nye valé njô bôt a too si étune nda jé ya yôb é mbe évôvoé a nje é mbe foʼo vʼasu dé émien étam. Ehud a nga jô nye na: Me bili nkobô Zambe asu dôé: Nde Egloñ a nga kôlô éto jé a tebe tetele.

²¹ Ane a nga té nkpwaté mekôn e mbo nnôme wé, a beme nye wô abum.

²² Ane nyiʼan akule wo ô nga nyiine fe abum a étyé nkpwaté mekôn ése, a avoñ e nga dib aveñ mbômaʼan a étyé; amu a nji fe beta dutu nkpwaté mekôn abum; ve ô nga vam e mvus.

²³ Ane Ehud a nga kui atan e mfaʼa ya falak éyoñe te a maneya dibe mimbé yʼétune nda a mengôñ.

²⁴ Eyoñ a kuiya atan, bebo bisaé be njô bôt be nga zu fombô a yene na mimbé yʼétune ya yôb mi ne mfetan a mengôñ. Nde be nga jô na: Teke bisô na njô bôt a buti mebo mé évôvoé étune nda jé ya yôp.

²⁵ Be nga yañge a ayap; a amu njô bôt a nji yoé mimbé yʼétune nda ya yôp, nde be nga nyoñ édibaʼa a dii mie, a koé na e masa wop a bôô si, a wuya.

²⁶ Nté be mbe be yangeʼe a dimili éyoñ nje Ehud a nga tup; ane a nga lôte bengunemelane mekok a tup a ke e Séyira.

²⁷ Eyoñ a nga kui, a nga loñ toñ e minkôle yʼEfrayim. Nde bone bʼIsraél be nga sis e nkôle si ba be nye, a tele be ôsu.

²⁸ A nga jô be na: Tôñane ma, amu Nti a veya Bemôabite, besiñe benan, e mo menan. Nde be nga sis be tôñe nye mvus, nde be nga nyoñe mevôm mese ya Yordan me nʼéyeyas e mfaʼa ya Môab, teke liʼi môte wuwua na a lôt.

²⁹ Nde môs ôte, be nga wôé bôte ya Môab bebé toyini awôm, bese be too befam be ne biwôlô a ayok, teke môte wua a nga nyiñ.

³⁰ Ataté éyoñe te Bemôabite be nga ke éjôé Israél si. A si é nga tabe évôvoé tañe mimbu mewôme muam.

Samgar, ntyiʼi mejô yʼIsraél

³¹ E môt a nga tyendé Ehud a mbe Samgar e mona Anat. A nga wôé Befilisteñ mintete misaman a akoñ ba tindi de benyak, nye fe a nga nyii Israél.