BETYIʼI MEJÔ 16 - Bible en langue Bulu

Dalila a koñe Samson a Samson a bo mbôʼô Befilisteñ

¹ Ane Samson a nga ke e Gaza; nde a nga yene minga ébamba a nyiin e nda jé.

² Ane be nga kate bôte ya Gaza na: Samson a kuiya va. Nde be nga yabe nye a bole nye ngum alu e mbé ya tison. Be nga too ne séé ngum alu be jôʼô na: Bia ye wôé nye éyoñe môs wo ye bo.

³ Samson a nga bômbô si a kui e zañ alu. Bebé e zañ alu, a nga kôlô si; a nga bi bivine bi mbé ya tison a mekôn mebaé yʼété, a nga té bie a mengôñ yʼété, a beté bie étuu a kee bie abôbône ya nkôle ô ne zôsôô a Ebroñ.

⁴ Eyoñe dili e maneya, a nga nyeʼe minga e mbiʼili ya Sorék, jôé na Dalila.

⁵ Ane bivete Befilisteñ bi nga ke be nye a jô nye na: Tame wone nye ô yemelane bia e vôme beta ngule wé a so nye, a avale bi ne nguleya dañe nye, bia ye kaʼa nye asu ya teʼelane ngule jé a bia ye ve wo môt ase, bifase bi moné toyini a ntete wua.

⁶ Ane Dalila a nga jô Samson na: Kate ma, ma yeʼelane wo, e vôme beta ngule wôé a so, a jé be ne kaʼa wo je na ngule jôé é teʼelan.

⁷ Samson a nga jô nye na: Nge ba kaʼa ma a mimfefé minkole mi ngenan te kôt zamgbwa ma ye bo atek a bo ane môte mfe éziñ.

⁸ Ane bivete Befilisteñ bi nga zu ve Dalila minkole mi ne mimfefé mi ngenan te kôt zamgbwa, nde a nga kaʼa nye a mie.

⁹ Nde bôt be mbe be solô valé bebé a étune nda jé. Ane a nga jô nye na: A Samson, Befilisteñ be ntoo be wo! Ane a nga té minkol vʼane vôme mone nkol a diʼi nduan. Ajô te a nga bo teke yem e vôme ngule jé ja so.

¹⁰ Dalila a nga jô Samson na: Ô lôô ô maneya duʼu ma, ô nga laane ma minsos. Eyoñe ji, ma yeʼelane wo na ô kate ma jôm be ne nguleya kaʼa wo je.

¹¹ Samson a nga jô nye na: nge ba kaʼa ma a mimbaʼa minkol mi ne mimfefé be ngenan te belane mie, ma ye bo atek a bo fe vʼaval ane môte éziñ mfe ase.

¹² Ane Dalila a nga nyoñe mimbaʼa minkol mi ne mimfefé a kaʼa nye a mie. Eyoñe te a nga yôtane na: A Samson, Befilisteñ be ntoo be wo! Beyabe be mbe be solô étune nda été. Nde a nga té mimbaʼa minkol mi mbe nye mo ane môt a té ndes nkole kilisi.

¹³ Dalila a nga jô Samson na: A kui éyoñe ji wo duʼu ma, wo te laane ma ve minsos. Kate ma jôm be ne kaʼa wo je. A nga jô nye na: Tame fene mimfene zamgbwale ya nlô wom a ngôkob é ne mboon a éndelé a late mie a mvasé ntiñe biyé, ma ye bo atek, a bulane fe bo aval ane môte mfe ase (j).

¹⁴ Dalila a nga yalé nye ôyo, a fene mimfene zamgbwale ya nlô wé, a late fe mie a mvasé ntiñe biyé, nde a nga vee ôyo a té biôm bise bi nga too nye nyô.

¹⁵ Ane Dalila a nga jô nye na: Ô ne nguleya jô aya na: Ma diñe wo! Eyoñe nleme wôé ô nji bo be ma? Biyoñe bilale bi vʼô duʼu ma, a ô nji kate ma e vôme beta ngule wôé a so.

¹⁶ Amu Dalila a nga dañe ndeñele Samson a mveane ya ve nye bijô môs ôse, nde Samson a nga dañe tek, bebé ya wu, a dimili fek,

¹⁷ ane a nga kate Dalila nsolane jame wé a jô nye na: Lame a ngenan te lôt e nlô wom, amu me ne ntelan étyi asu Zambe aso abume nyia wom. Nge ba sôté ma nlô, ngule jam ja ye kôlô be ma, ma ye bo atek a bo ane môte mfe ase.

¹⁸ Eyoñe Dalila a yeneya na Samson a maneya kui nye e nleme wé ôse, nde a nga loone bivete Befilisteñ a jô bie na: Zaʼan éyoñe ji, amu a kuiya ma e nleme wé ôse. Nde bivete ya Befilisteñ bi nga ke be nye bi bili moné e mo map.

¹⁹ Ane Dalila a nga yale samson ôyo e mebé mé yôp, a loone môt a zu tyeñe nye mimfene zamgbwale ya nlô wé a taté ñhe na a tek amu ngule jé ja vas. Eyoñe te e ngule jé é nga kôlô be nye

²⁰ Ane a nga jô nye na: A Samson, Befilisteñ be ntoo be wo! Nde a nga vee ôyo a jô na: ma ye dañ ane biyoñ ya mvus, a kôlô ézezañe jap. Ve a nji yeme na valé Nti a kôlôya be nye.

²¹ Ane Befilisteñ be nga bi nye a tube nye mis; be nga kee nye e Gaza a kaʼa nye a bibom bi mvot. Nye a nga bo ésaé ya koʼo bidi e nda mimbôk été.

Samson a kun émien a wu

²² Vʼésil é nga taté na ja kui nye nlô ataté éyoñ be nga mane sôté nye nlô.

²³ A nga bo na bivete Befilisteñ bi nga sulane na ba ve Dagon, e zambe wop, beta mvean a bo mevak. Be jôʼô na: e zambe wongan a veya Samson, nsiñe wongan, e mo mangan.

²⁴ Eyoñe bôt be nga yene nye, be nga kañ e Zambe wop a jô na: E zambe wongan a veya nsiñe wongan e mo mangan, nyô a nga sa si jangan a wôé bia bizuʼu bi bôt.

²⁵ E mevaʼa ya minleme miap, be nga jô na: Loʼone Samson, a tame zu bo bia jam éziñ ya bivôé! Ane be nga loone Samson e nda mimbôk; a nga bo bivôé ôsu viap. Be nga telé nye ézezañe ya beta mekôn.

²⁶ Nde Samson a nga jô ésoé ndôman é nga bili nye e wo na: Jôkéʼé ma me nambe e beta mekôn me bili nda me yeʼebe été.

²⁷ Nda é mbe njalan ne lut befam a binga, bivete bise ya Befilisteñ bi mbe valé, a bôte toyini éla be mbe andil, befam a binga, be yenek ane Samson a bo bivôé.

²⁸ Ane Samson a nga yeʼelane Nti a jô na: A Nti a too nnôm éto! Simesaʼane ma, ma yeʼelane wo; A Zambe! Vaʼa ma ngu, vʼéyoñe jia jina me kune mise mam mebaé e be Befilisteñ!

²⁹ A nga vit mekône mebaé ya zañe nda me nga bili je; nde a nga tebe me zañ a bi dina mbo nnôm a di avok e mbo ngal.

³⁰ Eyoñe te Samson a nga jô na: Me woʼok bia be Befilisteñ! Nde a nga vitibi si a ngu, a nda é nga ku bivet a bôte bese be mbe valé yôp. E bôt a nga kee be abume si dé éyoñ a nga wu, be mbe abui a dañe ba a nga wôé éyoñ a nga vee.

³¹ Eyoñe te bobenyañ a ndaa ésaa ése be nga ke nyoñe nye a kee nye. Eyoñ be soya, be nga jame nye e zañe Soréa a Estaôl, e soñe Manôa, ésaa wé. A mbe ntyiʼi mejô Israél tañe mimbu mewôm mebaé.