BETYIʼI MEJÔ 20 - Bible en langue Bulu

Bita, bebé ya mane wôé mvôʼô Bényamin

¹ Bone bʼIsraél bese, ataté Dañ a kui Birséba a sii Galad, be nga sulan ane môte wua asu be Nti e Mispa.

² Betebe ôsu bese a bôt ya meyoñ mese yʼIsraél be nga sulan ékôane bôte be Zambe été e bôte ba wulu a mebo toyini mintete minyin, bedutu nkpwaté mekôn.

³ Bone be Bényamin be nga wôʼô na bone bʼIsraél be maneya ke e Mispa. Ane bone bʼIsraél be nga jô na: Kobaʼan, mbia jame nyô a nga kui aya?

⁴ Eyoñe te mone Lévite, nnôme minga be nga wôé a nga nyoñ nkobô a jô na: me nga suan e Gibéa ya Bényamin bia ébone jame na bia jôʼôbô meyôa.

⁵ Nde benya bôtô ya Gibéa be nga wôʼô ma abé a bômane nda me nga too a alu. Ma be nga kômbô wôé, ve ébone jam nje be nga jôʼôbô je a ngu.

⁶ Ane me nga bi ébone jam a ba je mefus a lôme me e si ése yʼIsraél; amu be nga bo jam e nʼôson a ôsame Israél été.

⁷ Bone bʼIsraél, mia bese mi ne vana ba, ajô te fasan a tyiʼi jam mia yiane bo.

⁸ Ane bôte bese be nga kôlô si ane môte wua a jô na: Teke môte ya be bia a ye ke e nda éndelé jé a teke môt a ye bulan e nda jé.

⁹ E jam bia ye bo e Gibéa nde di: Bia ye ke wosane nye avale asimba da ye liti.

¹⁰ Bia ye nyoñ, e meyoñ mese yʼIsraél, bôt awôm e ntet ôse, bôte ntet e toyini ase a bôte toyini e toyini awôm ése; ba ye ke nyoñe bôte bidi; éyoñ ba ye bulan, bia ye bo Gibéa ya Bényamin aval ane ôsone jam a nga bo Israél été ô né.

¹¹ Nalé ate bôte bese yʼIsraél be nga sulane a tebe tisone Gibéa e ngame yat, be too nlatan tyiñe jia ane môte wua.

¹² Ane meyoñ yʼIsraél me nga lôme bôt e mebum mese ya Bényamin be jôʼô na: Bidim bivé bi kuiya be bia bi?

¹³ Zaʼane bezametane mam bese be ne e Gibéa, bi mane wôé be a findi abé Israél été. Ve bone be Bényamin be nji kômbô wôʼô tyiñe bobenyañ, bone bʼIsraél.

¹⁴ Ane bone be Bényamin be nga mane so bitisone biab a sulan e Gibéa na be wosane bone bʼIsraél.

¹⁵ Elañe bôt be nga bo bone be Bényamin môs ôte be soʼo bitison, é nga liti bôte toyini mewôm mebaé a ésaman, bedutu nkpwaté mekôn, te lañe bôte ya Gibéa mbe be nga lañeban bôte ya mewosan tañe mintete zamgbwa.

¹⁶ E bôte bete bese été, bôte mintete zamgbwa be mbe émoñ; balé bese be mbe nguleya lume koñ ési te ke kop, éyoñ wo wua ôkôk a tolo.

¹⁷ Be nga lañe fe bôte yʼIsraél, ba ya Bényamin momo été: Bedutu nkpwaté mekôn toyini mintete minyin, bese be too bôte mewosan.

¹⁸ Nde bone bʼIsraél be nga kôlô si a ke Bétél a sili nkômbane Nti be jôʼô na: Za ya be bia a ye taté bet a wosane bone be Bényamin? Nti a nga yalane na: Yuda.

Dt. 13:13-19; Yas. 8:1-29

¹⁹ Eyoñe tyé é nga lendé, bone bʼIsraél be nga kôlô si a vule minkane miab ya wosane Gibéa.

²⁰ A bôte yʼIsraél be nga ke wosane Bényamin, be nga wosane be ôsu Gibéa.

²¹ Ane bone be Bényamin be nga kui atane Gibéa a wôé bôte yʼisraél môs ôte bôte toyini mewôm mebaé a ébaé.

²² Nde bôte yʼisraél, be nga beta nyoñe ngu a beta ke wosan e vôm be nga tele e môs ôsu.

²³ Ane bone bʼIsraél be nga bet a yôn asu be Nti a kui mamengôʼé; be nga sili nkômbane Nti be jôʼô na: Ye bia yiane beta ke wosane bone be Bényamin be ne bobejañ? Nti a nga yalane na: Kela wosane be.

²⁴ Nde bone bʼIsraél be nga ke wosane bone be Bényamin e môse baa.

²⁵ E môse baa, bone be Bényamin, nkôlane ya Gibéa a ke tôbane be, e nseñ bita, be nga wôé bôte toyini awôm a muam ya bone bʼIsraél, bese be too bedutu nkpwaté mekôn.

²⁶ Ane bone bʼIsraél bese a bôte bese be nga bet a zu e Bétél: Be nga yôn a tabe valé asu Nti, be nga tyi bidi môs ôte a kui mamengôʼé, be nga tyiʼi mimvean mi ne ngumba, a metunaʼa ya nlatane ngbwa asu Nti.

²⁷ Bone bʼIsraél be nga beta sili nkômbane Nti, e ne éwolo élate Nti é mbe valé,

²⁸ a Finéas, e mona Eléazar, e mona Aron, nye a mbe a tebeʼe ôsu éwolo Zambe melu mete, ane bone bʼIsraél be nga jô na: Ye ma yiane beta ke wosane bone be Bényamin, mojañ, ye me jôʼé? Nde Nti a nga yalane na: Kelan, amu a akiti, ma ye ve be e mo menan.

²⁹ Eyoñe te Israél a nga sobô mbômaʼane a Gibéa.

³⁰ Ane bone bʼIsraél be nga ke wosane bone be Bényamin e môse lale a tôkan été bita ôsu e Gibéa aval ane biyoñ bivok.

³¹ Nde bone be Bényamin be nga zu tôbane bôte yʼIsraél; ane nkandan ô nga boban e zañe jab a tison. Be nga taté na ba wôé bôte yʼIsraél ane biyoñ bivok e minjoñe yôp, wua yʼété wo bet e Bétél, wu ôvok e Gibéa éyoñ wo tyii afan afan; be nga wôé bôte yʼIsraél mewôm mela.

³² Bone be Bényamin be nga jô na: Be maneya wôéban ôsu viangan ane biyoñ bivok! Ve bone bʼIsraél be nga jô na: Ntubané a kandé be a tison e minjoñe mise!

³³ Nde bôte bese yʼIsraél be nga kôlô vôm be nga tele a ke e Bal-Tamar, wôna ba be mbe mesoé bebé a tison, be nga kôlô mesoé mab atemetem, e mfaʼa njeʼese ya Géba.

³⁴ Nalé ate bôte toyini awôm, be nga tôban Israél ase été, be nga kui zôsôô a Gibéa. Bita bi mbe angôndô, a bone be Bényamin be nga yeme na bidim bi kuiya be be.

³⁵ Ane Nti a nga ndumekane Bényamin fek ôsu Israél, amu môs ôte bone bʼIsraél be nga wôé bôte ya Bényamin ba té nkpwaté mekôn bôte toyini mewôm mebaé a étan a ntete wua.

³⁶ Eyoñe te bone be Bényamin be nga yeme na be jañeya. Ve bone bʼIsraél be nga bo ane ba tek a liʼi bone be Bényamine nseñ, be nga bo nalé amu be nga too ndi a bezimbi be nga too mbômaʼane a Gibéa.

³⁷ Nde bezimbi bete be nga zu avô bebé e Gibéa a sa nye, a wôé bôt yʼété a meyo me nkpwaté mekôn.

³⁸ Be nga ve bôte bevoʼo bese yʼIsraél ndem na ba ye bo na nsum ôtita ô bete yôb e tisone Gibéa.

³⁹ Eyoñe minsamba mewosane ya Israél mi nga bulane mvus ézezañe mewosan, bone be Bényamin be nga wôé be bôte bebé mewôm mela, nde be nga buni na be dañeya be aval ane éyoñ ya mvus.

⁴⁰ Vʼéyoñe te ébien, nsum ôtita ô mbe ndem, ô nga taté na wo bete yôb e Gibéa. Ane bone be Bényamin be nga fombô mvus a yen ôtita ô betek, e tisone jabe kik é ntoo nsum nduan été.

⁴¹ Nde bone bʼIsraél be nga kôñelan a wosane bone be Bényamin, ane be nga dañe ko woñ amu be nga yene na njuk ô kuiya be be.

⁴² Ane be nga tub asu bone bʼIsraél a ke mfaʼa ya nkôte si, ve minkane bita mi mbe abui, a mi mi nga solô mi nga futi nduan e tison mi nga late be ézezañ a mane wôé be mbia ñwôan.

⁴³ Ane bone bʼIsraél be nga bômane bôte ya Bényamin a tôñe be, a wôé be e zene zen , te ke ve be mon awoʼon, a kui e vôm éziñ a ne Gibéa mfaʼa jôb da tôô.

⁴⁴ Ane bezimbi ya Bényamin be nga wu bôte toyini awôm a muam, bese be too miñyôyoʼo mi bôt.

⁴⁵ Bôt bevoʼo ya Bényamin be nga tub a ke e mfaʼa ya nkôte si, e mfaʼa akôme Rimon. Bôte toyini étan yʼété be nga wôéban e mezen, be nga tôñe ba bevok a kui Gidom, a beta wôé toyini ébaé.

⁴⁶ E bôte ya Bényamin be nga wu môs ôte be mbe bezimbi toyini mewôm mebaé a étan, bese be too miñyôyoʼo mi bôt.

⁴⁷ Ve da bôte mintete misaman ya ba be nga tub e mfaʼa ya nkôte si be nga bo nguleya fam awu; be nga kui akôme Rimon a tabe valé ngon ényin.

⁴⁸ Bone bʼIsraél be nga kôñelan a wosane bone be Bényamin be nga liʼi; be nga lôt ataté tisone nyô a kui nyô fok, a wôé bôte bese a mimbam biyem, a futi nduan e minlam mise ya afôla si te.