BETYIʼI MEJÔ 21 - Bible en langue Bulu

Ayoñe Bényamin da beta tebe

¹ Eyoñe bôte yʼIsraél be nga sulan e Mispa, be nga kane ngana na: te ke môte ya be be a ye ve ngo jé aluk e be nôte yʼayoñe Bényamin.

² Môs éziñ bôt be nga sulan e Bétél asu Nti a tabe valé akekui mamengôʼé. Be nga bete metyiñ a yôn abui,

³ be jôʼô na: A Nti, Zambe yʼIsraél, amu jé da yiane yené Israél été na ayoñe da e jemban?

⁴ E môs ô nga tôé valé, bôt be nga kune kôlô si a lôñe ataʼa metunaʼa vôm ate a ve mimvean mi ne ngumba, a mimveane ya nlatane ngbwa.

⁵ Ane bone bʼIsraél be nga jô na: Za ya meyoñ mese yʼIsraél a nji ke bet ékôan é nga boban asu Nti e Mispa! Amu be nga kane ngana na ba ye wôé e môt ase a ye bo te ke e Mispa.

⁶ Be nga wôʼô fʼasuʼulan ya bobenyañ bab ya mvôʼô Bényamin éngôngo be jôʼô na: E môse wu ayoñe da yʼIsraél e nga mane jañ.

⁷ Bia ye bo aya ane bia ye ve befam ya Bényamin be nga fam awu binga, amu bi nga tiñeti mengana bôt été asu Nti, na bia ye bo te ve be bengo bangane na be luʼu be?

⁸ Nde be nga yemelan nge môt éziñ ya meyoñ yʼIsraél a nji ke bet asu be Nti, e Mispa. Ane be nga yene na môt éziñ ya Yabés, e Galad, a nji ke ke e vôm ékôan é mbe.

⁹ Be nga bo élañe bôt a yene na teke môte wua ya bôte ya Yabés Ya Galad a mbe valé.

¹⁰ Ane nsamba bôt ô nga lôme bôt awôm a bebaé ya bôt ba dañe biwôlô a bendé be na: Kela wôane befam ya Yabés e Galad a meyo me nkpwaté mekôn, nalé fe binga a bongô.

¹¹ Avale di nde mia ye bo: Wôane fam ése a minga ase a yemeya fam.

¹² Nde be nga koon e bôte ya Yabés ya Galad été, bindune bengo be binga mintete minyin bi ngenan te yeme fam nge bômbô a je, ane be nga zuu be minkan e Silô; si ya kanaañ.

¹³ Ane ékôane bôt ése é nga lôme bôt be kobô bone be Bényamin be mbe akôme Rimôn a kate be foé ya mvoʼé .

¹⁴ Eyoñe te bone be Bényamin be nga so, a be nga ve be e binga be nga nyiñe Yabés ya Galad. Ve binga bete be nji yiane be bese.

¹⁵ Bôte ya Israél be nga jôban ajô Bényamin, amu Nti a nga bo beta aveñ e meyoñ yʼisraél été.

¹⁶ Nde bemvendé ya ékôane bôt be nga jô na: Bia ye bo aya na bôte bevok be nga nyiñ be bi binga, amu binga ya bone be Bényamin be nga mane wôéban bese?

¹⁷ Ane be nga jô na: Bôte ya Bényamin be nga nyiñ be baʼaleʼe ngabe élik, éyoñe te ayoñe da yʼIsraél da ye bo te jañ.

¹⁸ Ve bi se nguleya ve be bengo bangan be luʼu be, amu bone bʼIsraél be nga kane ngana na: Biyoʼé a môt a ye ve mone Bényamin minga ya luk!

¹⁹ Nde be nga jô na: Mbu ôse bi bili abôʼô Nti e Silô e Bétél akôé, e mfaʼa ya njoñ wo bet akôlô Bétél a kui Sikém e mfaʼa jôb da tôô, a e Lebôna nké.

²⁰ Be nga jô bone be Bényamine na: Kela soban e mefube mindiʼi mi woon.

²¹ Mia ye fombô a éyoñe bengone ya Silô ba ye kui na ba zu jeme mebôʼô map, môt ase a ye bi ngone ya bengon ya Silô a luʼu je a bulan e sii Bényamin.

²² Nge bʼésaa nge bendôm ba tat a jame te da kui be bia, bia ye jô be na: Bia yeʼelane mia na mi bi mbamba minlem e be befame ya Bényamin amu bi nji ke kui na bi bi môt ase yʼété minga éyoñ bi nga bo mewosan e Yabés. Ve sake mia mi nga ve be bengo benan, nde be se nguleya ve mia bijô na mi tyameya ngana.

²³ Ane bôte ya Bényamin be nga tôñe melebe mete: Be nga luʼu binga e tañ ja yian e zañe ya bengon be mbe be jemek été mbe be nga bi, bitison a tabe été.

²⁴ Eyoñe te fe nje bone bʼIsraél be nga kôlô valé a bulan, môt ase ayoñe dé a abume bôte dé, be nga kôlô a ke, môt ase e ngab éliʼi jé.

²⁵ Melu mete njô bôt a nji bo Israél, môt ase a nga bo jam a yene mvaé.